P33 taas-sahod sa Central Visayas, aprub — DOLE

ni BRT @News | September 14, 2023

Inanunsyo kahapon ng Department of Labor and Employment (DOLE) na inaprubahan ng Central Visayas Regional Tripartite Wage and Productivity Board (RTWPB) ang P33 na dagdag-sahod para sa mga manggagawa sa pribadong establisimyento.

Tataas na ang arawang minimum wage sa Class A hanggang Class C areas sa P420 hanggang P468 para sa non-agriculture establishments at P415 hanggang P458 naman para sa agriculture at non-agriculture establishments na mayroong mas mababa sa 10 manggagawa.

Inaasahang nasa 346,946 minimum wage workers sa rehiyon ang makikinabang sa wage hike.

Inaprubahan ang wage order noong Setyembre 12 at magiging epektibo sa Oktubre 1, 2023.

Empleyadong absent dahil sa bagyo, lusot — DOLE

ni Madel Moratillo @News | July 25, 2023

Hindi puwedeng parusahan ang mga empleyadong hindi makakapasok sa trabaho dahil sa masamang panahon.

Ito ang nakasaad sa abiso ng Department of Labor and Employment kasunod ng banta ng Bagyong Egay na may posibilidad pang maging isang super typhoon.

Ayon sa DOLE, mabigat na kadahilanan ang masamang panahon sa hindi pagpasok sa trabaho lalo na kung malakas ang buhos ng ulan kaya hindi sila dapat patawan ng administrative sanction.

Ayon kay Labor Sec. Bienvenido Laguesma, puwedeng i-excuse sa trabaho ang empleyado na hindi papasok dahil sa bagyo.

Pero salig sa Labor Advisory ng DOLE, kung hindi papasok ang empleyado dahil sa masamang panahon hindi siya makakatanggap ng bayad o suweldo sa araw na iyon malibang may company policy o collective bargaining agreement.

P20K ayuda sa kada pamilya ng child laborer — DOLE

ni BRT | July 3, 2023

Sa paggunita ng World Day Against Child Labor, namahagi ang Department of Labor and Employment ng livelihood starter kit sa mga pamilya ng child laborer sa Nueva Ecija.

Ayon kay DOLE Nueva Ecija Chief Labor and Employment Officer Maylene Evangelista, pauna pa lamang ito na pagkakaloob ng mga sari-sari store package sa halos 100 target na benepisyaryo sa lalawigan.

Ang nasabing livelihood package ay nagkakahalaga ng P20,000 para sa isang pamilya.

Ayon sa DOLE, layon ng gobyerno na makatulong para mabago ang antas ng pamumuhay ng mga benepisyaryo at matapos na ang maagang paghahanapuhay ng mga menor-de-edad at kanilang masulit at maranasan ang masayang pagkabata.

Magbibigay din umano ang kagawaran ng mga gamit sa eskwela at mga grocery package katuwang ang mga lokal na pamahalaan.

Nagsasagawa rin ang ahensya ng mga talakayan hinggil sa Child Labor.