Patakaran ng SC sa Anti-Terrorism Act, tanggap ng DOJ

ni Angela Fernando - Trainee @News | January 3, 2023

Nagpahayag ang Department of Justice (DOJ) nitong Miyerkules ng kanilang pagtanggap sa pagsang-ayon ng Korte Suprema sa set ng procedural rules ukol sa lahat ng petisyon at aplikasyon na may kinalaman sa mga pahayag sa Anti-Terrorism Act of 2020.

Pahayag ni DOJ spokesperson Mico Clavano, “It addresses contentious topics such as designation, proscription, surveillance, detention without judicial warrant of arrest, and significantly, it also added a remedy or recourse for those who believe that they have unjustly been designated.”

Sa ilalim ng mga patakaran, pinapayagan ang Court of Appeals na maglabas ng Order of Proscription na nagdedeklara na bawal ang sinumang grupo ng tao, organisasyon, o asosasyon na nagpapatupad ng anumang mga gawain sa ilalim ng Section 4 hanggang 12 ng ATA, o pagtatatag ng grupo para sa layuning makiisa sa terorismo.

Nagsaad ang Korte Suprema na ang nagmumungkahing partido ay kinakailangang mapatunayan din na ang order ng proscription ay kinakailangan upang pigilan ang isang indibidwal na gumawa o sumali sa terorismo.

Ipinag-utos din ng Korte Suprema ang paglabas ng isang written order mula sa Court of Appeals para sa anumang ahensya ng batas na magsasagawa ng lihim na wiretapping, pakikinig, pag-intercept, pagbasa, pagsusuri, pag-record, o kahit pagkuha ng anumang pribadong palitan ng mensahe.

DOJ, planong magtayo ng 16 regional jail facilities

ni Eli San Miguel - Trainee @News | December 1, 2023

Magtatayo ang Department of Justice (DOJ) ng 16 regional jails bago matapos ang termino ni Pangulo Ferdinand "Bongbong" Marcos Jr., ayon kay DOJ spokesperson Undersecretary Mico Clavano ngayong Biyernes.

Naglalayon ang DOJ na lumipat mula sa National Bilibid Prison (NBP) sa Lungsod ng Muntinlupa upang magbigay-daan para sa isang national government center.

“We take the President’s directive very seriously that is why within the administration’s time until 2028 we hope to build at least 16 regional jails and we’re hoping that the NBP —well, we hope to convert it into either a national government center or another government facility which can be utilized to its maximum potential,” sabi ni Clavano sa isang Palace briefing.

Ipinaliwanag ni Clavano na mataas ang halaga ng lupa kung saan matatagpuan ang NBP. Maliban dito, mayroon din itong malaking espasyo.

Magtatakda naman ang DOJ at iba pang mga ahensiya ng iba't ibang lugar kung saan kinakailangan ang karagdagang jail facilities sa National Jail Decongestion Summit sa Disyembre 6 at 7.

Pagpatay sa brodkaster, iniimbestigahan ng NBI

ni Angela Fernando - Trainee @News | November 6, 2023

Iniimbestigahan na ng National Bureau of Investigation (NBI) ang nangyaring pamamaril sa isang radio anchor na si Juan Jumalon o mas kilala bilang Johnny Walker habang ito ay nagla-live broadcast kahapon, ayon sa Department of Justice nitong Lunes, Nobyembre 6.

Ayon sa DOJ spokesperson na si Mico Clavano, nasa proseso na sila ng paghahanap at agad namang nakuha ng NBI ang impormasyon tungkol sa kaso.

Patuloy pa ang pagtukoy kung sino ang gunman at nasa likuran ng karumal-dumal na pagpatay.

Matatandaang binaril si Jumalon sa kanyang sariling tahanan sa Brgy. Don Bernardo A. Neri nu'ng Linggo, Nobyembre 5.

Sa kabilang banda, nakikipag-ugnayan naman ang NBI sa Presidential Task Force para sa seguridad ng mga taga-media.