9,838 pinakamataas na COVID-19 cases sa isang araw

ni Ronalyn Seminiano Reonico | March 26, 2021

Pumalo na sa 9,838 ang pinakamataas na naitalang bagong kaso ng COVID-19 sa bansa sa loob lamang ng isang araw at sa kabuuang bilang ay umabot na ito sa 702,856 ngayong Biyernes.

Ayon sa Department of Health (DOH), 7 laboratoryo ang hindi nakapagsumite ng kanilang datos sa takdang oras.

Samantala, umabot na sa 109,018 ang aktibong kaso ng COVID-19 sa bansa, ayon sa DOH. Tinatayang aabot naman sa 95.1% ang mild cases sa naturang bilang, 3% ang asymptomatic, 0.8% ang severe at 0.7% ang kritikal ang kondisyon.

Tumaas naman ng 663 ang bilang ng mga gumaling na at sa kabuuan ay 580,689 na. Nakapagtala rin ang DOH ng 54 na mga pumanaw at sa kabuuan ay 13,149 na ang bilang ng mga nasawi sa COVID-19.

Healthcare workers na 'di pa nababakunahan, wanted sa DOH

ni Mary Gutierrez Almirañez | March 26, 2021

Hinahanap ng Department of Health (DOH) ang mga healthcare workers na wala sa masterlist at hindi pa nagpapabakuna kontra COVID-19, partikular na ang mga freelancers at nagtatrabaho sa pribadong pasilidad upang makumpletong bakunahan ang target na 1.8 milyong healthcare workers, ayon kay DOH Undersecretary Maria Rosario Vergeire ngayong umaga, Marso 26.

Aniya, "Hindi pa rin natin sila nahahanap dahil nga po maraming mga healthcare workers ngayon dealing with COVID are not affiliated in any of the institutions or facilities that we have right now…

This QSL, Quick Substitution List, ang sabi pa natin sa protocol, kung hindi po natin mahahanap ‘yung ating ibang mga ospital like private hospital, free-standing clinics during the time na mag-quick substitute kayo, puwede naman ‘yung mga tao du’n sa temporary treatment and monitoring facility, ‘yun pong mga healthcare workers na nagko-contract trace, ‘yun pong healthcare workers na nagre-research o kaya nasa laboratoryo o ‘di kaya ‘yung mga nasa private nursing home.

These are the choices from A.1 to A.7.” Batay sa huling tala ng DOH, tinatayang 508,000 frontline health workers na ang nabakunahan ng unang dose kontra COVID-19, kung saan 279,870 sa naturukan ay taga-Metro Manila, habang 110,760 naman ay taga-Central Visayas at mahigit 94,560 sa Calabarzon.

“Ngayon, isa pa po naming ipinapaalala dahil nga sinabi na po ng WHO, that we should prioritize the healthcare workers now. If we violate, this may compromise ‘yung further natin na supply in the future,” paliwanag pa ni Vergeire.

Matatandaang 9 na alkalde na ang inisyuhan ng show cause order matapos nilang magpabakuna, gayung hindi pa sila prayoridad mabakunahan. Kabilang na rin sa binakunahan sa Parañaque City ang aktor na si Mark Anthony Fernandez na umano’y kuwalipikado sa Quick Substitution List (QSL) dahil mayroon itong comorbidities.

8,019 pinakamataas na COVID-19 cases sa isang araw

ni Ronalyn Seminiano Reonico | March 22, 2021

Pumalo na sa 8,019 ang bagong COVID-19 cases sa Pilipinas na naitala sa loob lamang ng isang araw at sa kabuuang bilang ay umabot na ito sa 671,792 cases ngayong Lunes.

Ayon sa Department of Health (DOH), 2 laboratoryo naman ang hindi nakapagsumite ng kanilang datos sa takdang oras.

Nakapagtala rin ang DOH ng 4 na bilang ng mga pumanaw at sa kabuuang bilang ay 12,972 na ang COVID-19 fatalities sa bansa.

Tumaas naman ng 103 ang bilang ng mga gumaling na sa kabuuan ay 577,850 na.

Samantala, sa mga positibong kaso ng COVID-19 sa bansa, tinatayang aabot sa 95.4% ang mild symptoms, 2.2% naman ang asymptomatic, 0.9% ang nasa kritikal na kondisyon, 1% ang severe symptoms, at 0.52% ang moderate ang sintomas.