ABS-CBN media, hinabol at tinakot ng barko ng China sa WPS

ni Mary Gutierrez Almirañez | April 9, 2021

Hinabol ng Chinese Navy ang Filipino vessel na sinakyan ng media papuntang Ayungin Shoal para sana makapanayam ang mga Pinoy na naapektuhan ang pangingisda dahil sa daan-daang barko ng China na nakakalat sa West Philippine Sea.

Batay sa pahayag ng ABS-CBN Reporter na si Chiara Zambrano ngayong umaga, “Isa du'n sa mga bakurang pupuntahan sana natin ay ‘yung Ayungin Shoal dahil alam naman natin na mayroong detachment ang Armed Forces of the Philippines doon kaya naisip namin, baka puwedeng pumunta roon ang mga mangingisdang Pinoy dahil magiging kampante sila dahil may nakabantay sa kanilang taga-AFP.”

Isinalaysay ni Zambrano na kaagad silang nilapitan at hinarangan ng Chinese Navy kaya nagpasya silang bumalik na lamang sa Palawan, subalit hindi pa rin sila tinantanan ng Chinese Coast Guard 5101 na aktong may dalawang missile boat na sumunod sa kanila sa loob nang mahigit kalahating oras.

“Tiningnan namin ang location namin sa GPS, kami ay nasa 90 nautical miles lamang mula sa pinakamalapit na kalupaan ng Palawan. Malinaw na malinaw na nasa loob kami ng exclusive economic zone kung saan dapat, malaya na nakakapangisda, nakakapaglayag ang lahat ng Pilipino, at lahat ng yamang-dagat dito ay para sa Pilipinas. Tayo dapat ang nakikinabang.”

Paliwanag pa niya, “Pumunta kami dito para itanong sa mga mangingisdang Pilipino kung ano ang ikinatatakot nila sa paglalayag sa West Philippine Sea at hindi namin inaasahan na mismong kami ay mararanasan at makikita namin ‘yung ganitong powerful na mga vessel o sasakyang pandagat ng China.”

Samantala, nagpahayag naman ng suporta si US Secretary of State Antony Blinken sa ‘Pinas hinggil sa kontrobersiyal na West Philippine Sea at South China Sea. Iginiit din niyang makikipagkita siya kay Department of Foreign Affairs (DFA) Secretary Teodoro Locsin, Jr. upang pag-usapan ang tungkol doon at iba pang isyu.

Batay sa kanyang tweet, “Substantive conversation today with my Philippine counterpart, @teddyboylocsin, discussing our concerns with People’s Republic of China militia vessels in the South China Sea and our efforts to combat anti-Asian hate and violence.”

Kaugnay ito sa naging pahayag ni US State Department Spokesperson Ned Price na susuportahan ng Amerika ang Pilipinas laban sa China.

"We will always stand by our allies and stand up for the rules-based international order," sabi pa ni Price.

Pinay, negatibo sa Pinas, Covid positive na pagdating sa HK

ni Mary Gutierrez Almirañez | April 5, 2021

Isang babaeng Overseas Filipino Worker (OFW) ang nagpositibo sa COVID-19 pagdating sa Hong Kong, gayung negatibo siyang umalis sa ‘Pinas, kung saan tinatayang umabot na sa 16,406 ang mga OFWs na positibo sa virus, batay sa huling tala ng Department of Foreign Affairs (DFA).

Ayon sa ulat, lumipad ang babaeng OFW nu’ng Marso 13 patungong Hong Kong. Pagkarating sa Hong Kong ay sumalang uli siya sa swab test at dito nakumpirmang positibo na siya sa virus.

Mula sa airport ay kaagad siyang isinakay sa ambulansiya upang isugod sa ospital. Nilagnat at nagsuka siya. Matapos ang 7 araw ay inilipat siya sa hotel upang doon ipagpatuloy ang quarantine. Sinagot naman ng kanyang employer ang lahat ng gastos.

Paliwanag pa ng OFW, mayroon siyang medical certificate mula sa ospital na makakapagpatunay na negatibo siyang umalis sa ‘Pinas.

Sa ngayon ay hindi pa natutukoy kung saan siya posibleng nahawa.