452,031, patay sa Brazil dahil sa COVID-19

ni Mary Gutierrez Almirañez | May 26, 2021

Pumalo na sa 452,031 ang kabuuang bilang ng mga namatay sa Brazil dahil sa COVID-19, ayon sa tala ng Brazil Health Ministry nitong Martes.

Batay sa ulat, 2,173 ang nadagdag sa pumanaw, habang mahigit 1,854 ang daily average ng mga nagpopositibo.

Kabilang sa mga itinuturing na dahilan ng surge sa Brazil ay ang nade-delay na vaccination rollout, kung saan 9.9% pa lamang ang fully vaccinated at 20% naman ang nabakunahan ng unang dose, mula sa 212 million na residente.

Isa rin sa ikinababahala kung bakit mabilis ang hawahan ng COVID-19 sa Brazil ay mula nu’ng naitala ang Indian variant sa 6 crew members na nanggaling sa Hong Kong na nakapasok sa bansa.

Huli na rin nang ipatupad ang mahigpit na quarantine restrictions at health protocol sa bansa.

Samantalang sa ‘Pinas nama’y 18,840 overseas Filipino workers (OFW) na ang naitalang kaso ng COVID-19, kung saan 143 balikbayan ang nadagdag.

Ayon naman sa tala ng Department of Foreign Affairs (DFA), nakarekober na ang 130 sa nagpositibo, habang pinag-aaralan na rin ang kanilang sample kung anong variant ang humawa sa kanila.

Galing Oman at UAE, bawal na sa ‘Pinas

ni Mary Gutierrez Almirañez | May 16, 2021

Bawal na ring pumasok sa ‘Pinas ang lahat ng mga biyahero galing Oman at United Arab Emirates (UAE) hanggang sa ika-31 ng Mayo, bilang pag-iingat sa banta ng Indian variant ng COVID-19, ayon kay Overseas Workers Welfare Administration Administrator Hans Leo Cacdac ngayong araw, May 16.

Aniya, "The travel ban for inbound Filipinos from UAE and Oman is effective on May 15. The latest cases of Indian variant came from these areas. Mostly from the Middle East."

Matatandaan namang inanunsiyo na rin kamakailan ni Spokesperson Harry Roque ang pag-i-implement ng travel ban, alinsunod sa naging rekomendasyon ng Department of Health (DOH) at Department of Foreign Affairs (DFA).

"All travelers coming from Oman and the United Arab Emirates (UAE) or those with travel history to these two countries within the last fourteen (14) days preceding arrival shall be prohibited from entering the Philippines beginning 0001H of May 15, 2021 until 2359H of May 31, 2021," sabi pa ni Roque.

Samantala, extended din hanggang May 31, 11:59 nang gabi ang travel ban sa mga biyahero mula India, Pakistan, Nepal, Bangladesh at Sri Lanka.

Sa ngayon ay 12 na ang nagpositibo sa Indian variant ng COVID-19 sa ‘Pinas. Karamihan sa kanila ay overseas Filipino workers (OFW) galing Middle East.

Ang nasabing B.1.617.2 variant ng COVID-19 ay orihinal na na-develop sa India at laganap na rin sa iba’t ibang bansa. Ito ay kinatatakutan ng buong mundo dahil mas mabilis itong makahawa kumpara sa ibang variant.

Sotto: 'Pinas walang karapatang palayasin ang China sa WPS

ni Mary Gutierrez Almirañez | May 7, 2021

Pumanig si Senate President Tito Sotto kay Pangulong Rodrigo Duterte hinggil sa usapin sa West Philippines Sea (WPS) laban sa China, batay sa naging pahayag niya sa isang online press conference kahapon, May 6.

Aniya, "Sa pagkakaalam ko sa ruling, sinasabi lang doon na ang ‘Pinas ay may pag-aari, may stake doon, pero wala akong nakikitang sinabi na tribunal na dapat lisanin ng China at ibigay sa ‘Pinas ang ibang area."

Paliwanag pa niya, "I'm sure ganoon ang dating sa Presidente. It does not mean that it will diminish the efforts of DND (Department of National Defense). It's just a way of saying na itong mga nagpipintas dito, 'di rin alam ang nangyayari."

Hindi naman niya pinangalanan ang mga tinutukoy na kritiko.

Gayunman, matatandaang kumasa sa hamong pakikipagdebate kay Pangulong Duterte si retired Supreme Court Justice Antonio Carpio tungkol sa isyu sa WPS, kung saan handang magsilbing host ang Philippine Bar Association (PBA).

"The bottom line is we negotiate or we go to war," dagdag pa ni Sotto.

Sa ngayon ay patuloy pa ring namamalagi sa Philippines exclusive economic zone (PEEZ) ang mga naglalakihang barko ng China sa kabila ng diplomatic protests na isinampa ng Department of Foreign Affairs (DFA) laban sa kanila.