Walang brownout sa 2022 elections — DOE

ni Jasmin Joy Evangelista | September 3, 2021

Ipinahayag ni Energy Secretary Alfonso Cusi na walang dapat ikabahala ang publiko tungkol sa suplay ng kuryente sa 2022 lalo na sa panahon ng eleksiyon.

Ito ay dahil mayroon daw sapat na suplay ng kuryente para sa bansa.

"Makikita natin sa initial forecast na ito na sapat ang supply, walang yellow alert. Kita po ninyo, walang lumalampa --- bumababang green bar doon sa yellow line at wala rin pong power interruption dahil sa supply...Sa madaling salita, ginagawa po lahat natin upang masiguro na may enough supply tayo ng kuryente sa darating na halalan sa 2022 and beyond," ani Cusi nu'ng Huwebes nang gabi.

Para raw magawa ang mga ito, pinaghahandaan na ng buong energy sector ang ilang scenario na maaaring makaapekto sa energy supply, tulad ng natural gas restrictions, forced outages, maintenance adjustments ng mga planta ng kuryente, demand sa interruptible load program at iba pa.

Mayroon din umanong partnership ang gobyerno sa Japan katuwang ang pribadong sektor para sa pag-develop ng liquified natural gas facilities sa bansa.

"Ang development ng LNG mula sa partnership po ng AG&P at Osaka Gas ay maaaring magsimula ng commercial operation by second quarter of 2022.

At ang partnership naman po ng First Gen ay maaaring --- and Tokyo Gas is due for commercial operation by the third quarter of 2022," paliwanag ni Cusi.

Bukod pa rito, patuloy pa rin aniya ang pag-aaral ng DOE sa paggamit ng nuclear energy at ang potential use ng hydrogen.

Sapat na suplay ng kuryente sa Occidental Mindoro, tutugunan ng DoE

ni Jeff Tumbado | September 2, 2021

Matutugunan na ang matagal nang minimithi ng mga residente ng Occidental Mindoro na mabigyan ng sapat na suplay ng kuryente partikular sa mga kasuluk-sulukang lugar ng lalawigan.

Ito ay makaraang aprubahan ng Department of Energy (DOE) ang 29 megawatts power supply sa lugar, ayon na rin sa kahilingan ni Representative Josephine "Nene" Ramirez-Sato.

Tiniyak ni Sato ang sapat at supisyenteng suplay ng elektrisidad sa lalawigan alinsunod na rin sa binitawang pangako ng national government na tulungan ang mga lugar na may kakulangan sa power supply.

“Magandang balita po ang ating dala para sa ating mga kababayang naninirahan sa Occidental Mindoro dahil sa mga susunod na buwan po ay magkakaroon na ang ating probinsiya ng mas reliable na supply ng kuryente. Ito po ay katuparan ng lahat ng ating pagsisikap at pakikipag-usap sa pamahalaan para siguruhin na magiging maayos ang supply ng kuryente sa ating lalawigan,” pahayag ni Sato.

Batay sa pakikipag-usap nito kay Energy Secretary Alfonso Cusi, kanyang ipinangako ang tulong para sa pagkakaroon ng matatag na suplay ng kuryente.

Suportado rin aniya ni Pangulong Rodrigo Duterte ang mga programa ng Occidental Mindoro ukol sa masaganang suplay ng elektrisidad.

Samantala, inaasahan naman na makukumpleto ang konstruksiyon ng Occidental Mindoro Consolidated Power Corp. (OMCPC) sa kanilang 20-MW diesel power plant sa susunod na buwan ng Oktubre.

Gayundin ang Omeco na nagbukas ng bagong 5MW generator set ng OMCPC kasabay sa 4MW genset ng National Power Corporation na parehong nakatayo sa Tayamaan, Mamburao ay matagumpay na nakapagbigay-elektrisidad sa mga konsumer doon.

Nabatid na ang 29MW power supply mula sa planta ng OMCPC at generator set ng NPC ay tama lamang para sa pangangailangan at mahinto ang nakagawiang "patay-sinding suplay" na labis nakaapekto sa mga sambahayan.

COVID-19 vaccines, tagilid sa rotational brownout

ni Mary Gutierrez Almirañez | June 1, 2021

Pinaaalalahanan ng Department of Energy (DOE) ang mga local at national officials na panatilihin ang pakikipagkoordinasyon sa Inter-Agency Task Force (IATF) hinggil sa mga nakaimbak na COVID-19 vaccines sa bawat cold storage facilities dahil sa nagaganap na rotational brownout sa Luzon.

Ayon kay DOE Undersecretary William Fuentebella, "Dapat patuloy 'yung coordination natin sa IATF sa ating mga opisyales — local and national officials — para masigurado na protektado 'yung ating mga storage facilities for our vaccines."

Sa ngayon ay nag-umpisa na ang 2-hour rotational brownout sa Luzon Grid simula kaninang alas-10 nang umaga at matatapos mamayang alas-5 nang hapon.

Susundan iyon mamayang alas-6 nang hapon hanggang alas-10 nang gabi, dahil sa umano'y manipis na suplay ng kuryente.

Ayon pa sa National Grid Corporation of the Philippines (NGCP), mahigit 10 planta ang palyado kaya kapos ang supply ng kuryente sa buong Luzon.

Pinapayuhan naman ni Fuentebella ang mga namamahala sa bawat cold storage facilities na gumawa ng triple backup system upang hindi masira ang COVID-19 vaccines dahil sa nangyayaring brownout.