Presyo ng manok at gulay, tumaas

ni Jasmin Joy Evangelista | December 10, 2021

Tumaas nang halos doble ang presyo ng gulay mula Southern Tagalog habang nasa P10 kada kilo ang itinaas ng presyo ng manok sa mga pamilihan.

Dahil dito ay lalo umanong tumutumal ang bentahan sa mga pamilihan kumpara noong mga nagdaang holiday season.

Inaalam ng Department of Agriculture kung bakit tumaas ang presyo ng mga gulay-Tagalog dahil halos kasingtaas ng mga presyo noong buwan ng Oktubre nang sumirit ang presyo ng krudo. 

"Pero ang pagkakaiba ngayon, bumababa ang presyo ng krudo ngayon so ichecheck lang po natin. Sa ibang taon, lalo na nung nakaraang taon, talagang may bagyo ngayon po walang gaanong malalakas na bagyo and nakalipas ang November na di tayo dinalaw ng malalakas na bagyo so ichecheck po natin," ani DA Director Nichols Manalo. 

Ayon naman sa mga magmamanok, nasa P10 kada kilo na ang itinaas ng presyo ng manok.

“Malayo ang pagkakaiba depende sa palengke merong 150, 155 meron ding 180. 'Yung imported ay marami nakikita naman yan sa records ng national meat inspection service. Marami diyan nahirapan maglabas pero ngayon may pagkakataon silang maglabas ng kanilang imbentaryo kasi tumaas nga ang local," ani United Broiler Raisers Association chair Bong Inciong.

Presyo ng gulay sa NCR hindi gaanong tataas hanggang Pasko — DA

ni Jasmin Joy Evangelista | October 26, 2021

Malaki ang paniniwala ng Department of Agriculture na hindi gaanong tataas ang presyo ng gulay sa NCR habang papalapit ang Pasko.

Stable umano ang suplay ng gulay dahil nakababawi na ang mga magsasaka sa mga lugar na sinalanta ng bagyo.

“Masisigurado natin na stable 'yung suplay. Ganun din ang presyo, pero alam natin na dahil nga magpa-Pasko, tumataas ang demand. Natural 'yun magkakaroon ng kaunting dagdag,” ani Agriculture Assistant Secretary Arnel De Mesa.

Nasa 180 metriko toneladang gulay sa ilalim ng KADIWA program ng pamahalaan ang dumating mula Cordillera Administrative Region, Cagayan Valley Region, at Bicol Region sa Quezon City.

Tuluy-tuloy na rin umano ang pagbagsak ng gulay mula probinsiya patungo sa Metro Manila.

“It only shows na wala tayong problema pagdating sa suplay ng highland at lowland vegetables,” ani De Mesa.

Samantala, patuloy ang pagbibigay ng tulong at ayuda ng pamahalaan sa mga magsasaka upang matiyak ang produksyon ng gulay at kita ng mga magsasaka.

DA naglaan ng P822 M para sa mga nasalanta ng bagyong Maring

ni Jasmin Joy Evangelista | October 19, 2021

Naglaan ang Department of Agriculture (DA) ng P822 milyon para tulungan ang mga magsasaka at mangingisda na naapektuhan ng pananalasa ng bagyong Maring.

Kabilang sa mga naapektuhan ay palay, mais, high value crops, livestock at fisheries, irrigation, at agri-facilities.

“We will continue to provide our typhoon and flood-affected farmers and fisherfolk in Northern Luzon and other areas with immediate aid and much-needed assistance to recover and start anew after the damage and loss in their livelihood and income,” ani DA Secretary William Dar.

Sa nasabing halaga, P650 milyon ang ilalaan sa emergency loans sa ilalim ng SURE (Survival and Recovery) Calamity Loan Assistance Program.

Dito ay maaaring makahiram ang mga nasalantang magsasaka at mangingisda ng P20,000 nang walang interes, collateral, at puwedeng bayarang ng hanggang 10 taon.

Samantala, ang P172 milyon naman ay gagastusin para sa Quick Response Fund (QRF), o rehabilitasyon ng mga agricultural area na sinira ni Maring.