Bilyonaryong Mafia ang Mahal Ko (8)

ni Maria Angela Gonzales @Kuwentong Pag-Ibig | Pebrero 16, 2024

“Gusto mong pakasalan kita?” Naniniguradong tanong ni Via sa lalaking hindi niya alam ang pangalan. 

“Yes,” nakangising sagot nito.

“Why?”

“Para mabayaran mo utang ng ama-amahan mo.”

Sa pagkakatitig niya sa lalaki, parang nakikita niya roon ang kanyang Tatay Pedro, ngunit ipinilig niya ang kanyang ulo. Nakatitiyak naman kasi siyang hindi ito magkaanu-ano.

“Paano ka nakakasiguro?” Tanong niya sa kanyang sarili. 

Bahagya siyang umiling dahil hindi naman niya talaga alam ang sagot, at hindi rin niya ganu’n kakilala ang kanyang Tatay Pedro. Basta ang alam niya, bigla na lamang itong dumating sa buhay nilang mag-ina noong 8-anyos siya.

“Wala ka ng ibang pagpipilian kundi sumang-ayon. Kunsabagay, maaari ko pa namang makuha ang bahay at lupa n’yo.”

“Huwag.”

“Kung ayaw mong kunin ko ang bahay n’yo bilang kabayaran sa utang ng tatay mo, magpakasal ka sa akin,” matapang nitong sabi sa nakakapangilabot na tinig.

Noon, laging pinapaalala ng ina ni Via sa kanya na, huwag niya umanong papabayaan ang kanilang bahay. Tanging ito lang daw kasi ang maipapamana nito sa kanya at sa kanyang magiging apo. 

“Pag-ibig ang dahilan kaya nagpapakasal ang dalawang tao. Hindi natin mahal ang isa’t isa. Kaya bakit ako magpapakasal sa’yo?” Naghahamong tanong niya rito, at dito na nagsimulang uminit ang kanyang ulo.

“Hindi ko na kailangan pang sabihin sa’yo ang dahilan kung bakit, pero kung tatanggihan mo ang alok kong kasal, hindi naman kita pipilitin. Kaya lang mapapahamak ang ama mo.”

“Papatay ka dahil sa pera?” 

Sa halip na sagutin siya nito, halakhak na nakapangingilabot ang pinawalan ng lalaki. Pakiwari niya tuloy ay kamatayan ang sasapitin ng kanyang stepfather kapag hindi siya pumayag sa gusto nito.

“Kung sa tingin mo ganyan ako kasama, may pagpipilian ka pa ba?” Nakangisi nitong tanong sa kanya na para bang sinasabing magagawa nga nito ang kanyang hinala at hindi niya iyon hahayaan.

Ngunit, may magagawa ba siya kung buhay ng stepfather niya ang kapalit?

Itutuloy…

Bilyonaryong Mafia ang Mahal Ko (7)

ni Maria Angela Gonzales @Kuwentong Pag-Ibig | Pebrero 14, 2024

“Ano'ng pag-uusapan natin?” 

Natigilan si Via sa pagtatanong ng binata. Ang lapad kasi ng pagkakangiti nito sa kanya at para bang nagpapahiwatig na isa itong mabuting tao. 

“Mabuting tao?” Sarkastikong tanong niya sa kanyang sarili. Bigla niya kasing naalala ang dahilan kung bakit siya naroon. Kailangan niya itong komprontahin dahil bina-blackmail nito ang kanyang stepfather. 

“Babayaran ko ang utang ng tatay ko,” mariin niyang sabi pagkaraan. 

“Cash? Paalala ko lang sa iyo, anim na milyon ang utang niya.”

“Limang milyon lang, hindi ba?”

“Hangga’t hindi niya nababayaran ang kanyang inutang, tutubo ito nang tutubo.”

Kahit tuloy nag-aalala siya sa kanyang ama-amahan, biglang naningkit ang kanyang mga mata sa pagkakatingin niya rito. “Yung limang milyon nga hindi niya mabayaran, tapos dadagdagan mo pa? Para kang sira…” inis niyang sabi pero bigla siyang natigilan. 

Hindi naman kasi niya ito kilala kaya bigla siyang nag-alala na baka patulan siya nito. 

Hindi niya napigilan ang mapasinghap nang maalala niyang nasa opisina nga pala siya nito. Kung gugustuhin nitong sampalin siya ay madali lang magagawa ng binata. Paano kung bigla na lang siya nitong halayin?

Naningkit bigla ang kanyang mata nang maalala niya ang sinabi ng kanyang Tatay Pedro, na siya umano ang hinihingi nitong kabayaran. 

“Hindi ako for sale.”

“What?” 

“Sabi ng Tatay Pedro, ako raw ang hinihingi mong kabayaran.”

“That’s true.”

“Hindi ko ibinibenta ang sarili ko sa kahit na sinong lalaki. Babayaran ko lang ang utang ng tatay ko, buwan-buwan, walang tubo. Two thousand monthly.”

“At sa palagay mo kailan ka matatapos magbayad?”

Bigla siyang natigilan. Sa tingin niya kahit na pumuti na ang kanyang buhok hindi pa rin niya iyon mababayaran. 

“Pero, hindi ko gusto ibigay ang virginity ko sa’yo”

“Marry me,” buong diing sabi nito na nagpa-nganga sa kanya. 

Itutuloy…

Bilyonaryong Mafia ang Mahal Ko (6)

ni Maria Angela Gonzales @Kuwentong Pag-Ibig | Pebrero 12, 2024

"Matapang," nakangising sabi ng big boss na si Nhel Zamora.

Hindi niya akalain na ang mismong anak-anakan na tina-target niya ang nagnanais na makausap siya. 

Ang ini-expect kasi niya ay tatakbo at magtatago ito. Ang gusto kasi sana niyang mangyari ay iwanan ng dalaga si Pedro Pedral, gusto niya kasing iparanas sa lalaking iyon kung paano maiwanan. 

Alam niyang kahit hindi nito kadugo si Olivia Castro, mahal nito ang babae at iyon ang nagpapatindi sa galit na kanyang nararamdaman. 

Dahil sa kapabayaan nito sa kanyang ina, ibang lalaki ang kinailangan niyang kilalaning ama dahil sa pagtakas nito sa responsibilidad. 

Ayon sa kanyang stepdad na si Manuel Miranda, kailangan niyang maging matapang sa hamon ng buhay. 

Kahit na ibinigay ni Manuel ang lahat ng pangangailangan at gusto niya, hindi pa rin mababago ang katotohanan na masamang gawain ang tinuturo nito sa kanya. Malaking bahagi ng kanyang isipan ang nagsasabi na hindi niya gusto iyon pero sakit ng katawan ang matatamo niya kapag hindi siya rito sumunod. 

Dahil wala itong kakayahan na magkaroon ng anak, inangkin siya nito na para na ring isang anak. Kung ang iba ay sinasabing suwerte siya, puwes para sa kanya hindi niya iyon nararamdaman. 

Kung talaga kasing bukal sa loob nito ang sinasabi niya dapat sana ay binago nito ang kanyang apelyido gayung ikinasal naman ito sa kanyang ina. 

Gayunman, palagi nitong sinasabi na siya ang magmamana ng kanilang negosyo. 'Di niya lang alam kung paano siya matutuwa kung masama rin naman ang ipapamana nito sa kanya - ang pasugalan at pagpapautang. 

Ang mga taong umuutang sa kanila na wala ng kakayahang magbayad, ang ginagawa nilang solusyon ay kuhain ang ari-arian o 'di kaya kitilin ang buhay ng mga ito. 

“Mag-usap tayo,” mariing sabi ng isang babae na nasa harapan na pala niya – si Olivia Castro. 

Nanlilisik ang mga mata nito at para bang dambuhalang pusa na gusto siyang kalmutin. 

Itutuloy…