Sara Duterte susunod sa sariling kautusan, hindi magmo-motorcade sa Davao City

ni Jasmin Joy Evangelista | March 11, 2022

Hindi rin magsasagawa ng motorcade si VP bet Sara Duterte-Carpio sa Davao City kung saan siya ang namumuno bilang alkalde.

Ayon kay Duterte-Carpio, nais niyang damayan ang mga apektado ng pagtaas ng presyo ng bilihin sa gitna ng patuloy na pagsirit ng presyo ng petrolyo kung kaya’t nagdesisyon siyang magpatupad ng motorcade ban sa kanyang nasasakupan.

“I am the mayor of Davao City. I am tasked to protect the interest of the Davaoeños and I believe with the pahirap na cause ng pandemic,” ani Duterte-Carpio sa isang ambush interview.

“Pangalawa the increasing prices at ‘yong effect nito sa pahirap na naman ulit sa presyo ng ating basic commodities ay dapat po nakikiisa tayo sa mga kababayan natin who will most likely na ‘yung mga pinaka nasa baba sila ‘yong likely na pinaka maging vulnerable at mag suffer ng effects nito,” dagdag niya.

Nang tanungin kung hindi rin siya magsasagawa ng motorcade sa Davao City para mangampanya sa pagka-bise presidente: “Of course hindi kasi di ba I already said that we need to empathize with everyone who will most likely suffer because of the increasing prices and the effect of that war in Ukraine at sa Russia.”

Sinabi rin ni Duterte-Carpio na ang pagdalo niya sa mga motorcade sa labas ng Davao City ay nakadepende sa kanyang schedule.

Family driver patay matapos hampasin ng brick ng amo, ari pinutol pa

ni Jasmin Joy Evangelista | February 17, 2022

Patay ang isang family driver sa Davao City matapos umanong paluin ng cement brick sa ulo at pagkatapos ay pinutulan pa ng ari ng amo nito.

Batay sa report ng Tugbok Police Station, bandang 6:40 ng gabi nang dumating sa bahay ng kanyang amo sa Brgy. Tacunan, Tugbok District ang biktima na si Danilo Aranzo, 51, kasama ang asawa ng suspek.

Pagpasok ng bahay ay bigla nalang umanong hinampas sa ulo ng suspek na si Alexander Taclucop, 51, ang biktima gamit ang isang brick cement. 

Matapos ito ay nawalan ng malay si Aranzo saka itinali ng suspek at pinutol ang ari nito gamit ang kutsilyo.

Hindi na umabot sa ospital ang biktima at binawian na ng buhay.

Narekober sa crime scene ang kutsilyong ginamit na may 20.5 cm ang haba at ang brick cement na halos isang kilo ang bigat. 

Arestado na ang suspek at kinasuhan na ng kasong murder.

Shabu sa tinapay, nadiskubre sa Davao City police station

ni Jasmin Joy Evangelista | February 11, 2022

Arestado ang isang 27-anyos na babae matapos umanong magtangkang magpuslit ng hinihinalang shabu na nasa loob ng tinapay sa isang police station sa Davao City noong Huwebes ng gabi.

Ayon sa pulisya, nadiskubre ang hinihinalang shabu sa loob ng isang loaf bread na dala ng suspek. May timbang ito na 3 gramo at nagkakahalaga ng P48,000.

Ihahatid niya sana ito kasama ang mga personal na gamit sa kanyang kaibigang kasalukuyang nakakulong dahil sa kasong pagbebenta ng ilegal na droga sa Mandug Police Station. 

Nakatakdang sampahan ng kasong paglabag sa Republic Act 9165 o Comprehensive Dangerous Drugs Act of 2002 ang suspek.