DOH: 1 sa 4 na ospital sa Olongapo City, nasa critical level na

ni Jasmin Joy Evangelista | January 13, 2022

Nasa critical status na ang 1 sa 4 na ospital sa Olongapo City matapos maabot ang maximum bed capacity para sa COVID-19 patients, ayon sa datos ng Department of Health (DOH) nitong Jan. 12.

Lahat ng 6 na isolation beds ng Zambales Medical Mission Group Coop Hospital ay okupado na.

Sa St. Jude Medical Center naman ay nasa moderate level pa, kung saan 3 sa 8 intensive care unit (ICU) nito ang bakante pa.

Nasa safe level naman ang James L. Gordon Memorial Hospital, ang primary COVID-19 facility sa siyudad, at Mother and Child General Hospital.

Nakapagtala na ang Olongapo City ng 5,684 COVID-19 cases simula noong 2020, kung saan 223 dito ay aktibo, habang 5,143 ang naka-recover at 318 ang namatay.

Active COVID-19 cases sa Zambales, tumaas ng 250% sa loob lamang ng 1 linggo

ni Jasmin Joy Evangelista | January 13, 2022

Tumaas ng 250% o mahigit triple ang bilang ng active cases ng COVID-19 sa Zambales kumpara sa naitalang mga kaso noong nakaraang linggo.

Sa pinakabagong datos mula sa provincial health office, mula sa 65 active cases noong Jan. 5, tumalon sa 232 ang mga bagong kaso nito lamang Jan. 12.

Mababa rin ang recovery rate kung saan 0.08% o 8 pasyente lamang ang gumaling sa naturang sakit.

Simula 2020, nakapagtala na ang Zambales ng 10,113 COVID-19 cases, kung saan 9,654 dito ay naka-recover habang 610 ang nasawi.

Nasa 61% naman ng target population o nasa 278,004 residente ng probinsiya ang fully vaccinated na kontra-COVID-19.

DOH Home Care Guide para sa batang may COVID-19

ni Jasmin Joy Evangelista | January 13, 2022

Maraming bata ang dinadapuan ng COVID-19 habang tumataas ang bilang ng kaso nito sa bansa.

Dahil dito, marami ring magulang ang hindi alam kung paano ang gagawin sa sandaling tamaan ng sakit ang kanilang anak.

Base sa Home Care Guide for Kids ng Department of Health, ang home care ay posibleng gawin sa mga batang may Covid pero walang lagnat.

Kabilang sa mga sintomas na dapat bantayan ng magulang ay ubo, sipon, pagtatae, sore throat, sakit ng ulo, pagkawala ng panlasa at pang-amoy, at kawalan ng ganang kumain.

Kailangan ding sigurihin na hindi dehydrated ang bata at kumakain ng healthy.

"Kung minsan, bumababa 'yong impeksyon sa baga, 'yong paghinga ng bata ay maalon, lalo sa mga sanggol, mas mataas sa 60 ang bilang ng paghinga tapos mabilis 'yon tapos 'pag two years old mga 40 ang bilang, mas mataas doon. Ito 'yong dapat na-che-check ng nanay," ani Benito Atienza, pangulo ng Philippine Medical Association.

Kapag ang bata ay hindi bumababa ang lagnat at hirap sa paghinga, kailangan na itong dalhin sa ospital.

Samantala, ang isolation ay maaaring matapos pagkalipas ng 10 araw, kung sa pampitong araw ay hindi na ito nakararanas ng COVID-19 symptoms.