120 K target bakunahan kontra COVID-19 kada araw

ni Mary Gutierrez Almirañez | April 21, 2021

Tina-target ng pamahalaan na mabakunahan ang 120,000 indibidwal kada araw sa NCR Plus kapag nagkaroon na ng tuluy-tuloy na suplay ng COVID-19 vaccines sa bansa, ayon kay Vaccine Czar Carlito Galvez, Jr. ngayong araw, Abril 21.

Aniya, "Our supply chain experts have also provided some sort of simulations wherein the NCR Plus will have a 120,000 jabs a day with the requirement that the NCR should have a steady supply of 3.3 million (doses) monthly."

Dagdag pa niya, "With that, we will designate mega vaccination sites like the malls and the different arenas and gymnasiums."

Sa ngayon ay 1,562,563 na ang mga nabakunahan kontra COVID-19 na pinangunahan ng mga healthcare workers, pulis, senior citizen, may comorbidities, mga mayor at governor na nasa high risk areas.

Matatandaang inilabas na rin ang listahan ng A4 Priority Group na inaasahang mababakunahan sa kalagitnaan ng Mayo o Hunyo. Patuloy din ang online pre-registration para sa mga nais magpabakuna.

A4 Priority Group sa bakuna, aprubado na ng IATF

ni Mary Gutierrez Almirañez | April 16, 2021

Inaprubahan na ng Inter-Agency Task Force (IATF) on Emerging Infectious Diseases nitong Huwebes ang bagong listahan ng Priority Group A4 na prayoridad mabakunahan kontra COVID-19.

Ayon kay Presidential Spokesperson Harry Roque ngayong araw, kabilang ang mga sumusunod na empleyado sa inilatag na listahan ng IATF:

• frontline vendor sa pribado at pampublikong palengke

• frontline worker sa groceries, supermarkets at delivery services

• frontline workers sa food manufacturer, beverage, medical at pharmaceutical products

• frontline workers sa food retail, kasama ang food service delivery

• frontline workers sa private at government news media

• frontline workers sa private at government financial services

• frontline workers sa hotels at accommodation establishments

• mga pari, rabbis, imams, at iba pang religious leaders

• frontline personnel sa basic education/higher education institutions at mga ahensiya nito

• mga security guard na naka-assign sa bawat nabanggit na establisimyento

• mga nagdi-distribute ng bill ng tubig, kuryente, cable, landline at internet provider sa bawat bahay

• frontline workers sa law/justice, security at social protection sectors

• frontline government workers na nag-o-operate ng government transport system, quarantine inspection; worker safety inspection at iba pang COVID-19 response activities

• frontline government workers na in-charge sa tax collection, assessment of businesses for incentives, election, national ID at data collection personnel

• mga diplomatic community at Department of Foreign Affairs (DFA) personnel sa consular operations

• Department of Public Works and Highways (DPWH) personnel na in-charge sa pagmo-monitor ng infrastructure projects ng gobyerno

• overseas Filipino workers na naka-schedule ma-deploy in 2 months

• mga biyahero (land, air, and sea), kasama ang logistics

Matatandaang nagsimula ang vaccination rollout sa ‘Pinas noong ika-1 ng Marso sa pangunguna ng mga frontline healthcare workers at pulis na sinundan ng mga senior citizens at may comorbidities. Kabilang din sa naging prayoridad sa bakuna ang mga mayor at governor na nasa high risk areas.

Sa ngayon ay lumagpas na sa isang milyon ang mga nabakunahang indibidwal kontra COVID-19.

Sa kabuuang bilang nama’y 3,025,600 doses na ang mga nai-deliver na bakuna sa bansa, kung saan Sinovac at AstraZeneca pa lamang ang nakararating. Gayunman, patuloy pa rin ang pakikipagnegosasyon ng pamahalaan sa mga international manufacturers para sa ibang brand at mas mataas na efficacy rate ng bakuna.

Sa kabilang banda, pinagpaplanuhan na rin ng ‘Pinas na gumawa ng sariling COVID-19 vaccines.

922,898, nabakunahan na kontra COVID-19

ni Mary Gutierrez Almirañez | April 8, 2021

Umabot na sa 922,898 ang nabakunahan kontra COVID-19 na kabilang sa A priority list, batay sa huling datos ng Department of Health nitong Miyerkules, Abril 8.

Ayon pa sa DOH, mahigit 872,213 na ang nabakunahan ng unang dose, habang 50,685 naman ang naturukan ng pangalawang dose.

Matatandaang nagsimula ang vaccination rollout sa bansa noong ika-1 ng Marso, kung saan naunang dumating ang 600,000 doses ng Sinovac mula sa China at sinundan naman ng AstraZeneca galing COVAX facility. Nasundan pa ito ng ilang dose mula sa dalawang nasabing brand na bakuna. Samantala, inaasahan namang darating na rin ngayong Abril ang bakuna ng Pfizer sa bansa.

Sa ngayon ay tinatayang 2,525,600 doses ng bakuna na ang nai-deliver sa bansa at mahigit 77% o 1,936,600 doses na nito ang naipamahagi sa mga ospital. Sa kabuuan ay 2,670 vaccination sites ang nagsasagawa ng rollout.

Magmula naman nang maubos ang suplay ng AstraZeneca sa bansa ay pinayagan na ng Department of Health (DOH) at Food and Drug Administration (FDA) na iturok ang Sinovac sa mga senior citizens upang magpatuloy ang rollout.