Surplus na COVID-19 vaccines ng Canada, gustong bilhin ng ‘Pinas

ni Lolet Abania | June 28, 2021

Nagpahayag ng intensiyon ang Pilipinas na kunin ang ilang natitirang COVID-19 vaccines mula sa Canada bilang bahagi ng pagsisikap ng gobyerno na magkaroon ng mas maraming supply ng bakuna.

Sa isang Palace news conference ngayong Lunes, sinabi ni Philippine Ambassador to Canada Rodolfo Robles na mayroong inaasahang surplus ang Canada ng tinatayang 100 milyong doses ng COVID-19 vaccines.

“We are being listed among those who are interested to partake of the excess of the 100 million (doses). They expect to have a full vaccination of everybody by the middle of the fourth quarter,” ani Robles.

“Before the end of the year, we will know how [much] excess Canada will have. I am really watching with an eagle eye on the prospect of getting some excess directly from Canada.”

Ang United States of America (USA), na kalapit na bansa ng Canada, ay isinama na ang Pilipinas sa listahan ng mga bansang makatatanggap ng bahagi ng kanilang donasyong milyong doses ng COVID-19 vaccines, kung saan nai-pledge ito ni US President Joe Biden nito lamang buwan.

Noong nakaraang linggo, binanggit naman ni Manila Ambassador to Washington Jose Manuel Romualdez na nasa 800,000 hanggang 1 milyong doses ng COVID-19 vaccines ang maide-deliver sa Pilipinas sa susunod na buwan.

Samantala, naitanong ni Robles sa Medicago, isang Canadian biopharmaceutical company, ang tungkol sa pagkakaroon ng isang vaccine manufacturing plant sa Pilipinas.

“I offered our pharmaceutical ecozone in Bulacan, I think and I gave them all the perks of having manufacturing [operations] in the Philippines like free taxes, free capital importations and the like,” sabi ni Robles.

Aniya pa, inaasahan niya na ang negosasyon ay agarang magpapatuloy kapag ang non-disclosure agreement na nais ng Medicago ay pinirmahan na ng gobyerno. Ang Medicago ay kasalukuyang nagde-develop ng isang plant-based COVID-19 vaccine.

1-M COVID-19 vaccines, donasyon ng US sa ‘Pinas

ni Lolet Abania | June 22, 2021

Magpapadala ang United States sa Pilipinas sa susunod na buwan ng 800,000 hanggang 1 milyong COVID-19 vaccine doses. Ayon kay Philippine Ambassador to the US Manuel “Babe” Romualdez ngayong Martes, inianunsiyo kamakailan ng US ang plano nitong magpamahagi sa buong mundo ng 80 million surplus jabs.

“Doon sa 80 million na ‘yun, we are going to get something close to 800 [thousand] to 1 million doses, either Moderna or AstraZeneca from their stockpile, which is expected to be given to us by next month,” ani Romualdez sa Malacañang press briefing.

Sinabi ni Romualdez, mabebenepisyuhan din ang Pilipinas mula sa pangako ng US para sa bibilhin at donasyong bakuna sa mga low-income countries ng tinatayang 500 milyong COVID-19 jabs. “We’re getting quite a substantial amount of doses of vaccines coming from the United States,” ayon pa rito.

Dagdag din ng ambassador, ang Manila ay nakapag-reserve ng 50 milyong booster shots mula sa US firm na Moderna para sa susunod na taon.

“We’re in good shape as far as our vaccines are concerned,” sabi pa ni Romualdez.

Kulang sa supply… 15K na bakuna lang kada probinsiya — Galvez

ni Lolet Abania | June 22, 2021

Aabot lamang sa 15,000 hanggang 20,000 doses ng COVID-19 vaccines ang maipapamahagi sa bawat probinsiya sa labas ng Metro Manila sa gitna ng paghahanap ng bansa na makakuha ng maraming supply ng bakuna, ayon kay Vaccine Czar Carlito Galvez, Jr..

“Kaunting pasensiya lang sa probinsiya kasi kapag pinaghati-hati natin ang probinsiya, majority po, nagkaroon lang ng 15,000 to 20,000 ang pinakamalaki,” sabi ni Galvez sa weekly Talk to the Nation ni Pangulong Rodrigo Duterte kagabi.

“If we have 81 provinces kasama po ang NCR, talagang ang pinakamalaking makukuha ng isang probinsiya is only 15K to 20,000. Kaya madi-dilute natin ang vaccines. Ang magkaka-surge, ‘yun ang babatuhan ng malalaking volumes ng vaccines,” dagdag niya.

Ayon kay Galvez, ang China firm na Sinovac ay magbibigay sa bansa ng tinatayang 5.5 milyong doses ng COVID-19 vaccines sa July, kung saan may karagdagang 1 milyon mula sa orihinal na 4.5 milyong doses.

Paliwanag ni Galvez, pinag-iisipan ng vaccine manufacturer na makumpleto ang 20.5 milyong doses delivery sa September sa halip na sa November. Ibig sabihin nito aniya, nasa 5 hanggang 6 milyon doses ng bakuna ang kanilang ipapadala kada buwan sa Pilipinas. Ang mga doses na ito ang tugon sa kulang na mga bakuna na ide-deliver sa mga probinsiya.