top of page
BULGARY - SEN. ROBIN, MAY P150 M AMBAG SA PHIL. FILM HERITAGE, BUILDING ‘DI PA RIN NATAPOS
Search

Panukalang buksan ang klase paglagpas ng Agosto, pasado na sa Senado

  • Kuya Win Gatchalian

Aprubado na sa pangatlo at panghuling pagbasa ang ating panukala sa Senado na naglalayong buksan ang klase paglagpas ng Agosto.

Nagpapasalamat tayo sa tulong ng ating mga kapwa mambabatas na ating katuwang sa pagpapasa ng Senate Bill (SB) No. 1541, kung saan ang inyong lingkod ay co-author at sponsor.

Ang naturang panukala ay nag-aamyenda sa Section 3 ng Republic Act (RA) No. 7797 o ang “Act to Lengthen the School Calendar from 200 Days to Not More Than 220 Class Days” kung saan puwedeng iurong ang pagbubukas ng klase mula unang lunes ng Hunyo hanggang sa pinakahuling araw ng Agosto kapag may kalamidad o ‘pag nasa state of emergency ang bansa.

Kapag tuluyan nang naging batas ang SB 1541, inaasahang magbubukas ang klase paglagpas na ng Agosto. Binibigyan nito ng kapangyarihan ang Pangulo ng bansa na magtakda ng petsa sa pamamagitan ng rekomendasyon mula sa Department of Education (DepEd).

Kaya para sa School Year 2020-2021, maaari itong maging Setyembre o lagpas pa. Sakop ng mandatong ito ang lahat ng mga basic education institutions, kabilang na ang mga international schools.

Alang-alang sa kaligtasan at kapakanan ng mga mag-aaral, guro at non-teaching personnel, nakadepende ang desisyon sa kalagayan ng ating bansa sa laban sa kasalukuyang pandemya — kung patuloy pang umakyat ang bilang ng kaso ng COVID-19.

Mahalaga ang pagpasok sa eskuwelahan ng mga bata, ngunit higit na mahalaga ang kanilang kaligtasan at kalusugan. Kaya bigyan natin ng pagpapasya ang Pangulo ng Pilipinas at ang Kalihim ng Edukasyon para baguhin ang petsa ng pasukan sa panahon ng pandemya habang walang kasiguraduhan sa kaligtasan at kalusugan ng kabataang Pilipino.

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City o mag-email sa surewin.bulgar@gmail.com

 
 

Pagbabalik-eskuwela sa kabila ng banta ng COVID-19, kailangan nang masinsinang dayalogo mula sa mga

  • Kuya Win Gatchalian

Isa sa mahahalagang paghahanda bago magsimula ang klase ngayong taon ay ang koordinasyon at dayalogo sa hanay ng mga magulang at mga guro kaugnay ng mga polisiya at patakaran sa pagbabalik-eskuwela sa gitna ng banta ng COVID-19.

Bilang Chairman ng Committee on Basic Education, Arts and Culture sa Senado, hinihimok natin ang Department of Education (DepEd) na makipag-ugnayan sa mga parent-teachers associations o PTA para sa mas malinaw na pagpapatupad ng Learning Continuity Plan o LCP sa darating na pasukan.

Ang pakikipag-ugnayang ito ay dapat base sa mga health protocol para makaiwas sa COVID-19, tulad na lamang ng pagpapatupad ng social distancing. Dapat maging klaro sa ating mga guro at mga magulang ang minimum health standards at iba pang mga hakbang upang mapanatiling ligtas ang pagbubukas ng klase.

Ngayong panahon ng enrollment, importanteng katuwang ang mga magulang at guro upang maiwasan ang pag-akyat ng bilang ng mga drop-out. May ilang mga magulang kasi na takot papasukin ang kanilang mga anak habang hindi pa nadidiskubre ang bakuna. Nais ng iba sa kanila na ipagpaliban muna ang pag-aaral ng kanilang mga anak ngayong taon dahil sa pangambang baka mahawaan sila ng virus.

Bukod dito, makakatulong din ang mga PTA sa paghahanda ng mga guro at mga magulang sa paggamit ng mga alternatibong paaraan ng pagtuturo kabilang na ang online distance learning at paggamit ng radyo at telebisyon.

Nais nating paalalahanan ang mga magulang, mga guardian at mga guro na maaari silang makaranas ng stress kung hindi sila lubos na magiging handa sa mga pagbabago sa pagbubukas ng klase dahil ‘pag nagkataon, ang pagkakatuto ng mga mag-aaral ang lubos na maaapektuhan kung hindi naging sapat ang paghahanda ng mga guro at magulang sa aspetong pang katawan o pisikal, pang-kaisipan at pang-emosyonal.

Batay sa Back-To-School Guide ng United Nations Children’s Fund (UNICEF), isa sa mga benepisyo ng pagiging katuwang ng PTA ay ang pagtulong sa pagkalap ng datos at pagtiyak na ang mga nangangailangang mag-aaral ay patuloy na makakapag-aral.

Sa kaso ng bansang Iraq halimbawa, naging mahalaga ang papel ng PTA sa mga paaralan nila dahil natutukoy at natutugunan nito ang anumang mga hadlang sa pagbabalik-eskuwela ng mga bata.

Kabilang din sa mungkahi ng UNICEF ang patatagin ang kahandaan ng mga PTA sa panahon ng mga sakuna, pati na rin sa pagpapatupad ng mga programang pang-kalinisan at pang-kalusugan. Bukod dito, ang mga PTA ay maaari ring maging katuwang sa pagsasanay ng mga magulang sa pagbibigay ng psychosocial support sa kanilang mga anak.

Nakasalalay sa ating mga magulang at mga guro ang mabisang pagpapatuloy ng edukasyon sa kabila ng patuloy na banta ng pandemya. Bago pa muling buksan ang mga klase, dapat ngayon pa lamang ay makipag-ugnayan na ang DepEd sa PTAs ng mga paaralan upang mabigyang linaw ang anumang tanong o pangamba ng ating mga magulang at mga guro.

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City o mag-email sa surewin.bulgar@gmail.com

 
 

National Academy of Sports, pasado na sa Kongreso

  • Kuya Win Gatchalian

Masaya tayong ibalita na naratipikahan na ang bicameral conference committee report ng ating panukala sa Senado na magtaguyod ng National Academy of Sports.

Malaking tulong ang programang ito sa pagkilala at paghulma ng ating mga mahuhusay at maabilidad na mga mag-aaral, lalo na ang mga batang nagpapakita ng potensiyal sa larangan ng sports.

Sa pamamagitan ng National Academy of Sports, maiimplementa ang de-kalidad at mas pinalakas na educational sports program sa high school kung saan magkakaroon na ng espesyal na kurikulum para sa sports. Nakasentro ang kurikulum sa mga pangangailangan ng mga estudyante para sa kanilang mga ensayo. Siyempre, kasabay pa rin dapat nito ang pagbibigay ng de-kalidad na edukasyon maging sa kanilang akademiks.

Kapag napirmahan na ito ng Pangulo at ganap nang maisabatas, isusulong nito ang iba’t ibang mga sports programs, intramurals, league competitions at amateur sports, maging ang mga pagsasanay para sa mga kompetisyon sa ibang bansa. Sa pagkakataong ito ay matututukan ang kanilang disiplina sa sarili, teamwork at maging ang pagiging makabayan.

Bukod dito, bibigyan ng kahalagahan at prayoridad ng National Academy of Sports ang mga hakbang kung paano makakamit ng mga estudyanteng atleta ang magandang academic performance habang inihahanda ang kanilang mga sarili para sa pangarap na propesyon kapag sila ay nagsipagtapos na.

Pangangasiwaan ng Department of Education (DepEd) sa tulong ng Philippine Sports Commission (PSC) ang National Academy of Sports.

Sa New Clark City Sports Complex sa Capas, Tarlac planong ipatayo ang main campus ng National Academy of Sports kung saan ang Bases Conversion and Development Authority (BCDA) ang mamamahala sa pagtatayo nito.

Lubos na nagpapasalamat ang inyong lingkod sa ating mga kapwa mambabatas—sina Sen. Sonny Angara, Sen. Christopher “Bong” Go at Sen. Pia Cayetano—na kasama nating nagtrabaho at nagpursige para maipasa sa Kongreso ang National Academy of Sports. Sa wakas, matutulungan na natin ang ating mga world-class Filipino student-athletes na magtagumpay at maabot ang kanilang mga pangarap.

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City o mag-email sa surewin.bulgar@gmail.com

 
 
RECOMMENDED
bottom of page