Iba’t ibang problema sa ari na dapat malaman ng kalalakihan

Dr. Shane M. Ludovice, M.D / Sabi ni Doc

Dear Doc Shane,

Ako ay may diabetes at may napapansin akong kakaiba sa aking ari. Nais kong malaman kung may kaugnayan ba ito sa pagiging diabetic ko? - Edwin

Sagot

Ayon sa eksperto, nasa 50% hanggang 80% ng kalalakihan ang nagkakaroon ng problema sa kanilang prostate oras na tumuntong ito sa edad 40.

Ang prostate ang responsable sa pagpo-produce ng enzyme na nakatutulong sa paggalaw ng sperm.

Naaapektuhan nito ang pag-ihi ng indibidwal na maaaring nakakaistorbo na sa kanyang pang-araw-araw na gawain, maging sa kanyang pagtulog.

Dahil dito, isyu na rin sa kalalakihan ang kawalan ng libido o gana sa pakikipagtalik dahil nawawala maging ang istamina at kumpiyansa sa sarili.

Nasa 66% ng kalalakihan na may problema sa prostate ay nakararanas ng erectile dysfunction.

Paliwanag pa na ilan sa iba pang sanhi nito ay mga sakit na sumisira sa ugat ng indibidwal tulad ng diabetes, hypertension at iba pang sakit sa puso dahil naaapektuhan nito ang pagtigas ng ari ng lalaki.

Magamot man ito, nasa 1/3 o 33% lang nila ang nasosolusyunan ang problema sa pakikipagtalik.

Problema rin ng kalalakihan ang premature ejaculation kung saan sa pakikipagtalik ay maagang nilalabasan ang lalaki kahit hindi pa niya gusto.

Dahil dito, nawawalan ng satisfaction ang lalaki lalo na sa pakikipagtalik.

Isyu rin sa kalalakihan ang impotence o pagkabaog.

Samantala, kung may menopause ang kababaihan, nakararanas naman ng andropause ang kalalakahian.

Ang andropause ay ang pagbaba ng produksiyon ng testosterone sa lalaki na nakababawas sa kanilang sigla sa buhay-pakikipagtalik.

Subalit, hindi naman ito pinagdadaanan ng lahat ng lalaki.

Kung may kakaiba kayong nararamdaman o nararanasan sa inyong ari, huwag mag-atubiling magpakonsulta sa espesyalista (urologist) nang sa gayun ay malaman ang sanhi ng nararamdaman at mabigyang-lunas kung kinakailangan.

Napakasakit na puson ‘pag may buwanang dalaw, ‘wag dedmahin!

Dr. Shane M. Ludovice, M.D / Sabi ni Doc

Dear Doc. Shane,

Ako ay 27 years old at isang kasambahay. Mayroon akong kinakasama at 2 years na kami pero hindi pa rin kami nagkakaanak. Sa tuwing nagkakaroon ako ng menstruation ay napakasakit ng aking puson hanggang sa balakang ay kumikirot. May kaugnayan ba ito sa hindi ko pagkakaroon ng anak? Ano ang dapat kong gawin? – Gilda

Sagot

Ang nararamdaman mo na sobrang pananakit ng puson tuwing ikaw ay nagkakaregla ay maaaring sintomas ng endometriosis o polycystic ovary syndrome (PCOS).

Ang endometriosis ay isang uri ng sakit kung saan hindi lumalabas lahat ng regla at sa halip ay naiipon sa loob ng katawan. Ito ay nagdudulot ng pamamaga sa tuwing magkakaroon ng buwanang dalaw at sa kalaunan ay posibleng mauwi sa pagkakaroon ng bukol.

Ayon sa mga eksperto, ito ay maaaring maging sanhi ng infertility o hindi pagkakaroon ng anak.

Isa sa mga sintomas nito ay ang masakit na pagreregla at wala pang lunas ang naturang sakit kaya upang hindi ito lumala, dapat magpatingin agad sa doktor lalo na kung madalas na sumasakit ang puson kapag nagreregla.

Isa pang problema ng kababaihan na hindi rin masyadong pinapansin ay ang PCOS.

Ayon sa mga OB Gyne, hindi madaling malaman kung PCOS ang sakit dahil magkakaiba ang sintomas nito, tulad ng pagkakaroon ng irregular o hindi buwanang regla, pagkakaroon ng taghiyawat at pagtubo ng buhok sa mga parte ng katawan tulad ng manipis na bigote.

Kaya mainam na magpatingin agad sa espesyalista kung hindi regular ang regla nang sa gayun ay hindi na lumala kung mayroon mang PCOS.

Maraming dahilan kung bakit nagkakaroon ng endometriosis at PCOS ang babae.

Maiiwasan ang pagkakaroon ng ganitong mga sakit kung tama ang diet at lifestyle.

Mga babaeng may PCOS, delikado sa stroke, atake sa puso at kanser sa matris

Dr. Shane M. Ludovice, M.D / Sabi ni Doc

Dear Doc. Shane, Ako ay 37 years old at may asawa pero hanggang ngayon ay hindi pa rin kami nagkakaanak. Meron akong PCOS pero hindi na ulit ako bumalik sa doktor para makapagpa-check-up. May posibilidad ba na mabuntis ako dahil may nakapagsabi sa akin na hindi raw nagagamot ang PCOS? - Jeya

Sagot Ang Polycystic Ovary Syndrome (PCOS) ang pinakamadalas na hormonal disorder sa kababaihan.

Narito ang ilan sa mga sintomas na nararanasan ng mga babaeng may PCOS:

• Hindi regular o paghinto ng regla.

• Hindi mabuntis o magkaanak.

• Pagtaba — karaniwan na lumalapad ang waistline o ang tinatawag na abdominal obesity kung saan mas maraming taba sa may baywang, pero puwede ring magkaroon ng PCOS ang babaeng payat o normal ang timbang.

• Pagkakaroon ng maraming taghiyawat (acne).

• Sobrang buhok sa mukha o katawan — karaniwan sa mga parte na kadalasang walang buhok ang babae tulad ng sa ibabaw ng labi na parang bigote o sa dibdib.

• Pagnipis ng buhok (tulad ng pagkalbo sa mga lalaki).

Tinawag ang kondisyong ito na polycystic dahil karaniwang may mga cyst ang obaryo ng mga babaeng may PCOS pero hindi kanser ang mga ito.

Marami sa mga kababaihang may PCOS ay inire-refer sa endocrinologist dahil may kaakibat itong ibang mga problemang pangkalusugan tulad ng mga sumusunod:

• Insulin resistance — nahihirapang matunaw ang asukal sa dugo kapag may insulin resistance. Ito ay maaaring tumuloy sa Type 2 diabetes.

• Mababang level ng HDL o good cholesterol at mataas na level ng LDL o bad cholesterol. Mataas din ang triglycerides. Dahil dito, tumataas ang peligro ng mga babaeng may PCOS na magkaroon ng atake sa puso o stroke.

• Obstructive sleep apnea (OSA). Ang mga babaeng may PCOS at overweight ay maaaring magkaroon ng OSA kung saan patigil-tigil ang paghinga habang natutulog. Kaya may mga pagkakataong paggising nila ay parang pagod na pagod pa rin dahil hindi maganda ang kalidad ng pagtulog dahil bumababa ang oxygen sa dugo habang natutulog at naiipon naman ang carbon dioxide.

• Dahil irregular ang regla, puwedeng kumapal ang lining ng matris. Huwag itong pabayaan para hindi mauwi sa endometrial cancer o kanser sa lining sa matris.

Wala pang gamot para gumaling o mawala ang PCOS, pero may mga inireresetang gamot ang doktor para maging maayos ang regla at mabuntis.

Gayundin, kailangan ng tamang pagkain at ehersisyo para pumayat at maiwasan ang diabetes at maging normal ang level ng kolesterol.