Ka Ambo / Bistado
Samu't sari ang problema ngayon ng gobyerno.
Nakumpirma kasi ang local transmission ng COVID-19!
◘◘◘
Inaakala ng marami na dahil walang ulat ng bilang ng pasyenteng may COVID-19 sa Pilipinas ay talagang hindi nakapasok ang virus sa ating bansa.
Maaaring itinatago lang ang ulat, o mahina ang pasilidad sa bansa!
◘◘◘
Sa Indonesia ay walang ulat na nakapasok ang COVID-19, pero ayon sa mga eksperto — dedma lang ang gobyerno at walang laboratory test na isinasagawa.
Ibig sabihin, ang COVID-19 ay itinuturing na ordinaryong trangkaso lang sa Indonesia — kaya walang kaso!
◘◘◘
Hindi na isyu ngayon kung ang pasyente ay nagmula sa Wuhan, China. Sa aktuwal, karaniwang nahahawa ng sakit — ay hindi bumiyahe sa China. Ibig sabihin, ang COVID-19 ay nakakalat na sa buong mundo at aktuwal nang may local transmission sa iba’t ibang bansa kasama ang Pilipinas.
‘Yan ang istorya!
◘◘◘
Naglunsad ang 40-miyembro ng Political Officers League of the Philippines (POLPhil) ng National Planning Workshop sa SBMA, Zambales.
Pinamunuan ito ni MMDA Chairman Danny Lim at founding president na si Vice-Mayor Aljun Diamante!
◘◘◘
Naglatag ang POLPhil ng strategic plan for Philippine Development sa isang workshop na may temang “Navigating Adversity Through Unity and Strategic Partnerships”. Binuksan ang workshop kamakalawa, Marso 6 at magtatapos ngayong Marso 8 sa White Rock Beach Resort sa Subic Bay. Congrats po!
◘◘◘
Sa totoo lang, dapat makatuwang ni P-Digong ang mga batikang political officers upang mamulat ang mamamayan sa napapanahong ideolohiya na dapat yakapin ng ating bansa.
Walang matinong pagbabago sa alinmang bansa nang walang ideolohiya!
◘◘◘
Mahalagang maunawaan ng lahat kung ano ang kahulugan ng ideolohiya.
Marami ang dakdak nang dakdak pero hindi nauunawaan ang ideolohiya at kung ano ang papel nito sa marahas na pagbabago sa lipunan!
◘◘◘
Nalipasan ng panahon ang mga umiiral na ideolohiya at natuklasan — walang perpekto sa mga ito.
Ang kabulukan ng gobyerno sa iba’t ibang bansa ay ebidensiya na bigo ang demokratikong gobyerno at maging ang komunismo o sosyalismo na proteksiyunan ang nakararaming mamamayan!
◘◘◘
Ang ideolohiya na umiiral ay ginagamit lamang na kasangkapan ng mga lider upang makontrol ang gobyerno at buong mundo para sa kapakanan at benepisyo ng iilang bilyonaryo.
Hanggang ngayon, busabos pa rin ang mayorya ng populasyon sa buong daigdig dahil sa lipas nang ideolohiyang niyayakap sa iba’t ibang sulok ng daigdig!