Pag-unlad ng 'Pinas, bumagal

ni Angela Fernando @Business News | Nov. 7, 2024

Photo: FP / TG

Umunlad ng 5.2% ang ekonomiya ng 'Pinas sa ikatlong quarter ng taon, mas mabagal kumpara sa naitalang 6.4% paglago nu'ng nakaraang quarter, ayon sa Philippine Statistics Authority (PSA) nitong Huwebes.

Ang mabagal na pag-usad ng Gross Domestic Product (GDP) ay dulot ng mga pagkaantala sa iba’t ibang sektor dahil sa mga kalamidad na dumaan sa bansa.

Ibig sabihin, ang growth rate na ito ay mas mababa rin sa target ng pamahalaan na 6 hanggang 7% para sa 2024, at ito ang pinakamababang naitalang pag-unlad mula sa 4.3% nu'ng ikalawang quarter ng nakaraang taon (2023).

Ayon kay National Economic and Development Authority (NEDA) Secretary Arsenio Balisacan, kailangan pang umangat ang ekonomiya ng 6.5% o higit pa sa huling quarter ng taon upang maabot ang target na paglago ng administrasyong Marcos.

Inflation rate ng 'Pinas, lumobo sa 2.3% nu'ng Oktubre

ni Angela Fernando @Business News | Nov. 5, 2024

Photo: Stock Market

Lumobo ang headline inflation nu'ng Oktubre ngayong taon dahil sa mas mataas na presyo ng pagkain, mga non-alcoholic na inumin, at transportasyon, ayon sa Philippine Statistics Authority (PSA) nitong Martes.

Batay sa paunang datos ng ahensya, tumaas ng 2.3% ang consumer price index (CPI) nu'ng Oktubre, mula sa 1.9% nu'ng Setyembre.

Gayunman, mas mabagal pa rin ang kasalukuyang antas ng inflation kumpara sa 4.9% na naitala nu'ng nakaraang taon (2023).

Pasok naman ang nasabing inflation rate sa 2 hanggang 2.8% forecast ng Bangko Sentral ng Pilipinas (BSP).

Snapchat, nalampasan ang inaasahang kita at paglobo ng users

ni Angela Fernando @Business Tech | Oct. 30, 2024

Photo: Snap Inc. - Justin Lane - EPA / Circulated

Nalampasan ng kumpanyang Snap ang inaasahan ng Wall Street na kita at paglobo ng mga users nito kamakailan, matapos makabalik ang ilang mga advertiser sa tulong ng mga tampok sa ads.

Ipinaalam din ng kumpanya ng Snapchat messaging app, na kanila muling bibilhin ang shares na aabot sa $500-milyon.

Bagamat bumagsak ng 8% ang stocks ng Snap sa after-market trading, agad itong nakabawi at naabot ang 10% na pagtaas.

Matatandaang malaki man ang kinikita ng Snap mula sa digital advertising, nahaharap pa rin ito sa mga dambuhalang kakumpitensya tulad ng Meta Platforms, na nagmamay-ari ng mga kilalang applications na Facebook at Instagram.

Gayunman, tinugunan ito ng Snap at namuhunan sa machine learning upang mapabuti ang ad targeting nito at gawing mas madali para sa maliliit at hindi kalakihang mga negosyo na mag-advertise gamit ang Snapchat.