Bukod sa ‘PM is key’ — DTI Online seller na dagdag-presyo, isumbong

Binalaan ng Department of Trade and Industry (DTI) ang mga online seller na pagmumultahin o makukulong kung patuloy na iisnabin ang polisiya ng gobyerno patungkol sa paglalagay ng price tag sa kanilang mga itinitindang produkto.

Diin ni Trade Secretary Ramon Lopez, obligado ang online sellers na maglagay ng price tag na layong proteksyunan ang mga konsyumer laban sa panloloko.

"Required po ' price tag doon sa mga items na 'yon. Kaya ho hindi uubra ‘yung walang presyong ilalagay" ani Lopez.

Sinabi ni Lopez na mahigpit ang batas patungkol sa price tag policy at kung hindi ito masusunod ng mga seller ay wala silang karapatan na magtinda.

Kasabay nito, inihayag ng kalihim na nakikipag-ugnayan na sila sa National Bureau of Investigation (NBI) para tukuyin ang mga lumalabag na online sellers.

Ikinatwiran naman ng ilang online sellers na ang hindi paglalagay ng price tag ay bahagi ng kanilang marketing strategy.

"Sa mga matitigas ang ulo, lalo na sa hindi paglagay ng price tag sa mga prime commodity, ay may multa po 'yun at maaari kayong makulong" babala ni Lopez.

Inabisuhan naman ni Lopez ang mga konsyumer na magsumbong sa hotline 1384 para matunton ang mga pasaway na online sellers.

"Dapat magsumbong kayo upang matunton at mapuntahan natin 'yung mga ayaw sumunod. Price tags also indicates the authenticity and quality of the product. Kung ano "yung specifications na sinasabi sa tag, dapat 'yun din ang dapat ibigay sa customers. 'Pag 'di nasunod, itatawag nila sa 1384," dagdag pa nito.

Nasasaad sa Article 95 ng Republic Act 7394 o ang Consumer Act of the Philippines ang parusang pagmumulta ng P200 hanggang P5,000 o pagkakakulong ng isa hanggang anim na buwan o pareho para sa unang paglabag.

Kung uulitin ang paglabag ay mahaharap na sa pagkansela ng business permit at license to operate.

Mga magbubukas na negosyo, sumunod sa health protocols — DTI

Pinaalalahanan ni Trade and Industry Secretary Ramon Lopez ang mga negosyo na magbubukas ngayong araw, Hunyo 7 na mahigpit na sundin ang health protocols sa ilalim ng general community quarantine (GCQ).

Sinabi ni Lopez na kailangang ipairal ang health protocols sa mga barbershops at dine-in restaurants.

"So, papagamit natin iyong SafePass na technology app at saka iyong StaySafe na technology app para din sa contact tracing ng mga customers. So, maganda ang ano — feeling safe po sila," ayon kay Lopez.

Dapat may mga disinfectants at hand sanitizers ang mga barbershops habang dapat nakasuot ang mga empleyado nito ng personal protective equipment kabilang na ang masks, face shields at gloves.

"Sa GCQ tulad ng Metro Manila, starting tomorrow, June 7, magbubukas na po ang mga barbershops, salons at bago ho sila magbukas ni-require po natin na sundin nila iyong health protocol na inisyu natin two weeks ago para maka-prepare po sila sa pagbubukas," wika ni Lopez sa Laging Handa briefing.

"Ito ho iyong mga pag-iingat ng mga equipment, sanitation, acrylic divider, iyong paggamit ng mga sterilizer para sa mga kagamitan nila, etc. So, ito ho ay ipai-implement na natin para makapag-open na; at saka ang puwedeng i-open 30% capacity nila sa mga barbershop and salon," ani Lopez.

Para naman sa mga dine-in restaurants na maaari nang mag-operate ng 50% capacity, dapat mayroon silang foot baths, temperature scanners at dapat may divider ang mga cashier para sa mga magbabayad at ipatupad ang physical distancing.

"Tapos sa mga restaurants naman, iyong dine-in puwede na siya pero doon sa mga modified GCQ areas. Pero marami na rin iyan, mga over 60 provinces and cities na in-allow na ang — well, modified GCQ na sila and therefore allowed na rin itong mga dine-in," sabi ng Kalihim.

"So, MGCQ allowed na ang dine-in up to 50% capacity, so iyong mga mahihigpit na guidelines diyan iyong sa pag-enter pa lang, sa pagpasok pa lang ng establishment mayroon din silang temperature scanning, na kinukuha rin iyong temperature pati iyong may—kung outdoor po ito ay may footbath pa para iyong sa apakan ma-sanitize. Tapos iyong mga cashier ay usually may acrylic divider o kaya ay enough protection iyong mga cashier," pahayag ni Lopez.

"Iyong sa pagbayad as much as possible using din iyong mga non-cash na paraan tulad ng either debit card, credit card o kaya iyong sa technology ng Dreamtech, iyong QR code. Kung hindi naman, kung cash naman ay puwede rin pero ilalagay sa tray at ibibigay, hindi po diretso iaabot," sabi ng opisyal.

"Tapos sa mga dining area ito iyong may mga tables and chairs na hindi ipagagamit para may enough space sa pagitan ng mga dalawang customers. So, iyon iyong mga example ho iyon. In some cases para mas maraming occupancy, makaya iyong let’s say 50% ay maglalagay din ng mga divider bawat table kung saan kinakailangan para let’s say, gusto nilang masagad iyong 50% na allowed, gagawin din nila iyon," saad pa ng Kalihim.

Bukod dito, hinikayat ni Lopez ang mga establisimiyento na gumamit ng technology app para makatulong sa contact tracing at pag-assess ng mga customer kung sila ba ay pasado rin sa kanilang health condition.

Sipag at tiyaga lang, ganern! Alamin: 5 negosyong mabenta ngayong lockdown

Maraming nawalan ng hanapbuhay ngayong may COVID-19 pandemic. At dahil hindi puwedeng umasa lang sa ayuda ng gobyerno, marami na sa atin ang sumubok ng iba’t ibang klase ng negosyo.

Well, magandang paraan ito hindi lang para kumita ngayong pandemya kundi para mapag-aralan kung saang business dapat mag-invest na swak sa iyong resources.

Kaya naman, narito ang ilang negosyo na patok ngayong may pandemic:

1. DELIVERY SERVICES. Sa panahon ngayong marami ang ayaw nang lumabas ng bahay, ito ang takbuhan natin. Kung mayroon kayong sasakyan o motorsiklo na puwedeng gamitin sa pagde-deliber, oks itong subukan. Patok ngayon ang online selling kung saan via delivery ang kadalasang ginagamit ng mga sellers, kaya for sure, ‘di ka lugi rito.

2. FOOD. Isa sa pinakamabentang produkto online ang pagkain. Puwedeng pastry, ulam, meryenda at marami pang iba. Kung gusto mong pagkakitaan ang iyong hobby na pagluluto, try n’yo ito dahil for sure, papatok ito basta alam mo kung ano at sino ang target market mo.

3. GROCERY. Kung medyo malaki ang puhunan mo, puwede kang mag-invest sa mini-grocery. Sa panahon kasi ngayon, kailangang maglaan ng maraming oras para makapag-grocery, kaya para hassle-free, mas gugustuhin nilang pumunta sa mini-grocery. Hindi kailangang maging bongga dahil basta meron kang ibebentang basic necessities tulad ng pagkain, toiletries at iba pang pangunahing pangangailangan, oks ka na.

4. CLEANING MATERIALS. Dahil level up sa paglilinis ang mga Pinoy ngayong may pandemic, oks din itong gawing pagkakitaan. Isa pang tip, bago ibenta, subukang gamitin ang mga produkto para maibahagi sa iyong potential clients ang performance ng mga ibinebenta mo. Sa ganitong paraan, mas madali kang kikita dahil may feedback silang makukuha mula sa mismong seller.

5. MEDICAL SUPPLIES. Mask, gloves at face shields – ilan sa mga ito ang in-demand ngayon dahil ginagamit itong proteksiyon para makaiwas saa COVID-19. Kailangan mo lang makahanap ng mapagkakatiwalaang supplier para makakuha ng magaganda at sulit na presyo ng suplay. Kapag nakabenta, puwede ka nang maghanap ng resellers nang sa gayun ay maging mabilis ang pagpasok sa iyo ng pera. Pero ingat sa mga scammer na supplier at resellers, ha?

Hindi lahat ng negosyo ay kailangan ng malaking kapital para masimulan. Minsan, kailangan lang ng sipag at tiyaga, gayundin, gamitin nang tama kung ano ang meron tayo.

Kaya para sa mga beshies natin na willing sumabak sa pagne-negosyo para magkaroon ng kita habang may pandemya, try n’yo na ang mga ito. Keep safe, ka-BULGAR!