244 dayuhan, tiklo sa POGO

ni Mervin Reyes @News | October 5, 2026

Photo: 244 dayuhan sa POGO, huli - BI

Aabot sa 244 dayuhan, karamihan ay Chinese nationals, ang inaresto ng Bureau of Immigration (BI) sa magkahiwalay na operasyon laban sa hinihinalang ilegal na POGO activities sa Zamboanga Sibugay.

Isinagawa ang operasyon noong Oktubre 2 sa Brgy. Kimos, Siay at Brgy. Tandiong Muslim, Alicia, katuwang ang National Bureau of Investigation (NBI) at Armed Forces of the Philippines (AFP).

Ayon sa BI, 113 dayuhan ang nahuli sa Siay at 131 sa Alicia. Iniimbestigahan sila dahil sa umano’y pagtatrabaho nang walang kaukulang visa, pagiging undocumented, ilegal na pagpasok sa bansa at pagkakasangkot sa ilegal na online activities na iniuugnay sa POGO.

Narekober din sa operasyon ang 78 computer monitors, humigit-kumulang 3,000 cellphone, laptops at SIM cards na pinaniniwalaang ginagamit sa online scams.

Patuloy ang imbestigasyon, kabilang ang posibleng human trafficking violations, habang maaaring isailalim sa deportation proceedings ang mga nahuling dayuhan.

Biktima ng human trafficking, naharang sa NAIA

ni Gina Plenago @News | September 17, 2026

Photo: File

Nailigtas sa Ninoy Aquino International Airport Terminal 1 ang isang biktima ng human trafficking sa pamamagitan ng coordinated efforts ng Inter-Agency Council Against Trafficking Task Force.

Nakipag-ugnayan ang Bureau of Immigration Protection and Border Enforcement Section matapos ang ibinigay na impormasyon ng mga tauhan ng National Bureau of Investigation.

Ayon sa immigration, ang pasaherong si “Inah,” 35, ay na-recruit online para sa isang phone operator position sa isang casino sa Myanmar-Thailand border, na may ipinangakong buwanang suweldo na P50,000. Nai-book ang biktima na maglakbay sa Thailand bilang isang turista.

Ang kanyang contact, na si "Miss A," ay sinasabing isang empleyado ng human resources ng kumpanya.

Limang indibidwal, kabilang ang mga tauhan ng BI, ang iniimbestigahan upang matukoy kung may mga paglabag o pagkakasangkot sa umano'y trafficking o illegal recruitment scheme.

Pinuri ni BI Commissioner Joel Anthony M. Viado ang mga miyembro ng IACAT Task Force at binigyang-diin na patuloy na susuportahan ng Bureau ang mga pagsisikap na pigilan ang trafficking at protektahan ang mga biktima.

4 puganteng Hapon, deported na — BI

ni Angela Fernando @News | Nov. 18, 2024

• 

Photo: Bureau of Immigration, Republic of the Philippines

Ipinatapon ng Bureau of Immigration (BI) nitong Lunes ang apat na puganteng Hapon na wanted sa Japan at may mga arrest warrant na dahil sa pagkakasangkot sa pandaraya at pagnanakaw.

Kinilala ang mga Hapong sina Ueda Koji, Kiyohara Jun, Suzuki Keiji, at Sawada Masaya.

Ayon sa BI, ang deportation ay isinagawa matapos matiyak na tapos na ang lahat ng legal na proseso sa 'Pinas—bahagi ang hakbang na ito ng patuloy na kooperasyon ng dalawang bansa laban sa mga krimen sa pagitan ng Japan at Pilipinas.

Kinumpirma naman ng BI na ang apat ay lumabag sa Philippine Immigration Act dahil sa overstaying at pagiging "undesirable aliens."