₱40 B dagdag-budget, para sa agrikultura

ni Eli San Miguel - Trainee @News | October 16, 2023

Sinabi ng National Irrigation Administration (NIA) noong Lunes na ang karagdagang P40 bilyon na inilagay ng mga mambabatas sa badyet ng ahensya para sa taong 2024 ay makakapagbigay pa ng irigasyon sa karagdagang 57,000 ektarya ng lupang sakahan.

Ayon kay NIA Administrator Eduardo Guillen, inaasahan na ang mga palayan na ito ay makakapagdagdag pa ng 570,000 metriko toneladang palay bawat taon.

"And if computed conservatively at P19 per kilo, it can generate P10.83 billion per year, with a payback period of four years or less,” ani Guillen sa isang press release.

Ipinagkaloob ng House of Representatives ang karagdagang P40 bilyon sa NIA matapos na mabawasan ng Department of Budget and Management ang kanilang unang hiningi na P132 bilyon na badyet para sa taong 2024, na ibinaba na lamang sa P40 bilyon.

Pinasalamatan ni Guillen ang House of Representatives sa pagbabalik ng kanilang badyet.

“This significant sum of P40 billion will also play a crucial role in addressing both climate change and sustainability concerns. Solar-powered pump irrigation systems will revolutionize our nation’s irrigation coverage, reaching previously inaccessible areas while mitigating the impending effects of climate patterns like El Niño,” dagdag ni Guillen.

Sec. Uy, pinalagan ang P300 M confi funds na tinanggal sa DICT

ni Angela Fernando (JT) @News | October 11, 2023

Pinangangambahan ni DICT Secretary Ivan John Uy ang magiging epekto sa operasyon ng Department of Information and Communications Technology sa pagharap sa banta ng cyber security ng tuluyang pag-alis sa confidential funds.

“Our confidential funds to launch investigations, intelligence gathering, and threat analysis had been reduced to zero. It will really cut our capability of addressing all these cyber crimes and cyber threats,” saad ni Uy sa kanyang panayam sa CNN Philippines nitong Miyerkules.

Idiniin niyang kailangan ng DICT ang confidential funds upang makapagsagawa ng imbestigasyon at makapagbaba ng mandato laban sa mga scammers.

Sinabi ito ni Uy matapos alisin ang confidential funds na nagkakahalaga ng P1.23 bilyon na dating nakalaan sa limang ahensiya ng gobyerno — Department of Agriculture, Department of Education, Department of Foreign Affairs, DICT at Office of the Vice President sa ilalim ng iminungkahing P5.768-trilyon na badyet para sa 2024.

Nagkakahalagang P300 milyon ang mawawalang confidential funds sa DICT para sa susunod na taon.

Budget vs. cybercriminals, tinapyasan

ni Jenny Rose Albason @News | October 9, 2023

Ikinalungkot ni Department of Information and Communications Technology Secretary (DICT) Ivan John Uy ang pagliit ng budget ng cybersecurity programs ng ahensya.

Ayon kay Uy, ang mga ito ay nauuri bilang confidential o intelligence funds na kailangan para labanan ang mga cybercriminals.

Sa sideline ng paglulunsad ng Cybersecurity Month 2023, sinabi ni Uy na ang 2024 cybersecurity budget ng DICT ay P300 milyon lamang, na mas mababa sa budget noong mga nakaraang taon.

Dagdag pa niya, mahalagang magkaroon sila ng mas malaking budget dahil tulad ng militar, nakikipagdigma rin sila--cyber warfare.

“Kumbaga kung may giyera po tayo, kung iyong giyera ay palaki ng palaki, iyong budget para sa armas at sa sundalo ay paliit ng paliit. Paano po natin lalabanan ang mga kalaban kung hindi tayo bibigyan ng bala, hindi tayo bibigyan ng armas, hindi tayo bibigyan ng sundalo na matrain para tugusin ang mga ito?” ani Uy.

Ipinagtanggol din niya ang paggamit ng confidential funds, at iginiit na kailangan din nila ng mga covert operations upang labanan ang cybercriminals.

Nang tanungin kung magandang kumuha sa confidential funds ng ibang ahensya, lalo na ang civil agencies, sinabi ni Uy na anumang tulong ng karagdagang pondo ay malugod nilang tinatanggap.

Inaasahan din niya na ang lahat ng ahensya at ang publiko ay gumawa ng kanilang bahagi sa pagprotekta sa kanilang data online.

Iginiit niya na hindi masusubaybayan ng DICT ang mga datos o site ng mahigit 600 national government agencies, 1,600 local government units, at may 100 state colleges at universities.