Magsayo naghahanda sa bigating laban sa lightweight

ni Gerard Arce @Sports News | Jan. 25, 2025

Photo: Mark Magsayo / IG

Hindi na mapipigilan ang muling paglipat ng weight division ng dating World featherweight titlist na si Mark “Magnifico” Magsayo kasunod ng panibagong rankings sa lightweight division, habang pormal itong kinumpirma ng Viva Promotions na pinapatakbo ni Brendan Gibbons na planong hanapin ang panibagong landas tungo sa inaasam na panibagong suntok sa world title fight.

Sa huling sabak ni Magsayo laban kay Ecuadorian boxer Bryan Mercado, unang nagisnan ang bangis nito sa lightweight non-title match noong Disyembre 14, 2024 na ginanap sa Thunder Studios sa Long Beach California sa America, kung saan nagtapos lamang sa 28 segundo ng first round kasunod ng ilang matitinding banat sa karibal para mabilis na tuldukan ang kanyang 135-pound debut.

Dulot ng panalo ay umangat sa 27-2 rekord ang kartada ng 29-anyos mula Tagbilaran City, Bohol kasama ang mabangis na 18 panalo mula sa knockouts, kung saan sa huling tatlong laban ay dinomina nito si dating World challenger Eduardo “Zurdito” Ramirez ng Mexico sa pamamagitan ng 10th round unanimous decision at pinatumba si Mexican Isaac Avelar sa third round.

Mula sa isang post sa social media, inihayag naman ni Gibbons, anak ni MP Promotions President at international matchmaker Sean Gibbons, na pormal na nitong papasukin ang panibagong dibisyon, kung saan lumapag ito bilang ika-anim sa rankings ng International Boxing Federation (IBF) na pinanghahawakan ni Ukrainian champion Vasiliy “Loma” Lomachenko.

Kasalukuyang nakabase sa Valencia, California ang Pinoy power-puncher na puspusan ang isinagawang paghahanda sa Wild Card Gym sa Los Angeles, California sa ilalim ng head trainer na si Marvin Somodio, katulong ang MP Promotions at TGB Promotions, na planong makabalik sa World title fight matapos minsang hawakan ang WBC featherweight belt laban kay Gary Allen Russel Jr sa pamamagitan ng majority decision noong Enero 22, 2022 sa Borgata Hotel Casino sa Atlantic City.

PSA President's awardess sina Petecio at Villegas

ni Gerard Arce @Sports News | Jan. 9, 2025

Photo: Petecio at Villegas

Gagawaran ng espesyal na pagkilala ang dalawang boksingera na sina Nesthy Petecio at Aira Villegas matapos magbulsa ng dalawang tansong medalya sa 2024 Paris Olympics sa 2024 San Miguel Corporation-Philippine Sportswriters Association (SMC-PSA) Awards Night sa Enero 27 sa Grand Ballroom ng Manila Hotel sa Maynila.

Kikilalanin ang matatapang na boksingera sa pagbibigay ng President’s Award ng pinakamatandang media organization ng bansa sa pagkakaroon ng tradisyonal na parangal para dagdagan ang dalawang maningning na gintong medalya ni gymnast Carlo Edriel “Caloy” Yulo para siguraduhin ang pinakagamandang performance ng Team Philippines sa 100 taong partisipasyon ng bansa sa quadrennial games. Tatanghaling 2024 Athlete of the Year si Yulo.

“They may have missed the biggest prize in the 2024 Olympics, but nonetheless deserve high accolades with their own bright moments in the Paris Games, providing extra push in the glorious Philippine performance – a great highlight in the country’s centennial year of participation in the Summer Games,” pahayag ni PSA President Nelson Beltran, tungkol sa natatanging pagkilala sa dalawang boksingera.

Nakamit ni Petecio ang ikalawang medalya sa Summer Olympic Games matapos mapanalunan ang silver medal sa 2020+1 Tokyo Olympics, habang kinapos lang itong makabalik sa finals sa paboritong women’s under-57kgs division, kung saan nagwagi rin siya ng korona sa 2019 World Championship.

Tanging ang 32-anyos mula Santa Cruz, Davao del Sur ang naging kauna-unahang Filipino na boksingera na nagbulsa ng magkasunod na podium finishes sa Summer Games.

Ito naman ang kauna-unahang sabak sa Olympiad ng 29-anyos na tubong Tacloban, Leyte na nakuha ang tansong medalya sa women’s under-50kgs matapos magkuwalipika sa flyweight category sa 2024 World Olympic Qualification sa Busto Arsizio sa Italy. Ito pa lang ang ikalawang medalya ni Villegas nang maka-bronze sa 2019 SEAG sa Maynila, habang sumabak din ito sa Hangzhou Asian Games noong Setyembre 2023.

Pacman, panalo sa kaso laban sa Paradigm Sports

ni Gerard Arce @Sports | August 21, 2024

Photo: Manny Pacquiao

Pormal nang ibinasura ng Superior Court ng State of California mula sa County of Orange Central Justice Center ang $5.1-M o P282-M na isinampang kaso na ‘breach of contract’ kay Filipino boxing legend Manny “Pacman” Pacquiao ng kumpanyang Paradigm Sports Management upang tapusin ang tatlong taong pakikipaglaban sa naturang kaso.

Isinapinal ni California Superior Court Judge Walter Schwarm ang huling desisyon sa akdang inilabas nitong Agosto 12, 2024 para ideklarang walang bisa ang kaso sa kadahilanang ilegal ang hakbang dahil napag-alamang walang lisensiya bilang manager si Paradigm chief Audie Attar para sa mga boksingero sa California noong 2019, gayundin noong 2020 at 2021.

Unang beses na nagkaroon ng kasunduan sina Pacquiao at ang Paradigm Pebrero 8, 2020, habang pumasok sa partnership contract ang mga ito noong Oktubre 11 na eksklusibong kasosyo sa buong mundo. Subalit napag-alamang nagkaroon lang ng lisensya si Attar sa California mula Abril 14, 2016 hanggang Abril 30, 2017, subalit napaso ang lisensya matapos hindi makumpleto ang taunang renewal.

“The court finds for Mr. Pacquiao on the declaratory relief cause of action and declares the contract void due to illegality,” pahayag ni Judge Schwarm na naunang ipinag-utos noong Hulyo na ipawalambisa ang pagbabayad ni Pacquiao ng $3.3-M para sa breach of contract at $1.8-M para sa ‘breach of the implied covenant of good faith and fair dealing’ na iniatas ng Orange County jury noong Mayo 2, 2024 para sa 10 mga hatol laban sa nag-iisang 8th division World champion.

“We are pleased that the court made its final decision on the legal issues in Mr. Pacquiao’s favor. After hearing Paradigm Sports Management’s objections to the tentative decision, the court decided the contract that Paradigm sought to enforce Mr Pacquiao was illegal as Paradigm was not properly licensed,” saad ni Atty. Aniel.