Casimero nagpapasaklolo kay Pacman kontra Inoue

ni Gerard Arce @Sports News | Feb. 3, 2025

Photo: Johnriel Casimero at Naoya Inoue / Quadro Alas It's My Boy FB / Naoya Inoue 410 IG

Nagawang magpakumbaba ng dating three-division World champion na si Johnriel “Quadro Alas” Casimero kasunod ng hirit nitong humingi ng tulong sa nag-iisang eight-division World champion at MP Promotions top honcho Manny “Pacman” Pacquiao upang maisakatuparan ang matagal ng pangarap na makalaban ang undefeated at two-time undisputed titlist na si Naoya “The Monster” Inoue ng Japan sa hinaharap.

Hindi na naiwasan pang ihayag ng 35-anyos mula Ormoc City, Leyte ang kanyang saloobin sa isang Facebook post sa kanyang opisyal na social media account na ‘Quadro Alas it’s my boy’, na napapanahon na umanong putulin ang unbeaten record ng Japanese boxer na unti-unting inihahalintulad sa nagawang legasiya ng Filipino boxing legend na si Pacquiao na minsang inilahad ni Top Rank Promotions head Bob Arum sa hiwalay na ulat.

Sinabi ng American promoter na nakikita niyang nahihigitan na ni Inoue ang 46-anyos na International Boxing Hall of Famer sa mga boksingerong nagmula sa Asya sa pagiging pinakamahusay na boksingerong kampeon. Sinabi ni Arum na bagaman maituturing na mahusay na kampeon si Pacquiao ay nagawa namang maibulsa ang bawat titulo sa magkakasunod na dibisyon na hindi nakakatikim ng anumang pagkatalo ni Inoue.

“Boss Manny Pacquiao, itapat mo na 'yan sa akin 'yung Monster; wala naman ibang katapat 'yan kundi ako lang. Para matapos na'yang agawan nyo sa legacy, tulungan mo nga ako para magtuos na kami para tapos na ang Sturya nyo,” bulalas ng power-punching boxer, na nananatiling walang talo simula nung 2018, na minsang nabigo lamang sa kababayang si Jonas “Zorro” Sultan sa bisa ng 12-round unanimous decision.

Minsang nagkaroon ng lamat sa pagitan nina Casimero at MP Promotions matapos na unti-unting lumayo ang 5-foot-4 boxer sa panig ng nasabing boxing promotion na pinapatakbo ng international matchmaker na si Sean Gibbons bilang presidente.

Ancajas balik porma, pinatumba si Mepranum sa Phl super bantam

ni Gerard Arce @Sports News | Feb. 1, 2025

Photo: Jerwin Ancajas - FB

Kinakitaan ng panunumbalik ng ningning sa kanyang boxing career si dating World titlist Jerwin “Pretty Boy” Ancajas kasunod ng impresibong second-round stoppage sa dating World challenger na si Richie “Magnum” Mepranum tungo sa pagkakabulsa ng Philippine super-bantamweight title sa Public Plaza ng Iligan City.

Ipinamalas ng dating International Boxing Federation (IBF) super-flyweight champion ang pambihirang mga atake sa bodega at katawan ng tubong Maasim, Saranggani para tuluyang tapusin ang laban ni referee Delbert Pelegrino kasunod ng mandatory count dito. Ito ang isa sa mga pagdadaanang pagsubok ng dating World bantamweight challenger na si Ancajas (35-4-2, 23KOs) upang makabalik sa inaasam na top-performance tungo sa World rankings.

Nais bumawi ng kampo ng 33-anyos mula Panabo City, Davao del Norte sa hindi gaanong impresibong panalo laban kay Sukpraserd “Sukkasem Kietyongyuth” Ponpitak ng Thailand sa nakalipas na subok sa featherweight division sa co-main event bout sa Manny Pacquiao Presents: Blow-By-Blow noong Set. 22 sa Mandaluyong City College Gym.

Nagtapos ang laban sa 5th-round disqualification matapos mahirapang sabayan ang pisikal na diskarte kontra Thai boxer, kung saan nabanaag ang pagpapabaya sa timbang at tamang kondisyon ng pangangatawan ni Ancajas.

Subalit sa pagkakataong ito, kinakitaan ng naiibang porma ang 5-foot-6 boxer na may tamang kondisyon at porma na lubos ang paghahanda at pagsasanay sa ilalim ng trainer at manager na si Joven Jimenez na nag-ensayo ng husto sa Iligan City para matamo ang inaasam na preparasyon at kagustuhang makabalik sa World title fight sa hinaharap.

Sa nagdaang limang laban ni Ancajas, tatlong beses itong pumalyang magwagi sa World title bout. Nagtapos ang two-fight winning run ng 37-anyos na si Mepranum (38-10-1, 12KOs) na huling nanaig kontra Kim Lindog sa 6-round unanimous decision noong Agosto sa Almendras Gym sa Davao City.

Magsayo naghahanda sa bigating laban sa lightweight

ni Gerard Arce @Sports News | Jan. 25, 2025

Photo: Mark Magsayo / IG

Hindi na mapipigilan ang muling paglipat ng weight division ng dating World featherweight titlist na si Mark “Magnifico” Magsayo kasunod ng panibagong rankings sa lightweight division, habang pormal itong kinumpirma ng Viva Promotions na pinapatakbo ni Brendan Gibbons na planong hanapin ang panibagong landas tungo sa inaasam na panibagong suntok sa world title fight.

Sa huling sabak ni Magsayo laban kay Ecuadorian boxer Bryan Mercado, unang nagisnan ang bangis nito sa lightweight non-title match noong Disyembre 14, 2024 na ginanap sa Thunder Studios sa Long Beach California sa America, kung saan nagtapos lamang sa 28 segundo ng first round kasunod ng ilang matitinding banat sa karibal para mabilis na tuldukan ang kanyang 135-pound debut.

Dulot ng panalo ay umangat sa 27-2 rekord ang kartada ng 29-anyos mula Tagbilaran City, Bohol kasama ang mabangis na 18 panalo mula sa knockouts, kung saan sa huling tatlong laban ay dinomina nito si dating World challenger Eduardo “Zurdito” Ramirez ng Mexico sa pamamagitan ng 10th round unanimous decision at pinatumba si Mexican Isaac Avelar sa third round.

Mula sa isang post sa social media, inihayag naman ni Gibbons, anak ni MP Promotions President at international matchmaker Sean Gibbons, na pormal na nitong papasukin ang panibagong dibisyon, kung saan lumapag ito bilang ika-anim sa rankings ng International Boxing Federation (IBF) na pinanghahawakan ni Ukrainian champion Vasiliy “Loma” Lomachenko.

Kasalukuyang nakabase sa Valencia, California ang Pinoy power-puncher na puspusan ang isinagawang paghahanda sa Wild Card Gym sa Los Angeles, California sa ilalim ng head trainer na si Marvin Somodio, katulong ang MP Promotions at TGB Promotions, na planong makabalik sa World title fight matapos minsang hawakan ang WBC featherweight belt laban kay Gary Allen Russel Jr sa pamamagitan ng majority decision noong Enero 22, 2022 sa Borgata Hotel Casino sa Atlantic City.