P-BBM, nagpaalalang magmalasakit ang mga Pinoy sa panahon ng Kapaskuhan

ni Angela Fernando - Trainee @News | December 24, 2023

Nagpaalala si Pangulong Ferdinand "Bongbong" Marcos Jr. nitong Linggo na maging matulungin ang mga Pinoy sa mga naghihirap at humaharap sa ibang sitwasyon sa panahon ng Kapaskuhan.

Saad niya, “More than just a day of celebration, let us be reminded that the true meaning of Christmas lies in the recognition of the season as an opportunity to reach out to those who are suffering from solitude, sickness, and poverty.”

Dagdag pa ni Marcos, walang mas maayos na paraan para gunitain ang Pasko kundi magsilbing pag-asa sa kapwa.

Binigyang-diin din ng Pangulo sa kanyang mensahe na hikayatin ang mga Pilipino na gamitin ang kanilang mga puso sa kabutihang-loob habang ipinagdiriwang ang Pasko sa kanilang mga tahanan at komunidad.

'Pinas at Japan, paiigtingin ang kaligtasan sa karagatan at enerhiya

ni Angela Fernando - Trainee @News | December 17, 2023

Pinag-usapan ng Pangulong Ferdinand 'Bongbong' Marcos Jr. at Japanese Prime Minister Fumio Kishida ang pagpapatibay sa kaligtasan sa karagatan at kooperasyon sa enerhiya nitong Linggo sa Japan-Philippines Summit Meeting para sa 50th ASEAN-Japan Commemorative Summit.

Pahayag ng Presidential Communications Office (PCO), siniguro ng Prime Minister na ang Japan ay magpapatuloy sa pagbibigay ng coastal radar system sa pamamagitan ng Official Security Assistance (OSA).

Dagdag pa ng PCO, nais din daw ng nasabing bansa na paigtingin ang kooperasyon sa pagpapatibay ng kaligtasan sa karagatan batay sa Memorandum of Cooperation sa pagitan ng mga coast guard ng dalawang bansa na nilagdaan sa mismong okasyon.

Nagkasundo din ang mga lider ng 'Pinas at Japan na ipagpatuloy ang pagsusuri para sa maagang kasunduan sa mga negosasyon ng Reciprocal Access Agreement (RAA) at pagpapalakas ng kooperasyon sa pagitan ng mga coast guard ng kanilang mga pinamumunuang bansa.

Ugnayan ng 'Pinas sa ASEAN at Japan, may magandang dulot

ni Angela Fernando - Trainee @News | December 17, 2023

Nagpahayag si Pangulong Ferdinand "Bongbong" Marcos Jr. nitong Linggo ng paniniwalang magkakaroon ng mas malinaw na kinabukasan dahil sa 50 taong maayos na relasyon sa bansang Japan at  Association of Southeast Asian Nations (ASEAN).

Nagpasalamat si Marcos sa pamahalaan ng Japan, sa kanyang partisipasyon sa ikalawang sesyon ng ASEAN-Japan Commemorative Summit, sa kanilang dedikasyon at suporta para sa mga inisyatibong nagtataguyod ng maayos na relasyon at pagkakaibigan sa mga mamamayan ng ASEAN at Japan.

Saad n’ya, “We look forward to ASEAN’s and Japan’s continued partnership beyond the 50th year of ASEAN-Japan Friendship and Cooperation. We have done much in the previous 50 years. I believe the future can even be brighter.”

Umaasa din ang Presidente na  magpapatuloy ang Japan-East Asia Network of Exchange for Students and Youths (JENESYS), sa programang naging pangunahing bahagi sa pagtataguyod ng panghabambuhay na kaugnayan ng pagkakaibigan at pagkakaisa sa pagitan ng mga kabataan sa ASEAN at Japan.