Gawing sports powerhouse sa buong Asia ang ‘Pinas

ni Bong Go @Bisyo Magserbisyo | September 18, 2025

Nagpapasalamat ang inyong Senator Kuya Bong Go sa mga kasamahan ko sa Senado para sa pagkakataong ipagpatuloy ang ating mga adhikain bilang Chairman ng Senate Committee on Sports. Noong September 15, pinangunahan natin ang kauna-unahang public hearing ng komite para sa 20th Congress.

Parang kailan lang noong 2019 nang una nating pinamunuan ang Sports Committee. Sa lumipas na anim na taon, nakakabilib at talagang proud tayo sa narating ng mga atletang Pilipino -- mula sa makasaysayang unang Olympic gold medal natin na napanalunan ng weightlifter na si Hidilyn Diaz sa Tokyo, Japan noong 2021; ang unang championship win ng ating men’s basketball team sa loob ng 61 years sa 2023 Asian Games; hanggang sa historic na double-gold medal win ni Carlos Yulo sa gymnastics noong 2024 Paris Olympics. 

Napatunayan natin na kapag buo ang suporta ng gobyerno at private sector sa ating mga manlalaro, kayang-kaya nating humakot ng medalya. Sa pagdinig ng komite, muli nating tiniyak na ipaglalaban natin ang mas mataas na pondo para sa sports sector. Inihayag din natin ang pagsang-ayon sa pagkakaroon ng isang sports department sa pamahalaan. Sa kabila kasi ng sunud-sunod na karangalang iniuuwi ng ating mga atleta, nananatiling maliit na bahagi ng national budget ang inilalaan sa Philippine Sports Commission. 

Sabi ko nga noong public hearing, bakit hindi na lang gamitin sa sports development, repair ng facilities, o dormitoryo ng mga atleta ang pondong nagagamit sa ghost flood control projects na wala namang nakikinabang? Imbes na gatasan ang kaban ng bayan, suportahan na lang sana ang ating mga atleta para wala na silang ibang iniisip kundi ang mag-training.

Kaugnay nito, isa sa mga isinusulong natin ay ang Senate Bill No. 171 na layong i-regionalize ang National Academy of Sports o NAS na matatagpuan ngayon sa New Clark City, Capas, Tarlac. Bilang author at co-sponsor ng Republic Act No. 11470 na nagtatag sa NAS, pangarap kong magkaroon ito ng regional campuses para sa mga student-athlete natin sa Visayas at Mindanao.  

Sa tulong ng mga kapwa ko mambabatas, isusulong din natin para maipasa ang SBN 413 na layong palakasin ang grassroots competition sa pamamagitan ng mini-Olympics na Philippine National Games. Nag-file din tayo ng SBN 678 para maitatag ang National Tertiary Games na isang national collegiate multi-sport tournament. Ipaglalaban din natin ang SBN 407 o ang Expanded Benefits for Para-Athletes Bill na layong mabigyan ng parehong incentives ang ating para-athletes tulad ng iba pang national athletes.

Magtulungan tayo para muling maging sports powerhouse sa buong Asia ang ating bansa. Get into sports, stay away from drugs, to keep us healthy and fit!

Samantala, bukod sa sports ay patuloy pa rin ang paglapit natin ng serbisyong medikal sa ating mga kababayan. Noong September 11, personal tayong dumalo sa blessing at pagbubukas ng Halfway House o Bahay Pasilungan sa Quirino Memorial Medical Center (QMMC) sa Quezon City kasama si Medical Center Chief Ivy Reside. Ang halfway house ay isang pansamantalang tuluyan na itinayo upang magbigay ng maayos at ligtas na pahingahan para sa mga bantay habang naka-admit at nagpapagaling ang kanilang

mahal sa buhay sa ospital.

Pagkatapos nito, bumiyahe kami patungong Lubang, Occidental Mindoro para saksihan ang ribbon cutting ng isang road project at ang blessing ng isang mini dump truck at isang rescue vehicle.

Namahagi rin tayo ng tulong para sa 300 biktima ng Bagyong Kristine kasama sina Mayor Michael Orayani at Vice Mayor Charles Villas. Nakakuha rin ng karagdagang tulong mula sa pambansang pamahalaan ang mga benepisyaryo para sa kanilang muling pagbangon at pag-recover.

Noong September 13, personal nating dinalaw ang 221 biktima ng sunog sa Barangay 23-C sa Davao City, sa koordinasyon nina Davao City 1st District Councilors Atty. Luna Acosta at Ragde Ibuyan, dating kapitan Alimodin “Wating” Usman, Deputy Randy Usman, Deputy Mayor ng Maguindanao Tribe Gabriel Nakan, at Kagawad Fatima Lao.

Noong September 16, dumalo naman tayo sa Vice Mayors’ League of the Philippines Regional Assembly at Election of Officers ng MIMAROPA sa imbitasyon ni Vice Mayor Apple Fondevilla ng Corcuera, Romblon. Sa araw ding iyon, dumalo tayo sa Vice Mayors’ League of the Philippines Regional Assembly at Election of Officers ng CALABARZON sa imbitasyon naman ni Vice Mayor Laarni Malibiran ng Sta. Cruz, Laguna. Magandang pagkakataon ito para makipag-ugnayan at makipagpalitan ng ideya sa mga lokal na opisyal upang mas mapalakas pa ang serbisyo para sa ating mga kababayan sa rehiyon.

Bukod pa rito, agad ding nakapag-abot ng tulong ang Malasakit Team sa iba pang mga kababayan noong nakaraang linggo matapos nilang matulungan ang 47 biktima ng sunog sa Mati City at 168 sa Tarragona, Davao Oriental; 109 sa Plaridel, Misamis Occidental; at tatlong pamilya mula sa Matalam at Makilala, Cotabato.

Nakapagbigay din tayo ng suporta sa 69 biktima ng pagbaha sa Don Marcelino, Davao Occidental para matulungan silang muling makapagsimula at makabangon.

Dumalo rin ang Malasakit Team sa unang anibersaryo ng Super Health Center sa Nabunturan, Davao de Oro at sa ika-50 anibersaryo ng Institute of Integrated Electrical Engineers of the Philippines, Inc. (IIEE) na ginanap sa Quezon City.

Bilang inyong Mr. Malasakit, magseserbisyo ako para sa Pilipino sa abot ng aking makakaya. Bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Salamat ma’am at sir sa sakripisyo at dedikasyon!

ni Bong Go @Bisyo Magserbisyo | September 11, 2025

NgayongTeachers’ Month, binibigyang pugay natin ang mga guro na naging gabay at haligi ng ating lipunan. Hindi lang sila nagtuturo ng leksyon sa klase, kundi sila rin ang nagtuturo ng disiplina, malasakit, at pangarap sa bawat estudyanteng kanilang hinahawakan.

Kamakailan, naimbitahan tayo bilang guest speaker sa 50th Annual District Convention ng Kiwanis Southern Philippine District na ginanap sa Lanang, Davao City nitong September 6. May pagkakataon akong makita ulit ang isa sa pinakamahalagang guro sa aking buhay — si Teacher Araceli “Didit” Layog.

Siya ang naging guro ko noong nursery pa lang ako at, ngayon, 71 years old na siya at nagsilbing emcee ng event. Napakasaya ng inyong Senator Kuya Bong Go na makasama si Teacher Didit. Mahigpit na yakap at isang munting regalo ang ibinigay ko kay Teacher Didit. 

Malaki ang kontribusyon ng mga guro sa ating mga buhay. Importante sila sa paghubog ng ating kabataan para maging produktibong miyembro ng ating lipunan. Para sa akin, teaching is still the most noble profession.

Nagpapasalamat ako kay Teacher Didit sa kanyang sakripisyo, gayundin ng lahat ng ating mga guro. Sila ang tunay na bayani na kung minsan ay hindi nabibigyan ng sapat na pagkilala.

Kaya naman sa Senado, sinisikap kong maipasa ang mga panukalang batas na makakatulong sa kanila. Isa na rito ang pagiging isa sa mga author at co-sponsors ng Republic Act No. 11997, o ang Kabalikat sa Pagtuturo Act, na nagtaas ng teaching supply allowance para sa mga public school teacher.

Bukod dito, naghain din ako ng Senate Bill No. 410, o ang Monthly Allowance for Teachers and Non-Teaching Personnel bill, na layong magbigay ng buwanang stipend para sa ating mga guro at non-teaching staff sa public schools. Para sa akin, hindi lang ito dagdag-tulong pinansyal, kundi isang paraan ng pagpapakita ng pasasalamat at pagkilala sa kanilang malaking kontribusyon sa bayan.

Kung wala ang ating mga guro, wala ring mga doktor, inhinyero, pulis, sundalo, nurse, pati na mga senador na katulad ko. Kaya’t sa lahat ng guro sa buong bansa, saludo ako sa inyo. Hindi matatawaran ang inyong papel sa paghubog ng ating kinabukasan. Maraming salamat!

Samantala, noong nakaraang linggo, bumisita ang aking Malasakit Team sa isang komunidad sa grassroots upang tumulong sa mga kababayang Pilipino na nangangailangan, kung saan nagpaabot tayo ng tulong sa siyam na pamilyang naapektuhan ng sunog sa Basey, Samar; at 47 naman sa Mati City, Davao Oriental.

Natulungan din natin ang 744 benepisyaryo na naapektuhan ng nagdaang Bagyong Kristine sa Looc, Occidental Mindoro. Nakipagtulungan din ang Malasakit Team sa pambansang pamahalaan upang matulungan ang mga benepisyaryo na makakuha ng post-disaster shelter assistance para sa mga pamilyang lubusang nasira ang bahay, bilang tulong sa kanilang muling pagbangon, sa pamamagitan ng programang aming isinulong.

Namahagi rin tayo ng tulong sa 69 na flash flood victims nating kababayan sa Don Marcelino, Davao Occidental.

Dumalo rin ang Malasakit Team sa pagbubukas ng Super Health Center sa Balagtas, Bulacan; at unang anibersaryo ng isa pang Super Health Center sa Nabunturan, Davao de Oro.

Hinding-hindi ko sasayangin ang pagkakataong ibinigay ninyo sa akin. Magtatrabaho ako para sa Pilipino, at iyan ang puwede kong ialay sa inyo. Bisyo ko ang magserbisyo, at naniniwala ako na ang serbisyo sa tao ay serbisyo sa Diyos. 

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mandatory evacuation centers, bigyang prayoridad

ni Bong Go @Bisyo Magserbisyo | September 4, 2025

Mahalagang malaman ng taumbayan ang mga tinatalakay sa briefing sa Senado ng Development Budget Coordination Committee o DBCC. Pera ng Pilipino ang pinag-uusapan dito kaya lagi nating sinasabi, dapat ibalik ito sa kanila sa pamamagitan ng maayos na serbisyo.

Nitong September 1, nabanggit sa DBCC briefing ang budget para sa pagpapatayo ng mandatory evacuation centers sa lahat ng siyudad at munisipalidad. Bilang Vice Chairman ng Senate Committee of Finance at principal author and co-sponsor ng Republic Act No. 12076 o ang Ligtas Pinoy Centers Act, patuloy nating ipinaglalaban ang kapakanan ng ating evacuees.

Sa kabila ng kontrobersiya sa flood control projects, habang maraming Pilipino ang apektado ng malawakang pagbaha, ipinapanawagan natin na bigyang prayoridad ang Ligtas Pinoy Centers. Sa laki ng nailalaan na pondo para sa flood control sa lumipas na mga taon (umaabot na sa P1.2 trilyon), puwede na sanang makapagpatayo ng 60,000 evacuation centers para sa lahat ng siyudad at bayan sa buong bansa. Katumbas din ng halagang ito ang 800,000 na mga health center o ‘di kaya’y 800 na level 3 hospitals. Nakakalungkot na sa briefing ng DBCC, nabanggit na P3.6 bilyon lang ang inilalaang pondo para sa evacuation centers sa susunod na taon.

Bilang Chairman ng Senate Committee on Health, hindi natin tinitigilan ang pagtutok sa mga pangakong reporma ng PhilHealth. Sa DBCC briefing, inilatag ang panukalang subsidy para sa PhilHealth na lalampas sa P50 bilyon. Patuloy nating ipaglalaban ang naaayon sa batas na pondo ng PhilHealth. Health is wealth! Dapat na bigyang prayoridad ang kalusugan tulad ng iba pang mga programa na talagang may pakinabang sa taumbayan.

Para sa ating senior citizens, natalakay sa DBCC na walang increase sa pondo na ipinapanukala para sa 2026. Ito ay sa kabila ng mahigit 800,000 senior citizens na nasa waitlist pa rin para sa kanilang social pension. Bilang co-author ng RA 11916 na nagtaas sa pensyon mula P500 at naging P1,000, isusulong natin na mas mapondohan pa ang mga programa para sa ating mga nakatatanda.

Nagpapasalamat tayo sa Executive Department, Department of Budget and Management, Department of Health, at kay Pangulong Bongbong Marcos matapos ianunsyo ng DBM sa DBCC briefing, ang pag-release ng P6.7 bilyon para sa Health Emergency Allowances (HEA) arrears na utang ng gobyerno sa ating healthcare workers. Long overdue na ito dahil noon pang pandemya nila ito pinaghirapan at pinagpaguran. Kasama ng ating modern-day heroes, sulit ang pangungulit natin sa 15 public hearings ng Senate Committee on Health. Babantayan natin ito hanggang tuluyang matanggap ng healthcare workers dahil ito ay services rendered na. 

Bilang Chairman ng Senate Committee on Sports, kahit papaano ay suportado natin ang panukalang dagdagan ng 36% mula sa P725 milyon na panukala para sa 2025 ang pondo ng Philippine Sports Commission o PSC na inanunsyo sa DBCC briefing. Hindi maikakailang kulang pa rin ito para makamit ang ating pangarap na muling maging sports powerhouse sa Asia ang Pilipinas. Kung sapat ang pondo para sa ating mga atleta, wala na silang iisipin pa kundi ang maghanda para sa kompetisyon.

Umasa kayo na ipaglalaban ng inyong Senator Kuya Bong Go ang pro-poor at pro-Filipino programs lalo na ang healthcare, education, sports, at mga inisyatibang tunay na magbibigay serbisyo sa kapwa natin Pilipino.

Samantala, noong August 27, bilang Vice Chairman ng Senate Committee on Finance, personal tayong dumalo sa dalawang inagurasyon ng Multi-Purpose Buildings sa Quezon City kasama si Councilor Mikey Belmonte, Councilor Ranie "Tatay" Ludovica, Kapitan Rascal Doctor ng Brgy. Payatas, at Kapitan Manuel Co ng Brgy. Commonwealth. Isa ay matatagpuan sa Lupang Pangako sa Barangay Payatas, at ang isa naman ay nasa Sanapa East Side, Commonwealth. Sinuportahan at isinulong natin ang mga proyektong ito para sa komunidad.

Dumalo rin tayo sa National Fire Training Institute (NFTI) Fire Basic Recruit Course (FBRC) Class 2025-136, “Class Mandasig,” Graduation Ceremony, kasama sina Acting Director FSSupt Christine Cula, PBGen Ferdinand Sevilla (Ret.), Presidente ng Philippine Public Safety College; JSSupt. Ronaldo Senoc, Director ng National Jail Management and Penology Training Institute; at si PCol Melvin Napiloy, Deputy Regional Director for Administration ng PRO 4A, noong August 28.

Noong August 29, inimbitahan kami bilang guest of honor at speaker sa pagbubukas ng Institute of Integrated Electrical Engineers of the Philippines, Inc. (IIEE) 26th Southern Mindanao Regional Conference sa Davao City, na pinamunuan ni National President Alberto Herrera Jr.

Dumalo naman kami sa turnover ng Super Health Center sa Isulan, Sultan Kudarat kasama si Mayor Princess Rihan Sakaluran noong August 30, kasunod ng pagdiriwang ng ika-68 Founding Anniversary ng Isulan at ika-12 Hamungaya Festival. Pagkatapos nito, nakiisa kami sa Fiesta Handaan Boodle Fight at Linggo ng Kabataan.

Nakibahagi rin tayo sa pagdiriwang ang mga opisyal ng lalawigan, kabilang sina Governor Datu Pax Ali Mangudadatu, Vice Governor Datu Prince Raden Sakaluran, Mayor Sakaluran, Vice Mayor Atty. Arnold Armada, at mga miyembro ng Sangguniang Panlalawigan. Dumalo ang mga alkalde mula sa iba’t ibang bayan ng Sultan Kudarat: Mayor Datu Yassin Mangudadatu ng Lutayan, Mayor Charles Ploteña ng Esperanza, Mayor Ronan Garcia ng Kalamansig, Mayor Myrna Kapina ng Palimbang, Mayor Katrina Sandigan ng President Quirino, Mayor Rafael Flauta ng Sen. Ninoy Aquino, Mayor Amirh Musali ng Columbio, at Mayor Frederick Celestial ng Lebak.

Samantala, tumulong ang ating Malasakit Team sa iba’t ibang kababayan noong nakaraang linggo matapos agad nilang alalayan ang 15 pamilya na naapektuhan ng sunog sa Binangonan, Rizal. Nagbigay din ng tulong ang Malasakit Team sa 68 biktima ng sunog sa Davao City. Bukod dito, nagbigay din tayo ng tulong sa 222 biktima ng bagyo sa Looc, Occidental Mindoro.

Nagbigay din tayo ng tulong sa 57 iskolar sa Sorsogon, 82 sa Southern Luzon Technological College Foundation sa Legazpi City, Albay, at 205 sa Camarines Norte. Sa Lipa City, Batangas, dumalo ang Malasakit Team sa turnover ng isang ambulansya. Samantala, sa Talisay City, Cebu, nakiisa ang Malasakit Team sa itinayong Super Health Center sa lungsod.

Hinding-hindi ko sasayangin ‘yung pagkakataong ibinigay n’yo sa akin. Magtatrabaho ako para sa Pilipino sa abot ng aking makakaya. At iyan ang puwede kong ialay sa inyo, ang sipag at dahil bisyo ko ang magserbisyo

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.