Malasakit at serbisyong medikal, mas ilalapit pa sa mga Pilipino

ni Bong Go @Bisyo Magserbisyo | May 22, 2026

Nagpapasalamat ako sa tiwalang ibinigay sa akin ng aking mga kapwa senador matapos akong muling italaga bilang Chairperson ng Senate Committee on Health and Demography noong May 18.

Patuloy rin nating pamumunuan ang Senate Committee on Sports. Nakahanda tayong gampanan ang responsibilidad upang ipagpatuloy ang trabaho para sa kalusugan, kapakanan, at kinabukasan ng ating mga kababayan.

Ngayong muli tayong nasa pamunuan ng komite, na pinamunuan na rin natin noon sa loob ng anim na taon, nananatili ang aking focus sa isang bagay: ilapit ang serbisyong pangkalusugan sa mga Pilipino, lalo na sa mahihirap at walang ibang matakbuhan.

Bilang health reforms crusader, alam ko na marami pa ring pasyente ang nahihirapan sa pagpapa-check-up, pagpapa-ospital, pagbili ng gamot, at paghingi ng tulong medikal. Kaya paulit-ulit kong sinasabi na dapat ang pondo para sa kalusugan ay mapunta sa pasyente. Hindi dapat maging pabigat sa mahihirap na Pilipino ang paghahanap ng lunas sa kanilang mga sakit.

Patuloy nating babantayan ang pondo at serbisyo ng Philippine Health Insurance Corporation (PhilHealth). Mahalaga na nagagamit nang tama ang pondo nito upang mas marami pang pasyente ang makinabang. Hindi dapat matakot magpa-ospital ang mga pasyente para magpagamot, dahil sa malaking gastusin. Ang pondo ng PhilHealth ay dapat na gamitin sa health!

Sa mga nakaraang taon, naging bahagi tayo ng pagtulak ng ilang mahahalagang reporma sa kalusugan. Isa rito ang Republic Act No. 11463, o ang Malasakit Centers Act of 2019, kung saan ako ang naging principal author at sponsor. Sa pamamagitan nito, na-institutionalize ang Malasakit Centers bilang one-stop shops para sa medical assistance. Sa ngayon, may 167 Malasakit Centers na sa buong bansa at nakatulong na sa mahigit 17 milyong Pilipino.

Principal sponsor at isa rin ako sa mga may-akda ng RA 11959, o ang Regional Specialty Centers Act, na nagmamandato ng pagtatayo ng specialty centers sa mga existing regional hospitals ng Department of Health (DOH). Mahalaga ito dahil hindi lahat ng pasyente ay kayang bumiyahe pa sa malalayong lugar para lamang makakuha ng espesyalistang gamutan.

Patuloy din nating sinusuportahan ang mga reporma sa PhilHealth na ipinaglaban natin noon sa ating marathon health committee hearings. Sa tulong ng mga kapwa ko senador, health professionals, advocates, at mismong mga pasyente, babantayan natin ang tuloy-tuloy na implementasyon ng mga ito dahil buhay ng tao ang nakasalalay.

Tulad ng dati, ang Senate Health Committee ay magsisilbing avenue para sa hinaing ng mga karaniwang mamamayan, mga masisipag nating health workers, at iba pang nasa health sector. Bilang inyong senador, magtatrabaho po ako sa abot ng aking makakaya dahil hangad ko po na mailapit ang serbisyong medikal sa kapwa natin Pilipino.

Samantala, noong May 16 ay nagtungo tayo sa Barangay 23-C, Poblacion sa Davao City upang tulungan ang 466 na biktima ng sunog, sa pakikipag-ugnayan sa mga lokal na mga opisyal.

Noong May 19, namahagi naman tayo ng tulong sa 45 na pamilya na nasunugan sa Brgy. Tangos South, Navotas City sa pakikipagtulungan sa lokal na pamahalaan. Nakasama natin sa pagbisita sina Mayor John Rey Tiangco, Vice Mayor Tito Sanchez, at iba pang mga local officials. Kinabukasan, naghatid ang ating Malasakit Team ng tulong sa mga nasunugang biktima sa Valenzuela City.

Noong nakaraang linggo, nagpaabot din ng tulong ang ating Malasakit Team sa mga nangangailangan, matapos agad nilang mabigyan ng assistance ang mga biktima ng sunog sa Kawit, Cavite.

Nakibahagi rin ang ating team sa isinagawang medical outreach sa Cebu City. Dumalo rin ang ating team sa inagurasyon ng Super Health Center sa Sasmuan, Pampanga, kung saan nagpaabot tayo ng tulong sa mga barangay health workers.

Bilang Mr. Malasakit, patuloy akong magseserbisyo sa sambayanang Pilipino sa abot ng aking makakaya dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Ilapit ang serbisyong medikal sa mga mahihirap nating kababayan

ni Bong Go @Bisyo Magserbisyo | May 16, 2026

Noong May 11, sa public hearing ng Senate Committee on Health, muli nating tinalakay ang kalagayan ng mga health facilities sa bansa, kabilang ang mga Super Health Centers, public hospitals, at iba pang pasilidad na pinopondohan sa ilalim ng Health Facilities Enhancement Program (HFEP) ng Department of Health (DOH).

Bilang health reforms crusader, matagal ko nang ipinaglalaban na mailapit ang serbisyong medikal sa ating mga kababayan, lalong-lalo na sa mga nasa malalayong lugar. Para sa akin, ang kalusugan ay katumbas ng buhay ng bawat Pilipino.

Sa pag-iikot ko sa buong Pilipinas, nakita ko mismo ang hirap ng maraming kababayan natin. May mga lugar na kailangan pang tumawid ng ilog, bundok, o dagat para makarating sa health center o ospital. May mga buntis na halos manganak na sa bangka o tricycle dahil malayo ang pinakamalapit na pasilidad. Ganyan ang hamon sa bansang binubuo ng mahigit 7,000 na isla.

Kaya sinuportahan natin ang HFEP. Layunin nito na mapaganda at mapalakas ang mga pasilidad pangkalusugan sa iba't ibang bahagi ng bansa.

Suportado rin natin ang pagtatayo ng Super Health Centers. Mahalaga ang mga ito dahil mas nailalapit nila ang primary health care sa mga tao. Kapag malakas ang health center system, mas mababawasan ang bigat na dinadala ng mga ospital. Hindi lahat ng sakit kailangang dalhin agad sa ospital kung may sapat at maayos na pasilidad sa komunidad.

Pero sapat ba na maitayo lang ang gusali? Para sa akin, hindi. Kailangan itong matapos, lagyan ng kagamitan at personnel, at gawing tunay na operational. Sayang ang pondo kung may gusali pero hindi naman nagagamit ng tao.

Noong ako ang Chairman ng Senate Committee on Health, paulit-ulit kong ipinapaalala sa DOH na siguraduhing natatapos at napapakinabangan ang mga proyekto. Huwag nilang hayaang maging “white elephant” ang proyekto na nakatayo nga ngunit wala namang serbisyong naibibigay sa mga nangangailangan.

Nakababahala na may mga ulat tungkol sa naantalang pagpapatupad, kulang na kagamitan, hindi kumpletong imprastraktura, at maging kawalan ng linya ng kuryente at tubig! Kapag may perang inilaan para sa serbisyong pangkalusugan, dapat ramdam ito ng mga Pilipino, lalung lalo na ng mahihirap at nasa malalayong lugar.

Dapat na magtulungan at complement ang DOH at local government units (LGUs) para masigurong fully operational ang mga health facilities. Maraming LGUs, lalo na ang mga fourth to sixth class municipalities, ang walang sapat na pondo para magpatayo at magpatakbo ng malalaking pasilidad. Kaya mahalaga ang tulong ng national government sa pamamagitan ng mga programang gaya ng HFEP. Pero kailangang siguraduhin na ang tulong na ito ay mauuwi sa serbisyong tunay na mararamdaman sa komunidad.

May magagandang halimbawa naman. Sa Tingloy, Batangas, isang island municipality, malaking bagay ang pagkakaroon ng maayos na pasilidad at hindi na kailangan pang mag-bangka papunta sa mas malaking ospital. Ganoon din sa Lake Sebu sa South Cotabato, may Super Health Center sa mataas na lugar para ‘di mahirapan ang mga residente sa pagbiyahe. Sa Iloilo naman, may mga LGU na nagdagdag pa ng sariling pondo para mas mapaganda ang kanilang Super Health Centers.

Dapat ding bigyan ng prayoridad ang mga local hospitals, lalo na ang mga proyektong multi-year ang construction. Sa nakaraang mga taon, nakapagpasa tayo ng 93 batas para sa pagtatayo at pag-upgrade ng mga public hospitals sa iba't ibang bahagi ng bansa. Ang layunin ng mga batas na ito ay matulungan ang mga ospital na magkaroon ng tuluy-tuloy na suporta, kabilang ang mula sa HFEP.

Bilang senador, naghain ako ng Senate Resolution No. 384 upang malaman ang kalagayan ng ating healthcare facilities sa buong bansa. Gusto nating malaman ang implementation gaps at siguraduhin na ang pondong inilaan para sa health infrastructure ay nagiging accessible, functional, at quality healthcare services para sa bawat Pilipino.

Samantala, noong May 6, personal nating pinalawig ang tulong para sa mga biktima ng sunog sa Tondo, Manila. Nakatanggap din ang mga benepisyaryo ng karagdagang tulong mula sa pambansang pamahalaan para makabili ng mga construction materials na magagamit sa pagpapatayo muli ng kanilang mga tahanan.

Noong May 7, namahagi rin tayo ng tulong sa mga nasunugan sa Cainta, Rizal kung saan nakasama natin sina Congresswoman Mia Ynares, Mayor Kit Nieto, Vice Mayor Ace Servillon at mga konsehal. Matapos doon ay dumiretso rin ako sa Brgy. Sucat, Muntinlupa City upang maghatid rin ng tulong sa mga nasunugan. Masaya rin ako dahil nakamusta ko ang mga staff sa kanilang Health Center.

Noong May 8, personal nating binigyang-pugay ang Public Safety Officers Senior Executive Course (PSOSEC) Class 2025-03 “Sararo” sa kanilang graduation ceremony sa paanyaya nina Jail Superintendent Castle H. Masip, President ng PSOSEC Class 2025-03 “Sararo.” Nagpapasalamat din tayo kay Police Lieutenant Colonel Jerwin Embolode, Campus Director ng National Police College Davao sa kanyang suporta upang maging matagumpay ang nasabing okasyon.

Noong May 12, personal rin tayong bumisita at namahagi ng tulong sa mga 126 pamilyang biktima ng sunog sa Brgy. 66, 148, at 185 sa Pasay City.

Nakiisa rin ang ating Malasakit Team sa opening ng National Private Schools Athletic Association (PRISAA) Games Negros 2026 noong May 9. Patuloy kong susuportahan ang mga programang magpapalawak sa sports at youth development.

Noong nakaraang linggo, nagpaabot din ng tulong sa mga kababayan natin, kabilang ang mga biktima ng sunog sa Iloilo City; Pasig City; Tondo, Manila; Bacoor City, Cavite; at Bacolod City. Tinulungan din ng ating team ang mga scholar mula sa Teresa, Rizal at Bacoor City, Cavite.

Bilang Mr. Malasakit, patuloy akong magseserbisyo sa sambayanang Pilipino dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pagpapalakas ng mga programa para sa abot-kayang edukasyon

ni Bong Go @Bisyo Magserbisyo | May 7, 2026

Para sa akin, ang edukasyon ay isa sa pinakamahalagang puhunan ng bawat pamilyang Pilipino. Kapag may pagkakataong makapag-aral ang isang bata, mas lumalawak ang posibilidad na makatulong siya sa kanyang pamilya at makapagsimula ng mas maayos na kinabukasan.

Kaya patuloy nating sinusuportahan sa Senado ang mga panukalang makatutulong sa mga mag-aaral, mula basic education hanggang kolehiyo at technical-vocational education.

Noong May 4, inaprubahan ng Senado sa ikalawang pagbasa ang Senate Bill No. 1894, o ang Enhancing Universal Access to Quality Tertiary Education Bill. Ako po ay may-akda at co-sponsor ng panukalang ito. Layunin nitong palakasin ang Republic Act No. 10931, o ang Universal Access to Quality Tertiary Education Act, para mas matulungan ang mahihirap at disadvantaged na mga estudyanteng Pilipino sa kolehiyo at technical-vocational education.

Noon pa man, alam natin kung gaano kahalaga ang edukasyon para sa kinabukasan ng kabataan. Ipinaglalaban natin na mabigyan ng pagkakataon ang bawat Pilipinong makapag-aral, lalo na ang mahihirap nating kababayan.

Naaalala ko pa ang panahon noong 2017, nang ako ay naglilingkod bilang Special Assistant to the President (SAP) ni dating Pangulong Rodrigo Duterte. Sa kabila ng pangamba noon na walang pondong mailalaan para sa libreng tertiary education, nanindigan tayo at tumulong sa Commission on Higher Education (CHED) para maipaglaban ang panukala.

Isang mahalagang legacy ng Duterte Administration ang RA 10931, kung saan libre ang tuition at iba pang school fees sa State Universities and Colleges (SUCs), Local Universities and Colleges (LUCs), at state-run Technical-Vocational Institutions (TVIs). Itinatag din nito ang Tertiary Education Subsidy (TES) at student loan program para makatulong sa iba pang gastusin ng mga estudyante.

Pero alam din natin na hindi natatapos sa tuition ang gastos sa pag-aaral. Maraming estudyante ang libre nga ang tuition, pero nahihirapan pa rin sa pamasahe, gamit sa eskwela, tirahan, pagkain, at iba pang gastusin. Kaya dapat mas tingnan natin ang tunay na kalagayan nila.

Sa SBN 1894, hangad natin na mabigyang-pansin ang mga mag-aaral mula sa disadvantaged backgrounds. Kabilang dito ang persons with disabilities, Indigenous Peoples, learners under foster care, children at risk, children in conflict with the law, solo parents at kanilang dependents, learners mula sa Pantawid Pamilyang Pilipino Program (4Ps) households, first-generation tertiary learners, learners mula sa geographically isolated and disadvantaged areas, at iba pang vulnerable sectors.

Bilang senador, mahalaga sa akin na mapupunta ang tulong sa mga estudyanteng nangangailangan. Hindi dapat mahirapan ang mahihirap na pamilya na lumapit sa gobyerno para sa edukasyon ng kanilang mga anak.

Pinapalawak din ng SBN 1894 ang sakop ng other school fees, kabilang ang clinical internship at Related Learning Experience (RLE) fees na kailangan sa nursing at iba pang allied health programs. Mahalaga ito dahil may mga kurso na hindi lang classroom learning ang kailangan. May practical training din na kailangang bayaran ng estudyante.

Kasabay nito, inaprubahan din ng Senado sa ikatlong pagbasa ang Senate Bill No. 1981, o ang Basic Education Voucher Program Bill. Ako po ay co-author ng panukalang ito. Layunin nitong gawing institutionalized ang private basic education voucher program para sa qualified learners mula Kindergarten hanggang Grade 12.

Kung maisasabatas, hangad natin na makatulong sa mga batang nasa congested public schools, low-income families, at disadvantaged sectors. Kabilang dito ang mga learners sa geographically isolated and disadvantaged areas, Indigenous Peoples, at mga benepisyaryo ng 4Ps, bukod sa iba pa.

Para sa akin, dapat tuluy-tuloy ang suporta natin sa edukasyon. Maraming pamilyang Pilipino ang hirap sa gastusin sa pag-aaral ng kanilang mga anak, kaya kung may paraan para matulungan sila, dapat gawin natin. Sa tulong ng mga kapwa ko mambabatas, ipaglalaban natin na maisabatas ang panukalang ito.

Samantala, noong April 29, nakilala namin ang dalawang benepisyaryo ng scholarship program ng Commission on Higher Education (CHED), na patuloy kong sinusuportahan: sina Maria Geraldine Gimao at Luisa Intia, na parehong nagtapos ng Bachelor of Science in Psychology. Si Maria Geraldine, isang ina ng tatlo habang ang kanyang asawa ay isang OFW, ay nagtapos bilang Cum Laude, habang si Luisa naman ay tumanggap ng Academic Achiever award. Nawa'y magsilbi silang inspirasyon sa mga kabataan na patuloy na abutin ang kanilang mga pangarap.

Noong April 28, personal din tayong dumalo sa 13th Association of Southeast Asian Nations (ASEAN) Para Games Official Awarding of Incentives na ginanap sa Rizal Memorial Sports Complex sa Maynila, kung saan tayo ay nagsilbing keynote speaker at pinangunahan ang pagkilala sa ating mga para-athletes dahil sa kanilang mahusay na ipinakitang performance sa regional meet sa Thailand. 

Samantala, kahit LingGO ay patuloy lang tayo sa pagseserbisyo. Nitong May 3, personal tayong naghatid ng tulong sa mga nasunugan sa Barangay 264 sa Tondo, Manila.

Samantala, ang ating Malasakit Team ay naghatid ng tulong sa mga kababayan nating nangangailangan, partikular sa mga nasunugan sa Iloilo City, Bacoor City, Cavite; Cebu City at Mandaue City, Cebu; Don Carlos, Bukidnon; Mati City, Davao Oriental; at Cagayan de Oro City.

Bukod dito, natulungan din ang mga public utility jeepney, tricycle, at mini-bus drivers sa Carcar City, Cebu; at senior citizens at mga PWD sa Ferriol, Romblon. Nabigyan din ng tulong ang mga iskolar mula Presentacion, Camarines Sur; at Montevista, Davao de Oro.

Gaya ng lagi kong sinasabi, nananatiling matatag ang ating paninindigan: ang paglingkuran ang sambayanang Pilipino, lalong-lalo na sa panahon ng krisis at pagdating sa serbisyong pangkalusugan, dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.