Dagdag-benepisyo para sa mga uniformed personnel

ni Bong Go @Bisyo Magserbisyo | July 17, 2026

Hindi madali ang maging sundalo o ang pagiging isang uniformed personnel. Araw-araw, iniiwan nila ang kanilang mga pamilya at humaharap sa mahihirap at mapanganib na sitwasyon upang mapanatili ang kapayapaan at kaligtasan ng ating mga mamamayan.

Noong administrasyon ni dating Pangulong Rodrigo Duterte, dinoble noong 2018 ang sahod ng mga entry-level na pulis, sundalo, at iba pang uniformed personnel. Kabilang dito ang mga tauhan ng Philippine Coast Guard (PCG), Bureau of Fire Protection (BFP), at Bureau of Jail Management and Penology (BJMP).

Ipinakita ng hakbang na ito ang pagpapahalaga sa sakripisyo at serbisyo ng ating mga kawani sa uniformed services. Hanggang ngayon, patuloy kong sinusuportahan ang mga hakbang na naglalayong mapabuti ang kanilang kalagayan.

Isa rin sa mga isinusulong ko ang Senate Bill No. 684 o ang panukalang Scholarship for Children of Fallen Military and Uniformed Personnel. Kung maging batas, makapagbibigay ng tulong ang gobyerno sa edukasyon ng mga anak ng mga military at iba pang uniformed personnel na nasawi o permanenteng nawalan ng kakayahang magtrabaho habang ginagampanan ang kanilang tungkulin.

Saklaw ng panukala ang Armed Forces of the Philippines (AFP), Philippine National Police (PNP), National Bureau of Investigation (NBI), PCG, BFP, Philippine Drug Enforcement Agency (PDEA), at BJMP.

Maliit lamang ang inisyatiba na ito kung ihahambing sa laki ng kanilang sakripisyo. Gayunpaman, mahalagang malaman ng kanilang mga pamilya na hindi sila nakakalimutan at patuloy na kinikilala ng pamahalaan ang serbisyong ibinigay nila sa bayan.

Ako po ang principal author at isa sa mga co-sponsor ng Republic Act No. 12177 o ang Free Legal Assistance for Military and Uniformed Personnel Act. Sa ilalim ng batas, maaaring mabigyan ng legal na tulong ang mga uniformed personnel na nahaharap sa mga kasong may kaugnayan sa lehitimong pagganap ng kanilang opisyal na tungkulin.

Co-author din ako ng Republic Act No. 11549 na nagpababa sa minimum height requirement para sa PNP at iba pang uniformed services. Sa pamamagitan nito, mas maraming kwalipikadong Pilipino ang nabigyan ng pagkakataong maglingkod sa bayan.

Sinuportahan ko rin ang Republic Act No. 11200, na nag-ayos at nagpahusay sa rank classification ng PNP.

Naghain din ako ng Senate Bill No. 682 o ang Philippine Coast Guard Modernization Bill. Layunin nitong palakasin ang kagamitan, pasilidad, at kakayahan ng PCG upang mas magampanan nito ang tungkulin sa pagbabantay sa ating karagatan, pagtugon sa sakuna, at pagprotekta sa ating seguridad.

Kaugnay nito, sa aking mensahe para sa ika-28 anibersaryo ng 66th Infantry “Kabalikat” Battalion (66IB) ng Philippine Army noong July 10, ipinaabot ko ang aking pagbati at pasasalamat sa mga opisyal at kawal ng batalyon.

Sa mga opisyal at kawal ng 66th Infantry “Kabalikat” Battalion, maraming salamat po sa inyong serbisyo. Patuloy sana tayong maging tunay na magkatuwang sa pagpapanatili ng kapayapaan, kaligtasan, at soberanya ng ating bansa.

Samantala, noong July 9, personal tayong nagtungo sa Dolores, Quezon province upang dumalo sa First Provincial Assembly ng Philippine Councilors League (PCL) Quezon sa paanyaya ni PCL Quezon Chapter President at Board Member Aileen Malabanan-Dellosa. Ikinagalak nating makasama sina Vice Governor Third Alcala, Dolores Mayor Orlan Calayag, ilang vice mayors, at iba pang lokal na mambabatas mula sa lalawigan ng Quezon. Ipinaalala natin sa kanila na ang tunay na serbisyo publiko at pagmamahal sa kapwa Pilipino ay dapat laging nagmumula sa puso.

Kinagabihan, personal din tayong dumalo sa Installation and Inauguration Ceremony ng mga bagong halal na pambansang opisyal ng Fraternal Order of Eagles – Philippine Eagles para sa Eagle Year 2026–2028 na ginanap sa Pasay City. Bilang miyembro ng samahan, ipinaabot natin ang ating pagbati sa mga bagong halal na opisyal na pinangungunahan ng bagong luklok na National President Agaton Javier. Ipinaalala rin natin sa kanila na ang bawat posisyon ay dapat gamitin bilang pagkakataon upang maglingkod, itaguyod ang pagkakaisa, tumulong sa kapwa, at magpakita ng malasakit sa ating mga kababayan. Nagpasalamat din tayo kay outgoing National President Ronald delos Santos para sa kanyang tapat na paglilingkod.

Patuloy ring naghatid ng tulong ang ating Malasakit Team sa mga nangangailangan. Agad nilang tinulungan ang mga nasunugan sa Makati City; Pasay City; Malabon City; Tacloban City, Leyte; Cabatuan, Iloilo; Davao City; at Mati City, Davao Oriental.

Tinulungan din ang mga nasunugan na patuloy na bumabangon sa San Miguel, Leyte. Nakatanggap ang mga benepisyaryong ito ng tulong sa pabahay mula sa pambansang pamahalaan.

Nagpaabot din tayo ng tulong sa mga displaced workers sa Lupao, Nueva Ecija. Sinuportahan din ng ating Malasakit Team ang mga iskolar sa kanilang graduation sa Malabon City at Daet, Camarines Norte. Nakatanggap din ng tulong mula sa ating grupo ang mga indigents sa Mati City, Davao Oriental. Isinagawa ang mga outreach activity na ito sa pakikipag-ugnayan sa kani-kanilang lokal na pamahalaan.

Naghatid rin ako ng aking pakikiramay at suporta sa mga naiwang pamilya at mahal sa buhay ng mga namatay sa isang landslide sa Malapatan, Sarangani province. 

Bilang Mr. Malasakit, patuloy akong magtatrabaho at susuporta sa pagpapaunlad ng ating mga komunidad sa abot ng aking makakaya dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Senado, kinikilala ang natatanging tagumpay ng Pinoy athletes

ni Bong Go @Bisyo Magserbisyo | July 10, 2026

Nag-file ako ng magkakahiwalay na resolusyon sa Senado upang kilalanin at batiin sina Alexandra “Alex” Eala, Ernest John “EJ” Obiena, at Carlos Yulo sa kanilang mga tagumpay sa international sports.

Bilang Chairperson ng Senate Committee on Sports, naniniwala ako na mahalagang mabigyan ng pagkilala ang ating mga atletang patuloy na nagbibigay ng karangalan sa bansa. Malaking karangalan para sa ating bansa ang ipinakita nina Alex, EJ, at Carlos. Ipinakita nila na kayang makipagsabayan ng atletang Pilipino sa pinakamataas na antas kung may disiplina, tiyaga, at tamang suporta.

Partikular kong binigyang-diin ang naging historic run ni Alex Eala sa 2026 Wimbledon Championships. Siya ang naging unang Filipina na nanalo sa women’s singles main-draw match sa Wimbledon at unang Filipino sa Open Era na umabot sa fourth round, matapos niyang talunin ang defending champion ng torneo na si Iga Świątek ng Poland. Malaking tagumpay para sa Philippine tennis ang kanyang nakamit.

Ramdam natin kung gaano ka-proud ang buong bansa kay Alex Eala. Ang kanyang tagumpay ay inspirasyon sa maraming kabataang Pilipino. Patuloy niyang ipinapakita na kaya ng Pilipino na makipagsabayan sa international competitions.

Nais din nating pasalamatan para sa karangalang handog sa bansa si EJ, na nakakuha ng back-to-back gold medals sa 2026 outdoor athletics season, gayundin si Carlos, na nanalo ng gold medal sa men’s floor exercise sa 2026 Asian Men’s Artistic Gymnastics Championships.

Bilang isang atleta at sports enthusiast, naniniwala ako na marami tayong mga manlalaro sa bawat barangay at komunidad na naghihintay lang mabigyan ng pagkakataon, maayos na programa, at suporta. Kaya naman patuloy nating isinusulong ang mga panukala at programa para palakasin ang grassroots sports sa buong bansa.

Isa sa pinakamahalagang bahagi ng adbokasiyang ito ay ang National Academy of Sports o NAS, na itinatag sa ilalim ng Republic Act No. 11470, na aking iniakda at co-sponsored. Matatagpuan ito sa New Clark City sa Capas, Tarlac, at nagbibigay ng dual-track system na pinagsasama ang de-kalidad na secondary education at specialized sports curriculum upang matulungan ang young student-athletes na mapaunlad ang kanilang pag-aaral habang hinuhubog ang kanilang talento sa sports.

Upang mas mapalawak pa ang ganitong oportunidad, inihain natin ang Senate Bill No. 171, o ang proposed National Academy of Sports Regional Expansion Act of 2025, na naglalayong magtatag ng regional NAS campuses sa iba’t ibang bahagi ng bansa, lalo na sa Visayas at Mindanao. Sa pamamagitan nito, mas maraming kabataang atleta ang mabibigyan ng full scholarships, maayos na training, at pantay na pagkakataong maabot ang kanilang pangarap.

Pasado na rin sa Senado ang ipinaglaban natin na SB 1743 na naglalayong itaas at ipantay ang matatanggap na insentibo ng ating mga para-athletes sa kung ano ang tinatanggap ng iba pang national athletes. Dapat pantay ang pagkilala sa sakripisyo, husay, at karangalan na dala ng lahat ng atletang Pilipino.

Inihain din natin ang Senate Bill No. 413, o ang Philippine National Games bill, upang gawing institusyonal ang isang nationwide grassroots sports competition na magsisilbing recruitment platform para sa mga National Sports Associations. Kasabay nito, isinusulong din natin ang Senate Bill No. 678, o ang proposed National Tertiary Games Act, para magkaroon ng national collegiate multi-sport tournament na tutulong sa paghubog at pagpapakita ng talento ng ating mga atleta sa tertiary level.

Samantala, tuloy pa rin tayo sa pagbibigay ng serbisyo sa ating mga kababayang nangangailangan. Noong July 4, personal nating tinulungan ang mga nasunugan sa Barangay Ilang, Bunawan District, Davao City sa pakikipag-ugnayan kay 2nd District City Councilor Che Che Justol-Baguilod at Barangay Ilang Captain Amado Babao. Pagkatapos nito, nagtungo tayo sa Barangay 19-B Poblacion sa lungsod upang maghatid din ng tulong sa mga pamilya sa pakikipag-ugnayan kay 1st District City Councilor Atty. Luna Acosta, Kagawad Jenny Ann Monreal-Nicolas, at SK Chairman Robin Lo.

Bukod dito, nagpaabot din ang ating Malasakit Team ng iba’t ibang tulong sa mga nasunugang pamilya sa Mandaue City at Talisay City sa Cebu, Puerto Princesa City, at Cagayan de Oro City.

Natulungan din ng Malasakit Team ang mga residenteng nangangailangan mula sa iba’t ibang bayan sa Batangas, gaya ng Calaca, Balayan, Calatagan, Lemery, Lian, Nasugbu, Taal, at Tuy.

Namigay rin tayo ng dagdag na tulong sa ilang estudyante sa Sampaloc at Tondo sa Maynila. Nagpaabot din tayo ng tulong sa ilang indigents mula sa Lupon, Davao Oriental.

Nagbigay din ang ating team ng karagdagang tulong sa mga nasunugan sa Navotas City na patuloy na bumabangon. Nakatanggap din ang mga benepisyaryong ito ng tulong mula sa pambansang pamahalaan, na sinuportahan natin para sa pagbili ng mga materyales sa muling pagpapatayo ng kanilang mga tahanan.

Bilang Mr. Malasakit at Chairperson ng Senate Committees on Sports at on Youth, patuloy kong gagampanan ang aking tungkulin na bigyang-diin ang pangangailangang palakasin ang suporta para sa ating mga atleta, lalo na sa grassroots sports, training programs, at mga oportunidad para sa kabataang Pilipino. Marami tayong talento sa bawat paaralan, barangay, at komunidad na kailangan lang mabigyan ng tamang gabay, programa, pasilidad, at suporta.

Bisyo ko na ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Patibayin ang seguridad at suporta para sa ating mga mag-aaral

ni Bong Go @Bisyo Magserbisyo | July 3, 2026

Sunud-sunod ang mga nakakalungkot na insidente ng pamamaril at pananaksak na kinasasangkutan ng ilang mag-aaral sa iba’t ibang bahagi ng bansa. Kabilang dito ang nangyari sa Tacloban City, kung saan tatlong estudyante ang nasawi at marami pa ang nasugatan. Mas masakit isipin na ang mga itinuturong sangkot ay pawang mga menor de edad din.

Bilang Chairperson ng Senate Committee on Youth, nababahala ako sa malaking problema sa kakulangan sa seguridad para bantayan ang ating mga mag-aaral, mga guro, at iba pang school personnel.

Araw-araw, milyun-milyong kabataan ang pumapasok sa ating mga pampublikong paaralan. Dapat ang paaralan ay ligtas na lugar para sa pag-aaral, paggabay, at paghubog ng kinabukasan ng mga bata. Kaya dapat may sapat na sistema, tao, at kagamitan para mapanatili ang kanilang kaligtasan.

Pag-aralan din natin kung puwedeng mag-augment ang ating uniformed services, lalo na sa mga paaralang may mas mataas na security risk. Kailangan itong gawin nang maayos, may guidelines, at coordinated sa DepEd, local government units (LGUs), at concerned agencies. 

Bilang Vice Chairperson ng Senate Committee on Health, naniniwala ako na bukod sa seguridad ay dapat na seryosohin ang mental health sa mga paaralan. Mental health issue is real, kaya mahalaga ang guidance counseling, psychosocial support, at maagang intervention sa mga eskwelahan.

Kaya isinulong ko ang Senate Bill No. 176, na naglalayong magkaroon ng Mental Health Offices sa lahat ng public higher education institutions sa bansa. Layunin nitong magkaroon ng libreng counseling services, trained mental health professionals, at 24/7 mental health hotlines para sa mga estudyante.

Kaisa rin ako sa pagsulong para suriin na ang Republic Act No. 9344 o ang Juvenile Justice and Welfare Act, na inamyendahan ng Republic Act No. 10630, lalo na sa mga kasong sangkot ang ‘children at risk’ at ‘children in conflict with the law.’ Kailangang protektahan ang kabataan, pero kailangan ding tiyakin ang pananagutan, rehabilitation, at tamang intervention.

Ang mga nangyaring karahasan sa ating mga kabataan ay dapat magsilbing paalala sa ating lahat. Hindi natin dapat hintayin na maulit pa ito bago umaksyon. 

Samantala, tuloy pa rin ang pamamahagi natin ng tulong sa mga kababayan nating nangangailangan. Sa Davao Oriental, naghatid tayo ng tulong sa iba’t ibang sektor ng komunidad. Nagbigay tayo ng suporta sa mga miyembro ng Tricycle Operators and Drivers Association (TODA) sa San Isidro, sa mga vendor at mga kapatid nating Muslim sa Lupon, at sa mga barangay workers sa Banaybanay.

Dumalo rin ako sa blessing at inagurasyon ng Super Health Center sa Maco, Davao de Oro, sa imbitasyon ni Mayor Voltaire Rimando.

Noong nakaraang linggo, ang ating Malasakit Team ay nagpaabot din ng tulong sa iba’t ibang bahagi ng bansa. Agad silang umalalay sa mga nasunugan sa Taguig City, Ormoc City at Abuyog sa Leyte, at Sibuco sa Zamboanga del Norte. Namahagi rin tayo ng tulong sa mga indigents nating kababayan sa Balayan, Batangas.

Dumalo rin ang ating team sa turnover ng Sibuco Super Health Center sa Zamboanga del Norte, kung saan namahagi tayo ng grocery packs sa mga barangay health workers.

Bilang Mr. Malasakit, patuloy kong isusulong ang mga hakbang na makatutulong sa ating mga kababayan, lalo na sa ating kabataan. Dapat ligtas sila sa paaralan, may malalapitan kapag may pinagdadaanan, at may sapat na suporta mula sa pamilya, komunidad, paaralan, at pamahalaan. 

Bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.