Pondo ng Health, dapat gamitin para sa health!

ni Bong Go @Bisyo Magserbisyo | Dec. 14, 2024

Niratipikahan na ng Senado noong December 11 ang Bicameral Committee Report kung saan nakasaad na zero budget, o hindi maglalaan ang gobyerno ng pondo para sa Philippine Health Insurance Corporation (PhilHealth) sa susunod na taon. Mariin natin itong tinutulan at patuloy nating ihahayag ang hinaing ng taumbayan laban dito.

Bagama’t nadiskubre natin na may mahigit P500 bilyong reserve fund ang PhilHealth matapos ang sunud-sunod na Senate Health Committee hearings na ating pinangunahan, hindi ako sumasang-ayon na tuluyan na nating hindi bigyan ng subsidiya ang PhilHealth. Anti-poor ito at hindi katanggap-tanggap!

Napakahalaga na matiyak ng gobyerno ang suporta nito sa PhilHealth para mas mapalawak pa ang mga benepisyo nito lalo na sa mga mahihirap na pasyente. Pero paano ito maisasagawa ng ahensya kung ni piso ay walang ibibigay na subsidiya ang gobyerno para rito?

Ipinaglalaban natin ang tamang paggamit ng pondo ng PhilHealth, pero dapat ding suportahan natin ang hangaring ito sa pamamagitan ng pagsigurong mapupunta sa health ang pondo na para naman talaga sa health — na naaayon sa batas! Hindi ito dapat mapunta sa ibang paggagamitan. Ang tanong kasi ng taumbayan: Kung hindi popondohan ang PhilHealth, saan inilagay ang budget na unang inilaan para rito?

Tandaan natin na alinsunod sa Universal Health Care Law, dapat ay ibaba natin nang husto ang bayaring pangmedikal ng bawat Pilipino sa mga susunod na taon. Malayung-malayo pa tayo sa hangaring ito, at baka lalo pa tayong aatras dahil sa zero budget ng PhilHealth.

Uulitin ko, mga mahihirap na pasyente ang kawawa rito. Malaking tulong sa indigent patients kung mapapaganda ang benepisyo ng PhilHealth para mabawasan ang kanilang gastos o out-of-pocket expenses. Imbes na ibayad sa ospital, puwede na nila itong ipambili ng gamot, pagkain, at iba pa nilang pangangailangan.

Gayunpaman, bilang vice chair ng Senate Finance Committee at Chairperson ng iba’t ibang komite sa kalusugan, sa kabataan, at sa sports, suportado ko ang ibang mga probisyon sa panukalang budget na naglalayong paigtingin ang mga programa para sa mahihirap at pinakanangangailangan.

Basta para sa interes ng ating mga kababayan, susuporta ako. Pero kapag may nakikita akong mali, magsasalita ako bilang inyong Mr. Malasakit na walang ibang bisyo kundi magserbisyo!

Bilang chair ng Senate Committee on Sports, at on Youth, sinaksihan natin ang ginanap na CHED All-Star Basketball Friendship Game Opening Ceremony sa Quezon City sa paanyaya ni CHED Chair Popoy de Vera. Muling binigyan natin ng tulong ang 228 residente ng Taguig City na naging biktima ng sakuna. Nakatanggap din sila ng emergency housing allowance mula sa NHA na ating isinulong para may pambili ang mga benepisyaryo ng materyales na pagpapaayos ng kanilang nasirang tirahan. Dumalo rin tayo sa Oriental Mindoro Mayors Christmas Party sa paanyaya ni Governor Bonz Dolor, na ginanap sa Maynila. Dumaan din tayo at bumati ng maligayang Pasko sa LMP National Officers na nagtipun-tipon sa parehong lugar.

Nag-abot din tayo ng tulong para sa 1,500 mahihirap na residente ng Labangan, Zamboanga del Sur katuwang si Mayor Eddie Relacion. Sa ating inisyatiba, nabigyan din ang mga benepisyaryo ng tulong pinansyal ng lokal na pamahalaan. Nagpaabot din tayo ng mensahe sa ginanap na Philippine Councilors League Negros Occidental Year End Assembly na ginanap sa Bacolod City.  

Kahapon, pumunta ako sa Pangasinan, kung saan ako ay isang adopted son, at namigay ng regalo para sa 1,500 day-care students at kanilang guardians sa Calasiao kasama sina Vice Gov. Mark Lambino, Mayor Kevin Macanlalay, Vice Mayor Nestor Gabrillo, at BM Shiela Baniqued. Pagkatapos ay personal nating pinangunahan ang pagbibigay ng tulong sa 1,000 mahihirap katuwang si Governor Ramon Guico, na sa ating pamamagitan ay napagkalooban din ng lokal na pamahalaan ng tulong pinansyal. Nakiisa rin tayo sa ginanap na Barangay Captains Day sa Lingayen na dinaluhan ng 1,500 katao.

Sinaksihan naman ng aking opisina ang inagurasyon ng Super Health Center sa Bansud, Oriental Mindoro kasama si Mayor Ronaldo Morada.

Pinagkalooban tayo ng parangal bilang “Outstanding Servant Awardee” ng Golden Globe Annual Awards for Business Excellence (GGAABE) and Filipino Achievers na ginanap sa Maynila. With or without award, patuloy akong magseserbisyo.

Nagpaabot din ang aking opisina ng tulong para sa 1,000 estudyante ng Candaba, Pampanga, katuwang si Mayor Rene Maglanque.

Sa pamamagitan ng aking Malasakit Team, nagbigay tayo ng dagdag na tulong sa mga naging biktima ng kalamidad gaya ng 34 sa Maco, Davao de Oro; 269 sa Las Piñas City; 50 sa Pateros; 36 sa Makati City; at 67 sa Bacoor City, Cavite. Nakatanggap din sila ng emergency housing allowance mula sa NHA na ating isinulong.

Nagkaloob din tayo ng dagdag na suporta para sa 347 scholars sa Dapitan City. Naalalayan natin ang 88 nawalan ng hanapbuhay sa San Jose, Tarlac katuwang si Mayor Romeo Capitulo, na sa ating pakikipagkapit-bisig sa DOLE ay nabigyan din ng pansamantalang trabaho.  

Sa aking pagtupad sa tungkuling ipinagkatiwala at iniatang ninyo sa akin, ang laging layunin ko ay makapagtrabaho at makapagserbisyo sa inyo, lalo na sa mga mahihirap at higit na nangangailangan, sa abot ng aking makakaya.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pangalagaan at pahalagahan ang mental health ng ating kabataan!

ni Bong Go @Bisyo Magserbisyo | Dec. 11, 2024

Isa sa mga prayoridad natin ay ang mga kabataan, lalo na pagdating sa kanilang mental health. Dahil na rin sa epekto ng COVID-19 pandemic, mas naging talamak ang usapin ng mental health kaya’t tinitingnan na natin ito ngayon sa mas malawak na perspektiba.

Nakakalungkot na sa panahon ng krisis, maraming kabataan ang naapektuhan ang mental health. Noong 2021 sa kasagsagan ng pandemya, batay sa datos ay mahigit 400 Filipino learners ang kinitil ang sariling buhay, habang higit isang libo ang nagtangkang mag-suicide. Mahigit 22 porsyento ng ating mga kababayan ang napaulat na humingi ng professional help sa mga mental health professionals.

Bilang chairperson ng Senate Committees on Health at on Youth na nagsusulong ng mga repormang pangkalusugan sa ating bansa lalo na para sa kabataan na pag-asa ng ating bayan, masaya kong ibinabalita na isa nang batas ang Republic Act No. 12080, o ang Basic Education Mental Health and Well-Being Promotion Act noong December 9. Co-author at co-sponsor tayo ng bagong batas na ito na naglalayong matugunan ang nakababahalang mental health issue sa mga kabataang estudyanteng Pilipino. 

Sa ilalim ng RA 12080, hindi lang magtatayo ng care centers para sa mental health services sa lahat ng pampublikong paaralan, kukuha rin ng professionals na may sapat na kakayahan para sa serbisyong ito. Isa itong mahalagang hakbang para maitaas ang antas ng kamalayan sa isyu ng mental health. Ang mga guro at guidance counselors ang kaagapay natin sa pagbibigay ng suporta sa mga estudyante sa harap ng kanilang mga pagsubok na pinagdaraanan. Ang mental health issues ay hindi kahinaan kundi bahagi ng ating kalusugan na dapat nating tutukan at solusyunan.

Dahil buhay at kinabukasan ang nakataya, kailangang gawing mas accessible at abot-kaya ang serbisyong pangkalusugan ng isip para sa lahat ng mag-aaral. Hindi nila dapat maramdaman na mag-isa lang sila sa kanilang mga laban.

Dagdag dito, hindi natin dapat kalimutan ang mga mag-aaral sa state colleges and universities lalo na sa panahon ngayon kung saan ramdam pa rin natin ang epekto ng pandemya, mga isyu ng ekonomiya, at hirap na dulot ng mga sakuna. Isinusulong din natin ang Senate Bill No. 2598, o ang panukalang State Universities and Colleges (SUCs) Mental Health Services Act bilang isa sa mga may akda at co-sponsor nito. Kapag maisabatas, layunin nitong magpatayo ng Mental Health Offices sa bawat SUC campus para sa komprehensibong suporta at intervention sa mga estudyante, pati na sa faculty at staff.

Kailangan ding matiyak ang maayos na implementasyon ng RA 11036, o ang Philippine Mental Health Act, na naisabatas noong panahon ni dating Pangulong Rodrigo Duterte. Sa ilalim nito, ginagarantiyahan na ang bawat Pilipino ay may karapatang magkaroon ng access sa mental health care. Layunin din nito na maisama ang mental health programs sa ipinatutupad na programang pangkalusugan sa mga barangay at komunidad. 

Ang malinaw at payapang pag-iisip ay isang karapatan ayon mismo sa World Health Organization. Bilang inyong Senator Bong Go, patuloy kong isusulong ang mga programa para walang Pilipinong maiiwan at mapapabayaan. 

Samantala, nasa Davao De Oro tayo noong December 7 at nag-inspeksyon sa itinayong multi-purpose building at Super Health Center sa Maco. Personal din nating pinangunahan ang pamamahagi ng tulong sa 521 residenteng nabiktima ng landslide, na nakatanggap din ng emergency housing allowance mula sa NHA na ating isinulong para may pambili sila ng materyales na pampaayos ng kanilang nasirang tahanan. 

Sinaksihan natin sa pamamagitan ng video call at nagpaabot tayo ng mensahe noong December 8 sa ginanap na Panlalawigang Pederasyon ng mga Sangguniang Kabataan-Iloilo Province Year End Assessment Opening Ceremony sa Aklan sa paanyaya ni PPSK President BM Esara Javier; gayundin ang idinaos na Barangay Councilors League of the Philippines - Cebu City Christmas Party sa Cebu City sa imbitasyon ni BCLP Cebu President Dante Tabucal. 

Ginawaran naman tayo ng parangal bilang Premier Achiever Outstanding Public Servant sa 2nd Southeast Asian Premier Business and Achiever Award na idinaos sa Maynila. Nagpapasalamat tayo sa pagkilalang ito. With or without award, tuluy-tuloy lang ang pagseserbisyo ko sa mga Pilipino.  

Noong December 9 at kahapon, December 10, dumalo tayo sa ginanap na KABAKA 39th Anniversary sa Ninoy Aquino Stadium, sa paanyaya nina former representatives Crystal Bagatsing at Amado Bagatsing. Sumuporta rin tayo sa ginanap na Liga ng mga Barangay Bulacan Chapter Year End Assembly sa Malolos City, Bulacan sa imbitasyon ni LNB Chapter President Fortunato Angeles. 

Wala ring patid ang paghahatid ng tulong ng ating Malasakit Team. Naalalayan natin ang mga naging biktima ng magkakahiwalay na insidente ng sunog kabilang ang 20 sa Davao City; tatlo sa Iloilo City; at 62 sa Cagayan de Oro City.

Binalikan natin at muling binigyan ng tulong ang mga naging biktima ng kalamidad gaya ng 380 sa Cebu City, Talisay City at Minglanilla, Cebu; at 19 sa Cagayan de Oro City. Nakatanggap din sila ng emergency housing allowance mula sa NHA sa ilalim ng programang ating isinulong.  

Naabutan natin ng tulong ang 200 mahihirap na residente ng Sta. Teresita, Batangas, na sa ating pakikipagtuwang kay VM Marie Segunial ay nakatanggap din ng financial assistance mula sa gobyerno. 

Gayundin, ang 53 nawalan ng hanapbuhay sa Bustos, Bulacan kaagapay si VM Martin Angeles — na sa ating pakikipagkapit-bisig sa DOLE ay nabigyan ng pansamantalang trabaho. 

Nagbigay din tayo ng dagdag na tulong sa 2,000 TESDA graduates sa Ormoc City at Tacloban City katuwang ang Philippine Call Center Institute. 

Bilang inyong Mr. Malasakit, isa sa mga prayoridad natin ang ating mga kabataan dahil sila ang future leaders at pag-asa ng ating bayan. Pangalagaan natin ang mental health dahil ang kalusugan ay katumbas ng buhay ng bawat Pilipino. Patuloy akong magseserbisyo sa inyong lahat dahil bisyo ko na ang magserbisyo, at naniniwala akong ang serbisyo sa tao ay serbisyo rin sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Ligtas Pinoy Centers Act, batas na!

ni Bong Go @Bisyo Magserbisyo | Dec. 7, 2024

Unti-unti nang nagbubunga ang ating matagal nang adbokasiya na magkaroon ng maayos at kumportableng evacuation centers ang mga kababayan nating naaapektuhan sa panahon ng kalamidad at sakuna.

Masaya kong ibinabalita na isa nang ganap na batas ang panukala natin na kung maipatutupad nang tama ay poprotekta sa dignidad at buhay ng mga Pilipinong biktima ng kalamidad. 

Kahapon, December 6, ay nilagdaan na ni Pangulong Ferdinand Marcos, Jr. ang Republic Act No. 12076: “An Act establishing evacuation centers for every city and municipality and appropriating funds therefor” o kilala bilang Ligtas Pinoy Centers Act. Sa ilalim nito, magtatayo ng ligtas, permanente at kumpleto sa mga pasilidad na evacuation centers sa mga siyudad at munisipalidad sa buong bansa. Tayo ang principal author at isa sa co-sponsors nito sa Senado. 

Sa panahon ng kalamidad, masakit makitang ang pinaghirapang ipundar ng ating mga kababayan sa loob ng mahabang panahon ay naglahong parang bula. Mas masakit lalo na kung may nasawi. Panahon na para tiyakin ang kaligtasan, seguridad at dignidad ng ating mga evacuees. Hindi man maiwasan ang krisis, ang mga naghihirap ay dapat huwag nang pahirapan pa. 

Napakalungkot makita ang ating mga kababayan na nagsisiksikan sa mga hindi angkop na lugar gaya ng mga eskwelahan na apektado maging mga estudyante dahil naaantala ang kanilang klase; at sa covered courts na walang sapat na sanitation. Kung minsan ay sa kalsada na lang. Kaya ang bagong batas na ito ay isang malaking hakbang para sa kaligtasan at kaginhawaan ng ating mga kababayan. Patuloy nating ipaglalaban ang maayos na implementasyon ng batas na ito.

Kahapon din ay nilagdaan na para maging batas ang Republic Act No. 12077, o ang “Student Loan Payment Moratorium During Disasters and Emergencies Act,” na naglalayon na maibsan ang problemang pinansyal ng mga estudyante at kanilang pamilya kapag may kalamidad at iba pang krisis. Co-sponsor at co-author tayo nito.  

Ang tanong marahil ng maraming kabataang mag-aaral: “Dapang-dapa kami sa delubyo, paano na ang student loan ko?” Kaya natin isinulong ang Student Loan Payment Moratorium During Disasters and Emergencies Law ay para mabigyan ng palugit ang mga estudyanteng may pagkakautang pero hindi makabayad dahil tinamaan ng kalamidad at iba pang sakuna. 

Ang edukasyon ay susi para sa mas magandang kinabukasan ng mga kabataan. Sa pamamagitan ng bagong batas na ito, masisiguro nating hindi magiging hadlang ang krisis sa pagkakamit ng kanilang pangarap. Hindi natin hahayaang maging dagdag na pasanin pa nila ang student loans sa gitna ng mga kalamidad.  

Bahagi rin ito ng ating inisyatiba bilang chairperson ng Senate Committee on Youth na maprotektahan ang karapatan ng bawat Pilipino sa de-kalidad na edukasyon, na isa sa mga pundasyon sa pagsulong at pag-unlad ng ating bansa. Bigyan natin ng sapat na pagkakataon ang mga kabataan na makapagtapos ng pag-aaral dahil sila ang pag-asa at future leaders ng ating bayan.

Hindi naman tayo tumitigil sa paghahatid ng serbisyo sa mga nangangailangan at sa pakikipagkapit-bisig sa kapwa natin lingkod-bayan upang ilapit ang gobyerno sa tao.

Dumalo tayo sa ginanap na Vice Mayors’ League of the Philippines 4th Quarter 2024 National Executive Board Meeting Opening Ceremonies sa paanyaya ni VM Ninong dela Cruz noong December 4 sa Maynila. Pinagkalooban nila tayo ng “Pasasalamat Award” dahil sa ating pagiging consistent na kaalyado ng mga bise alkalde.

Guest of honor and speaker tayo sa 4th Siklab Youth Sports Awards na ginanap noong December 5 sa Taguig City, kung saan ginawaran tayo ng “Lifetime Achievement Award” dahil sa ating patuloy na suporta sa ating mga atleta at sa pagpapalaganap ng sports program na pangunahin nating adhikain bilang tayo ang chairperson ng Senate Committee on Sports. 

With or without an award, patuloy ang ating suporta sa ating mga atleta at pagseserbisyo sa kapwa Pilipino sa abot ng ating makakaya. 

Ang aking Malasakit Team naman ay tumulong sa Aklan para sa 1,162 mahihirap na residente ng Malinao, at 1,743 sa Makato. Sa ating inisyatiba katuwang si Gov. Joen Miraflores ay nakatanggap din sila ng tulong pinansyal. 

Nasa Cebu tayo kahapon, December 6, at personal na pinangunahan ang pagkakaloob ng tulong para sa 678 na nawalan ng tirahan sa Mandaue City. Matapos ito ay nagsagawa tayo ng katulad na relief effort para sa 799 na nawalan din ng tirahan sa Lapu-Lapu City. Ang mga benepisyaryo ay nabigyan din ng emergency housing allowance mula sa NHA na ating isinulong para may pambili sila ng materyales sa pagpapaayos ng kanilang tahanan. Dumalo rin tayo sa League of Municipalities of the Philippines Cebu Chapter Year End General Assembly sa paanyaya ni LMP President Mayor Sun Shimura. 

Sinaksihan din natin ang pamamahagi ng aking opisina ng tulong para sa 926 na nawalan ng tirahan sa Cebu City, na nabigyan din ng tulong pinansyal ng NHA sa ating inisyatiba.

Ang aking Malasakit Team ay naghatid din ng tulong sa iba’t ibang komunidad tulad ng 509 mahihirap na residente ng Braulio E. Dujali, Davao del Norte katuwang si Mayor Leah Marie Romano. Binalikan natin at muling binigyan ng tulong ang apat na residente ng Barangay Leon Garcia, Davao City na nawalan ng tirahan, na sa ating inisyatiba ay nakatanggap din ng tulong mula sa NHA. 

Naghatid tayo ng tulong sa 98 residente ng Bacnotan, La Union na nawalan ng hanapbuhay katuwang si Mayor Divine Fontanilla; at 198 sa Maigo, Lanao del Norte kaagapay si BM Joseph Neri. Sa ating pakikipagkapit-bisig sa DOLE, nabigyan din sila ng pansamantalang trabaho.

Nagkaloob din tayo ng dagdag na tulong para sa 100 scholars sa Biliran province.

Proteksyunan natin ang dignidad ng bawat Pilipino lalo na ang mga biktima ng sakuna. Patuloy akong magseserbisyo sa inyo sa abot ng aking makakaya dahil bisyo ko na ang magserbisyo, at naniniwala ako na ang serbisyo sa tao ay serbisyo rin sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.