Lahat puwedeng maging bayani sa pagtulong, pagmamalasakit at pagseserbisyo!

ni Bong Go - @Bisyo Magserbisyo | April 30, 2021

Inaprubahan ni Pangulong Rodrigo Duterte ang pananatili ng MECQ sa NCR Plus hanggang Mayo 14. Ipinagbabawal din muna ang mga biyahe mula sa India kasunod ng patuloy na pagtaas ng mga kaso ng COVID-19 doon. Muling pinaalalahanan ng gobyerno ang taumbayan na patuloy na mag-ingat at sumunod sa mga patakaran upang maiwasan ang lalong pagkalat ng sakit sa ating komunidad.

Kailangan nating gawin ang mga hakbang na ito upang maiwasan ang dagdag-pasakit sa healthcare system. Bagama’t sinisikap nating pasiglahin muli ang ating kabuhayan, nananatiling prayoridad natin ngayon ang kaligtasan at buhay ng bawat Pilipino.

Dumating na rin kahapon ang dagdag na 500,000 Sinovac vaccine doses mula China at inaasahan nating marami pang darating sa susunod na mga araw. Magtiwala tayo at huwag matakot sa bakuna, matakot tayo sa COVID-19. Ang bakuna ang susi para unti-unti na tayong makabalik sa normal na pamumuhay.

Habang patuloy ang laban kontra COVID-19, walang tigil ang gobyerno sa pagpapalakas ng serbisyong pangkalusugan sa iba’t ibang parte ng bansa. Kasama ang pagbukas ng ika-103 na Malasakit Center sa Cebu Provincial Hospital – Carcar City sa Cebu noong Martes sa ilalim ng programang ating isinabatas.

At para masigurong walang maiiwan sa muling pagbangon ng bansa, tuluy-tuloy din ang pagtulong sa mga kababayang nangangailangan. Kasama ang mga ahensiya ng gobyerno, nagbigay tayo ng dagdag-suporta sa mga komunidad na nasa krisis. Sa aming pag-iikot, siniguradong nasusunod ang mga patakaran upang maiwasan ang pagkalat ng sakit.

Mula Abril 24 hanggang Abril 29, nag-abot tayo ng tulong sa mga nasalanta ng sunog tulad ng 96 na pamilyang biktima mula sa Parañaque City; 116 mula sa Caloocan City; 138 katao naman mula sa Bacoor City, Cavite; 75 pamilya mula sa Bahay Toro at North Fairview, Quezon City; 12 pamilya mula sa Muntinlupa City; at 13 pamilya mula sa Mandaluyong City.

Patuloy din tayong tumutulong sa mga biktima ng mga nakaraang sakuna tulad ng 400 na katao sa Hinatuan, 2,301 sa Carmen, at 471 mula sa Bislig City sa probinsya ng Surigao del Sur; 680 na biktima sa Mainit, 2,122 sa Tagana-an, 555 sa Sison at 52 sa Claver, sa probinsya naman ng Surigao del Norte; 1,096 katao sa Cabadbaran City, Agusan del Norte; at 122 sa Loreto, Agusan del Sur.

Dagdag pa ang mga natulungan din natin na 508 katao mula sa Mati City, Davao Oriental; 508 katao mula sa Tagum City, Davao del Norte; at 508 katao rin mula sa Digos City, Davao del Sur. Binigyan din natin ng tulong ang halos 1,000 katao mula sa Catubig, 332 sa Catarman, mahigit 1,000 katao sa Laoang, at 664 katao naman mula sa Pambujan, sa probinsiya ng Northern Samar na naging biktima ng nakaraang Bagyong Bising.

Sa mga hirap naman ang kabuhayan, namigay tayo ng dagdag-suporta sa 400 displaced workers mula sa media at transport sectors sa Quezon City; 917 katao mula sa vulnerable sectors sa Bulakan, Bulacan; at 3,832 vendors, habal-habal drivers at TODA members sa Carcar City, Cebu na akin namang personal na pinuntahan.

Naging makabuluhan din ang linggong ito dahil sa pagdiriwang ng ika-500 anibersaryo ng Victory sa Mactan sa Lapu-Lapu City.

Tulad ng naging labanan sa Mactan noon kung saan nagkaisa ang ating mga ninuno at sinuportahan ang kanilang pinuno na si Lapu-Lapu laban sa mga mananakop, ito rin ang aral na dapat nating isapuso sa laban ngayon kontra COVID-19. Lahat tayo ay puwedeng maging bayani sa panahong ito ng pandemya sa pamamagitan ng pagtulong, pagmamalasakit, at pagseserbisyo — hindi sa pagbabatikos at paghahanap ng mali sa kapwa Pilipino.

Mahalaga na tayo ay magbalik-tanaw sa kasaysayan, ngunit mahalaga rin na may pagtutuwid tayo sa nakaraan — upang maunawaan ang kasalukuyan at magkaroon ng lakas-loob na harapin ang ating kinabukasan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Hindi katanggap-tanggap na may “VIP vaccinations” sa iilang LGUs

ni Bong Go - @Bisyo Magserbisyo | April 28, 2021

Habang patuloy ang laban kontra COVID-19, nakatuon ang ating isip at puso sa magigiting na medical frontliners na araw-araw ay itinataya ang kanilang buhay upang mapanatili tayong ligtas. Hindi lingid sa ating kaalaman na marami sa mga tinamaan at kalaunan ay binawian ng buhay ay pawang mga health workers.

Kaya naman, inuuna ng gobyerno ang pagbabakuna sa medical frontliners sa gitna ng tumataas na bilang ng kaso ng COVID-19 para agaran silang mabigyan ng sapat na proteksiyon at sandata sa giyerang ito.

Gayunman, naniniwala tayong hindi natatapos dito ang mga hakbang na puwede nating gawin upang mas mapalakas ang pagtugon sa pandemya. Kamakailan, umapela tayo kay National Task Force Against COVID-19 Chief Implementer Secretary Carlito Galvez, Jr. at Health Secretary Francisco Duque III para isama ang staff ng Professional Regulation Commission na nagsasagawa ng professional board exams sa A4 priority group ng vaccination plan ng gobyerno. Sumang-ayon si Secretary Duque at Secretary Galvez sa apela nating ito.

Kung protektado ang examiners, proctors at iba pang personnel ng PRC, maisasagawa natin sa lalong madaling panahon at ligtas na paraan ang mga professional board exams. Mas mabilis nating madaragdagan ang medical frontliners sa mga ospital na may COVID-19 patients. Mas matutulungan ang mga kababayan nating maipagpatuloy ang kanilang propesyon para sa kanilang kabuhayan.

Nitong Marso lamang, marami ang nagsipagtapos sa pag-aaral at kinakailangan na lang pumasa ng board exam para maging ganap na health professional. Kaya naman, huwag na nating patagalin pa ang paghihirap ng ating frontliners. Gawin na natin ang kinakailangan para matulungan at madagdagan ang bilang nila.

Habang tinutugunan natin ang mga pangangailangan ng medical frontliners, tutukan din natin ang ibang pangangailangan ng ating mga kababayang maaaring mawalan ng kabuhayan kung patuloy na maaantala ang mga operasyon ng PRC.

Kaya ngayong tuluy-tuloy na ang ating pagbabakuna sa bansa, muli tayong umaapela sa mga kasamahan sa pamahalaan na siguraduhing makararating ang mga bakuna sa medical frontliners at pinaka-nangangailangan, tulad ng senior citizens, may comorbidities, essential workers, at mahihirap na kinakailangang lumabas ng bahay para magtrabaho.

Sumunod tayo sa patakaran. Hindi katanggap-tanggap na may mga nagaganap na “VIP vaccinations” sa iilang LGUs. Paano matatapos ang pagbabakuna ng mga frontliners kung may mga sumisingit? Alalahanin nating nagpapakahirap ang mga frontliners para isalba ang buhay ng ating mga kababayan. Kaya unahin sila sa bakuna upang masigurong hindi bumagsak ang ating healthcare system at para mas marami pang buhay ang mailigtas.

Magtiwala at sundin ang National Vaccination Program ng gobyerno dahil ang bakuna ang tanging susi tungo sa pagbalik sa normal na pamumuhay at importanteng solusyon para malampasan ang pandemyang ito.

Habang patuloy ang pagbabakuna at inaasahan nating darating na rin ang dagdag-supply sa susunod na mga araw, huwag tayong magkumpiyansa. Mas paigtingin pa ang pag-iingat at pagsunod sa mga patakaran. Magtulungan, magmalasakit, at makiisa tayo sa bayanihan para mas maproteksiyunan ang buhay, kapakanan at kabuhayan ng ating mga kababayan!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Isulong at suportahan ang bayanihan sa mga komunidad

ni Bong Go - @Bisyo Magserbisyo | April 24, 2021

Nitong mga nagdaang araw, naging usap-usapan ang community pantries at iba pang inisyatibo ng ordinaryong mamamayan para makatulong sa kapwa. Nakatutuwang makita ang patuloy na pakikipagbayanihan ng mga Pinoy sa kabila ng matinding hamon na kinahaharap ng bawat isa sa atin ngayon.

Sang-ayon ang gobyerno na dapat makiisa tayong lahat sa mga inisyatibo ng ating mga komunidad. Kaya nanawagan tayo mga kapwa lingkod-bayan, kasama na rin ang mga sundalo at kapulisan, na makisama tayo at suportahan ang mga community pantries sa pamayanan.

Kapag ang gobyerno ay may programa para sa tao, ineenganyo natin ang publiko na sumunod at makiisa. Kaya kapag ang publiko naman ang may sariling inisyatibo na makabubuti sa taumbayan, tungkulin din ng mga nasa gobyerno na magbigay-suporta, makilahok at paigtingin pa ito lalo para mas marami ang makabenepisyo.

Iisa lang naman ang hangarin nating lahat at ‘yan ay ang maiahon ang buong bansa mula sa krisis na ito. Kung sama-sama tayo tungo sa iisang layunin, mas makasisiguro tayong walang mas maghihirap, walang mas magugutom, at walang maiiwang Pilipino tungo sa ating muling pagbangon bilang matatag na sambayanan.

Nitong Martes, namahagi tayo ng tulong sa mahigit isang daang sundalo ng 10th Infantry Division sa okasyon ng kanilang blood donation sa Bgy. Tuboran, Mawab, Davao de Oro. Tinulungan din natin ang 336 kataong nasunugan sa Zone 9, Brgy. 61, Pasay City. Umabot sa 3, 582 residente naman na apektado ng nagdaang Bagyong Auring ang nabigyan natin ng ayuda sa San Agustin, Surigao del Sur sa loob ng dalawang araw.

Pagdating naman ng Miyerkules, dumayo tayo sa Sta. Praxedes, Cagayan kung saan 95 na residente na apektado ang kabuhayan ng pandemya ang ating tinulungan. Namahagi rin tayo ng tulong sa 2,622 na mga kababayang Aeta sa Porac at 51 biktima ng sunog sa Mabalacat sa probinsiya ng Pampanga.

Kahapon naman ay patuloy pa rin ang pag-iikot ng ating opisina. Nag-abot tayo ng tulong sa mga nabiktima ng sunog sa iba’t ibang parte ng bansa — 20 pamilya sa Barobo at 23 pamilya sa Tandag City, Surigao del Sur, 13 pamilya sa Quezon City at 22 pamilya sa Cagayan de Oro City. Maliban pa riyan, bumalik ang ating opisina sa Pampanga upang maghatid ng tulong sa mga kababayan nating Aeta sa Floridablanca na umabot sa 1, 320 katao. Sa mga nabiktima naman ng nagdaang bagyo sa Mindanao, nakapagdala tayo ng tulong sa 1,646 katao sa Barobo, Surigao del Sur, 559 katao sa Kitcharao, Agusan del Norte, at 187 katao sa San Francisco, Surigao del Norte. At panghuli, dumayo ang ating opisina sa Mallig, Isabela upang mag-abot ng tulong sa 228 kataong lubhang apektado ng pandemya.

Sa bawat lugar, namigay tayo ng masks, face shields, vitamins, food packs, pagkain, at iba pang klase ng tulong. Kasama na riyan ang paghati-hati sa ilang batches ng mga benepisaryo, pagkakaroon ng social distancing at iba pang mga hakbang upang maiwasan ang hawaan ng sakit.

Palagi nating isapuso na karangalan at tungkulin ng bawat Pilipinong maging parte ng bayanihan. Kung anumang kabutihan ang puwede nating gawin para sa kapwa ay gawin na natin ngayon. Kung anumang biyaya ang meron tayo, ipamahagi rin natin ito ayon sa ating kakayanan. At kung may sobra tayong kagamitan o pagkain sa bahay, ipagkaloob sa iba kaysa masira, mag-expire o mabulok. Huwag natin hayaan na masayang ang biyayang meron tayo lalo na kung mapapakinabangan ito ng ibang mas nangangailangan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.