Basta kapakanan ng mga Pinoy, dapat ipaglaban!

ni Bong Go - @Bisyo Magserbisyo | June 02, 2021

Ikinatutuwa nating ibalita na nitong Lunes, May 31, pumasa na sa third and final reading ang 13 local hospital bills na ating ipinaglaban sa Senado.

Nagpapasalamat tayo sa ating mga kasamahan sa Senado, sa majority at pati rin sa minority, sa kanilang suporta upang maibigay sa taumbayan ang serbisyong medikal na kailangan at nararapat para sa kanila — anuman ang antas nila sa buhay, kahit saanman silang lugar sa bansa.

Ang ilan sa mga ito ay ang pagdagdag ng bed capacity ng Lying-in Clinic sa Rizal, Palawan; Naguilian District Hospital sa Naguilian, La Union; Rosario District Hospital sa Rosario, La Union; Sinait District Hospital sa Sinait, Ilocos Sur; East Avenue Medical Center sa Quezon City; Mayor Hilarion A. Ramiro Sr. Medical Center sa Ozamiz City, Misamis Occidental at Eastern Visayas Regional Medical Center sa Tacloban City.

Kasama rin dito ang ilang panukala na magtatatag ng Bacolod City General Hospital sa Bacolod City, Negros Occidental; Eastern Pangasinan Regional Medical and Trauma Center sa Rosales, Pangasinan; Davao Occidental General Hospital sa Malita, Davao Occidental; at ang Neptali Gonzales Hospital sa Mandaluyong City.

Pumasa na rin ang mga panukalang pag-convert ng Medina Extension Hospital sa Medina, Misamis Oriental para maging general hospital; at ng Schistosomiasis Control and Research Hospital para maging Governor Benjamin T. Romualdez General Hospital sa Palo, Leyte.

Hindi natin ititigil na ipaglaban kung ano ang makabubuti sa ating mga kababayan, lalung-lalo na sa mga mahihirap nating kapatid na Pilipino. Dapat patuloy nating palakasin ang ating healthcare capacity, magdagdag ng mga kama, magtatag ng mga dagdag na ospital, at palakasin ang serbisyo na maaaring maibigay ng ating mga pampublikong ospital. Dahil sa totoo lang, ang mahihirap nating mga kababayan ang pumupunta sa mga pampublikong ospital. Para ito sa kanila.

Hindi naging madali ito bilang Chair ng Senate Committee on Health dahil sa maraming pagsubok na hinaharap natin ngayon pagdating sa kalusugan, lalo na’t may pandemya pa tayong sinusubukang lutasin. Kaya rin walang tulog ang serbisyo ng ating tanggapan. Habang patuloy tayong umiikot at rumeresponde sa mga kababayan nating nangangailangan, sinisigurado nating walang mapababayaan sa mga trabaho natin bilang mambabatas at representante ninyo sa Senado.

Sa ibang paksa naman, natutuwa tayong ibalita na na-certify as urgent muli ni Pangulong Rodrigo Duterte ang ating panukala na maitatag na ang Department of Migrant Workers and Overseas Filipinos. Pagsisikapan nating maipasa ito sa Senado bago matapos ang sesyon ngayong linggo.

Kaya apela tayo sa mga kapwa nating mambabatas na suportahan ang panukalang magbibigay ng nararapat na atensiyon at serbisyo sa ating itinuturing na mga bagong bayani. At nagpapasalamat din tayo, lalo na kay Sen. Joel Villanueva, Chair ng Senate Committee on Labor, na nangunguna rin sa pagtaguyod ng panukalang ito.

Kung maisabatas ito at tuluyang maitatag na ang Cabinet-level na kagawaran para sa kanila, matatapos na ang panahon na pinapagpapasa-pasahan natin ang ating mga kababayan. Tapos na ang panahong nauubos ang pasensiya, pera, at pagod ng kapwa natin mga Pilipino dahil sa burukrasya at bulok na sistema. Tapos na ang panahon na ang mga ahensiya at opisina sa gobyerno na nagtuturuan kung sino ang dapat umako sa responsibilidad. Ibigay natin sa mga Pilipino ang serbisyong dapat nilang matanggap mula sa gobyernong nagmamalasakit sa kanila saanman sila sa mundo.

Kahit anong hirap ang pagdaanan natin, basta kapakanan ng ating mga kababayan, ipaglalaban natin.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mabilis at maaasahang serbisyong pangkalusugan

ni Bong Go - @Bisyo Magserbisyo | May 26, 2021

Bilang Chair ng Senate Committee on Health and Demography, isa sa mga pangunahing layunin natin ay ang magsulong ng mga panukalan-batas na magsisigurong lahat ng mga nangangailangan ng serbisyong medikal ay hindi mapapabayaan.

Mahirap magkasakit, lalo na sa panahon ngayon. Huwag nating hintayin na sarili nating kaibigan, pamilya o tayo mismo na ang nakaratay sa labas ng ospital at naghihintay ng agarang tulong ngunit kulang ang kama, kagamitan at pasilidad ng pinakamalapit sa lugar natin.

Kaya naman, isinusulong natin ang mga panukala sa Kongreso na naglalayong maisaayos ang ilan sa mga pampublikong ospital sa iba’t ibang lokalidad sa pamamagitan ng pagdaragdag ng mga kama at kagamitan, pagpapaigting ng kanilang kapasidad, o pagtatayo ng mga bagong pasilidad sa tulong ng national government.

Naipasa na sa Mababang Kapulungan ang mga panukalang ito. Kapwa nagpahayag na rin ng buong suporta ang Department of Health at ang Department of Budget and Management. Kung kaya’t huwag sana nating patagalin pa sa Senado ang mga bagay na makatutulong sa taumbayan ngayon.

Sa ating walang tigil na pagresponde sa pandemya, nagtatayo tayo ngayon ng temporary facilities para madagdagan ang ating ealthcare capacity. Samantalang itong mga panukalang batas ay permanenteng maisasaayos ang mga pasilidad na meron na tayo. Hindi lang ito para sa kasalukuyan, ngunit para rin mapakinabangan ng ating mga anak at apo. Kahit wala na tayo sa mundong ito, ang pagsasabatas sa mga ito ay makakabenepisyo pa sa susunod na mga henerasyon.

Nais din nating magdagdag ng medical personnel sa mga ospital na ito. Marami na sa health workers ang pagod na, samantalang tayo ay nasa ating mga kamay na ang solusyon upang matulungan sila, pero mas gusto pa nating magdebate kaysa umaksiyon. Tandaan natin na buhay ng kapwa natin Pilipino ang nakasalalay sa bawat oras na ating sinasayang.

Habang nagdedebate tayo tungkol sa mga polisiya na dapat ipatupad, hahayaan na lang ba natin ang mga ating kababayan na naghihingalo at naghihirap?

Ramdam natin ang problema sa baba mula mismo sa mga kababayan natin dahil tayo mismo ang pumupunta sa kanila. Kawawa ang mga Pilipino kaya sana ay maging bukas tayo sa ganitong malilinis na hangarin. Huwag nating ipagkait sa tao ang serbisyong dapat nilang makuha mula sa gobyerno.

Alam nating parte ng ating trabaho ang pagdiskusyunan ang mga polisiya, ngunit may tamang panahon para rito dahil nasa gitna tayo ng pandemya. Ang kailangan ng mga tao ngayon ay ang aksiyon, hindi ang diskusyon. Ginagampanan lang natin ang tungkulin bilang senador at boses ng taumbayan na humihingi ng tulong sa national government na tugunan ang pangangailangan nila sa kalusugan.

Samantala, masaya tayong ibinabalita na nakamit na ng Pilipinas ang daily jab record natin with 237,984 vaccines administered noong Biyernes, Mayo 21. Malapit na rin nating maabot ang one million mark sa individuals with full doses, at four million sa total vaccines administered.

At ngayong umaarangkada na ang ating pagbabakuna, umaapela tayo na isaalang-alang din ang pangangailangan ng ating OFWs na nabibilang sa kasunod na kategorya na babakunahan.

Hangga’t maaari, mag-allocate tayo ng bakuna na angkop para sa kanila at tanggap sa bansang kanilang pagtatrabahuhan.

Sa panahon ng pandemya, nakita natin ang mga aspeto ng sistema na dapat ayusin upang mabigyan ang ating mga kababayan ng maayos na serbisyo. Huwag sanang maging hadlang ang pulitika para maipasa ang mga panukalang ito. Magtulungan at magbayanihan tayo, alang-alang sa mga Pilipino.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Walang oras na sinasayang para magserbisyo at magmalasakit sa bayan

ni Bong Go - @Bisyo Magserbisyo | May 21, 2021

Sa linggong ito, sumama tayo sa pagbubukas ng dalawang Malasakit Center sa bansa. Isa rito ay matatagpuan sa Mariveles Mental Wellness and General Hospital sa Bataan na binuksan noong Mayo 18, at ang isa pa ay sa San Pablo City General Hospital sa Laguna na binuksan kahapon, Mayo 20.

Bilang Chair ng Senate Committee on Health, sisiguraduhin natin na patuloy ang pagbubukas ng Malasakit Centers sa iba’t ibang parte ng bansa upang mailapit sa mga tao ang ginhawa ng serbisyong-medikal na dapat nilang makuha. Patuloy din nating ipaglalaban ang pagsasaayos ng kapasidad at kapabilidad ng mga pampublikong ospital upang matugunan ang pangangailangan ng mga may sakit, anuman ang antas nila sa buhay at kahit saan mang sulok ng bansa sila naroroon.

Bilang Chair ng Senate Committee on Sports naman, naging saksi tayo sa paghahandog ng lupang donasyon at presentasyon ng plano para sa pagtatayo ng Philippine Sports Training Center o PSTC sa Bagac, Bataan noong Mayo 18. Sa lugar na ito, magkakaroon ng state-of-the-art training complex na magsisilbing tahanan para sa ating mga atleta upang makapag-ensayo sila sa isang maayos at ligtas na pasilidad.

Bukod sa PSTC, nagpapasalamat din tayo kay P-Duterte dahil inaprubahan na rin niya ang pagre-release ng pondo para sa pagtatayo ng National Academy of Sports sa New Clark City sa Capas, Tarlac. Ito ay isa sa mga batas na ating ipinaglaban sa Senado.

Ang PSTC at NAS ay ilan lamang sa mga regalo ng administrasyong ito para sa ating mga atleta bilang pagkilala sa karangalang kanilang dinadala sa ating bansa. Handog din natin ito sa ating mga kabataan upang mailayo sila sa masasamang bisyo at mahubog sila bilang mga responsable at produktibong mamamayan na pag-asa ng ating bayan.

Walang tulog din ang ating serbisyo, lalo na sa panahon ng inyong pangangailangan. Kaya naman walang tigil ang ating pagtulong sa mga Pilipinong apektado ng sakuna, sunog, krisis, at pandemya.

Tulad nitong nakalipas na linggo, namahagi tayo ng tulong sa 1,332 na residenteng biktima ng Typhoon Rolly sa Ligao, Albay; 407 na residente naman sa Oas, Albay; mahigit sampung libong pamilyang apektado ng flashflood sa Silay City, Negros Occidental; at 200 na kataong biktima ng lindol sa Magsaysay, Davao del Sur. Kaparehas na tulong din ang ating ipinaabot sa 1,235 katao sa Cantilan; 842 katao sa Carrascal; at 1,176 katao sa Madrid sa probinsiya ng Surigao del Sur na naapektuhan ng Typhoon Auring. 2,123 kataong nabiktima naman ng Typhoon Bising sa Jipapad, Eastern Samar ang nabigyan ng tulong.

Binigyan din natin ng tulong ang mga biktima ng sunog, tulad ng 49 pamilya sa Quezon City; 28 sa Plainview, Mandaluyong City; isa sa Tondo, Manila; isa sa Parañaque City; pito sa Tanza Uno, Navotas City; pito sa Bgy. 7 Bagumbayan, Paete, Laguna; at tatlo sa Bgy. 156, Pasay City.

Patuloy din ang suporta na ibinibigay natin sa mga apektado ang kabuhayan dahil sa krisis, kaya nag-abot tayo ng tulong sa mga komunidad sa Leyte na binubuo ng 200 katao sa Tacloban City, 200 sa Palo, at 200 sa Alang-alang. Namahagi rin tayo ng tulong sa mahigit 7,000 na freeport workers sa Mariveles, Bataan; 200 indigents sa Catbalogan, Samar; 200 sa Can-avid, Eastern Samar na apektado ng armed conflict doon; 4,895 na tricycle drivers sa Ipil, Zamboanga Sibugay; 2,000 tricycle drivers din sa Liloy, Zamboanga del Norte; 1,400 tricycle drivers sa Pila, Laguna; 517 medical frontliners at 29 indigent patients sa Bataan; 100 indigenous peoples at 400 formel rebels at mga magsasaka sa Mati, Davao Oriental; 43 former rebels sa Calubian, Leyte; at 400 Lumads sa Tagum City, Davao del Norte.

Sa ating pag-iikot, nagbigay tayo ng pagkain, food packs, masks, face shields, vitamins, at iba pang tulong na kailangan ng mga komunidad, tulad ng wheelchair at canes para sa mga may kapansanan, bisikleta at sapatos para sa mga piling benepisaryo, at computer tablets sa mga kabataan para sa kanilang edukasyon. Naroon din ang mga ahensiya ng gobyerno para maibahagi ang kani-kanilang programa. Siniguro naming mahigpit na nasusunod ang mga health protocols sa bawat lugar upang maiwasan ang pagkalat ng COVID-19 at iba pang sakit.

Paalala natin sa bawat Pilipino — hindi ito ang panahon para magsisihan, magsiraan, maglamangan o manloko ng kapwa. Panahon ito para magbayanihan, magtulungan at magmalasakit para sa ikabubuti ng bawat Pilipino. Kaya huwag nating sayangin ang ating oras sa hindi pagkakaunawaan. Magtulungan tayo upang malampasan ang anumang pagsubok na darating sa buhay natin bilang nagkakaisang sambayanan!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.