Pusong puno ng pasasalamat, pagmamahal at saya

ni Bong Go - @Bisyo Magserbisyo | June 18, 2021

Maraming salamat sa lahat ng pagbati sa aking kaarawan. Tulad ni Pangulong Rodrigo Duterte, hindi tayo sanay na ipagdiwang ang araw ng aking kapanganakan sa pamamagitan ng birthday party. Kaya sa araw na iyon, pinili nating makasama ang ilan sa mga kabataang pasyente na may iba’t ibang karamdaman sa National Children’s Hospital sa Quezon City para maipadama sa kanila ang pagmamahal ng isang kapwa Pilipino.

Gusto nating pasalamatan ang Panginoong Diyos sa lahat ng biyaya na Kanyang ibinigay sa akin. Ibinigay na Niya ang lahat sa akin noong ako ay naihalal ng taumbayan bilang Senador. Wala na tayong hihilingin pa sa Kanya. Masaya ako ngayon dahil nabigyan ako ng isa pang taon para mabuhay rito sa mundo. Para sa akin, iisa lang ang ibig sabihin nito—isang taon muli na puno ng serbisyo, pagmamahal, pagmamalasakit at bayanihan sa mga Pilipino.

At bilang pasasalamat sa lahat ng mga biyaya at pagkakataong ibinigay ng Diyos, patuloy tayong magseserbisyo.

Noong Lunes (Hunyo 14) na mismong kaarawan ko, binuksan ang ika-119 na Malasakit Center sa National Children’s Hospital sa Quezon City. Nabigyan ng tulong ang 153 na mga pasyente at 1,007 frontliners ng ospital. Minabuti rin nating bigyan ng kaukulang tulong ang mga batang maysakit tulad ng cancer at leukemia, sa Out Patient Department ng ospital. Hiling natin sa Panginoon ay humaba pa ang kanilang buhay.

Sa mismong araw ring iyon ay namahagi ang ating opisina ng pagkain, food packs, masks, face shields, vitamins, sapatos, bisikleta at computer tablets sa 900 tindero at miyembro ng Tricyle Operators and Drivers Association sa Matag-ob at Palompon, Leyte. Nabigyan din ng kaparehong tulong ang 357 na mga trabahador sa Caloocan City.

Sa sumunod na araw naman, personal nating binisita ang 200 pamilya na naapektuhan ng sunog sa Delpan, Tondo, Maynila. Namahagi ang aking opisina ng financial assistance, food packs, facemasks, face shields, vitamins, at may ilang nabigyan ng bisikleta, sapatos at computer tablet. Samantala sa Visayas, ang outreach team natin ay namigay ng tulong sa 700 na tindero at TODA members sa Barugo at Alang-alang, Leyte. May 291 din na tour guides at TODA members sa Moalboal, Cebu ang natulungan.

Nagbukas din nitong Miyerkules (Hunyo 16) ang ika-120 na Malasakit Center sa San Lazaro Hospital sa Maynila. Ito na ang pang-25 na Malasakit Center sa National Capital Region at pang-apat sa Maynila. Naimbitahan ang inyong lingkod para makapagbigay ng mensahe at makapanayam din ang mga natatanging frontliners sa ospital.

Ipinagpatuloy natin ang paghahatid ng ayuda sa 10 katao na biktima ng sunog sa Can-avid ng Eastern Samar, at 689 na tour guides at TODA members naman sa Badian, Cebu. Naabutan din ang 100 na pamilyang biktima ng sunog sa Barangay Ilang sa Davao City naman, at apat pang pamilya sa Island Garden of Samal sa Davao del Norte.

Sa panahon ng pandemya ngayon, maraming empleyado ang nawalan ng trabaho o lumiit ang kita tulad ng 1,899 na AFAB employees ng Mariveles, Bataan. Hindi rin natin kalilimutan ang 203 na pamilya sa Marikina City na naapektuhan ng bagyong Ulysses. May 317 na pamilya rin ang tinulungan natin sa Llorente, Eastern Samar.

Matapos ang isang taon na naman sa aking buhay, masaya ako na patuloy akong nakatutulong sa aking kapwa. Sapat na ito para mapagtanto ko na ginagawa akong instrumento ng Diyos para maibsan ang lungkot at problemang dinadala ng ating mga kababayan.

Ang tanging hiling ko lamang sa aking kaarawan ay magtulungan at magbayanihan tayong lahat para malampasan natin ang pagsubok na dala ng pandemya.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Magbayanihan para sa paglaya ng bayan mula sa pandemya

ni Bong Go - @Bisyo Magserbisyo | June 16, 2021

Patuloy pa rin ang ating laban kontra COVID-19 sa pamamagitan ng mga health protocols na ipinatutupad at ng mas mabilis na rollout ng bakuna.

Habang nagsasakripisyo tayo upang panatilihing ligtas ang ating komunidad, intindihin din natin na kailangan ng gobyerno ng ating tiwala at suporta sa bakuna. Tulad ng ibang bansa kung saan unti-unti nang binubuksan ang ekonomiya dahil maraming mamamayan na bakunado na, layunin natin na marating ito. Kaya pakiusap sa lahat ng parte ng prayoridad na sektor na mabakunahan na sana kayo.

COVID-19 ang kaaway natin — ito ang nakamamatay. Ang bakuna ang ating kakampi — ito ang solusyon para unti-unti tayong makabalik sa normal na pamumuhay.

Marami nang nabakunahan mula sa A1, A2 at A3 priority group at nitong huling linggo lang, pormal na rin nating sinimulan ang pagbakuna sa ating A4 priority group sa iba’t ibang lugar sa bansa. Ang karamihan sa grupong ito ay kinabibilangan ng mga economic frontliners at essential workers na bumubuhay sa ating ekonomiya. Kasama ang mga miyembro ng media at ang mga manggagawa na kailangang lumabas upang magtrabaho at buhayin ang kanilang pamilya.

Sa kabila ng ating mga nakamit nitong mga nakaraang buwan, hindi pa rin tayo dapat magkumpiyansa. Marami tayong kailangan gawin upang mapabuti ang proseso at makamit ang target na herd immunity ngayong taon.

Patuloy ang ating panawagan sa pamahalaan na huwag kalimutan ang pagbakuna sa mga natitirang A1 to A3 na hindi pa nababakunahan at siguruhing bumalik ang mga nabakunahan ng unang dose para sa kanilang pangalawang dose. Kung kailangang suyurin ang kanilang mga komunidad at pamamahay para anyayahan magpabakuna ang mga nasa priority ay gawin na natin agad.

Dapat din patuloy na paigtingin ang pagpatayo ng mga vaccination sites sa iba’t ibang sulok ng bansa para hindi magkumpulan sa vaccination centers at mas maraming maabot na mga kababayan. Ito ay para masigurong walang maiiwan sa muling pagbangon ng ating pamumuhay.

Dahil mas maraming tao na ang nabakunahan sa kanila, tingnan natin ang NBA, nakakalaro na sila at meron ng pinapayagang fans na makapanood sa laro nila. Dahil nahuli tayo sa pagbabakuna, gawa na rin ng limitadong suplay sa mundo at pag-alinlangan ng ilan sa atin na magpabakuna, hindi pa tayo nakapagbukas ng larong basketball katulad sa nakagawian natin.

At habang patuloy na gumugulong ang vaccination rollout, patuloy na sundin ang mga itinakdang protocols. Hindi natin biglang bubuksan ang lahat ng aspeto ng ating ekonomiya dahil ayaw nating biglang tumaas ang bilang ng mga kaso at ma-overwhelm ang mga healthcare facilities, tulad ng nangyari noon sa NCR. Ayaw nating bumagsak ang health care system kung saan nagkakaubusan ng mga hospital beds, respirators, ventilators at maging medical frontliners.

Pakiusap sa mga kasamahan natin sa gobyerno at sa taumbayan na huwag haluan ng duda, intriga o pulitika ang vaccine rollout. Lubos ang pagsisikap para sa ikatatagumpay ng vaccination program kaya huwag sayangin ang bawat oras, bawat bakuna at bawat oportunidad na maproteksiyunan ang buhay ng bawat Pilipino.

Patuloy ang paglilingkod ng inyong gobyerno sa anumang oras. Nitong Lunes ay inilunsad ang ika-119 na Malasakit Center sa National Children’s Hospital sa Quezon City kung saan ipinamahagi natin ang biyaya ng ating kaarawan sa mga frontliners at batang pasyente.

Hindi tayo ang tipong nagdidiwang ng kaarawan, ngunit sa espesyal na araw na ito, pinili nating makasama ang mga pinaka-nangangailangang kinabukasan ng bayan na kabataan upang magbigay ng saya at pag-asa sa kabila ng kanilang mga karamdaman.

Ang natatangi birthday wish ng inyong lingkod ay sana malalampasan na ang pandemya upang makabalik na tayo sa normal na pamumuhay kung saan puwede nating mayakap muli ang ating mga mahal sa buhay.

Maaasahan n’yo ang serbisyo, saanman sa mundo. Hinihiling natin ang kooperasyon at pakikiisa upang tuluyang makalaya mula sa hirap na dulot ng pandemyang ito.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Gobyernong patuloy na nagmamalasakit at nagseserbisyo sa kapakanan ng lahat

ni Bong Go - @Bisyo Magserbisyo | June 11, 2021

Sa nakalipas na taon, may mga pagkakataong sunud-sunod ang dating ng mga dagok at paghihirap sa ating buhay. Gusto nating paalalahanan ang bawat Pilipino na hindi kayo nag-iisa sa inyong pinagdadaanan sa gitna ng mga pagsubok na dulot ng COVID 19 at iba pang krisis.

Mula noong June 5 hanggang June 10, umikot muli ang ating opisina para magbigay-tulong sa mga sektor na labis na naapektuhan ng pandemya. Nag-abot tayo ng tulong sa 4,276 na market vendors at miyembro ng Tricycle Operators and Drivers Association sa Alaminos City, Pangasinan; 200 youth workers sa Angeles City, Pampanga, at 205 youth workers sa Calauan City, Laguna; 637 katao na kabilang sa indigenous sector sa Malolos City, Bulacan; 2,614 na market and fishpen vendors sa Himamaylan City, Negros Occidental; 3,210 TODA at market vendors sa Binalonan, Pangasinan; 100 informal settlers at landless families sa Maramag, Bukidnon; at 68 na PWDs sa Quezon City.

Tinulungan din natin ang daan-daang kababayan na tinamaan ng mga nakaraang sakuna, tulad ng bagyo at mga pagbaha. Nagbigay tayo ng ayuda sa 11,755 pamilya na biktima ng flash floods sa Victorias City at 3,510 pamilya sa Enrique B. Magalona sa probinsiya ng Negros Occidental; 1,000 na pamilyang biktima ng pagbaha sa Maasin City, Southern Leyte; 120 na biktima ng Bagyong Auring sa San Benito, Surigao del Norte; 148 naman na biktima rin ng Bagyong Auring sa Santa Monica, Surigao del Norte; at 400 pamilya na nabiktima ng Typhoon Ulysses noong nakaraang taon sa Marikina City.

Tuluy-tuloy din ang pagtulong natin sa mga nasunugan sa iba’t ibang panig ng bansa, tulad ng 50 pamilya sa Bgy. Alabang, Muntinlupa City; 35 sa Bgy. Ususan, Taguig City; 30 sa Bgy. 194, Pasay City; 23 sa Bgy. Pantal, Dagupan City, Pangasinan; 15 sa Brgy. New Kalalake, Olongapo City, Zambales; at pitong pamilya naman mula sa Bgy. E. Rodriguez, Quezon City.

Noong June 9, personal din tayong dumalo sa pagbubukas ng ika-118 na Malasakit Center sa Bukidnon Provincial Hospital sa Maramag, Bukidnon. Ang Malasakit Center ay one-stop shop na ating binuo upang padaliin ang pagkuha ng tulong medikal mula sa gobyerno. Dahil naisabatas na ito sa pamamagitan ng Malasakit Centers Act of 2019, umaasa tayong patuloy itong makatutulong sa ating mga kababayan hanggang sa susunod na mga henerasyon.

Nito namang June 10, personal tayong pumunta sa Davao Regional Medical Center sa Tagum City, Davao del Norte, para siguraduhing maayos ang operasyon ng Malasakit Center sa nasabing ospital, at para na rin makita ang turnover ng dagdag na suporta mula sa national government ng mga equipment para sa pangangailangan ng cancer patients doon. Nag-abot din tayo ng tulong sa mga pasyente at frontliners sa ospital.

Habang sinisikap nating paigtingin pa ang serbisyo publiko sa panahon ng krisis, walang tigil din ang ating pakikipagbayanihan upang malampasan ang pandemya at maibalik sa normal ang ating pamumuhay.

Naabot na ang anim na milyong bilang ng mga bakunang naiturok sa mga kababayan natin. Binuksan na rin ang pagbabakuna sa ating mga kababayang kabilang sa A4 priority groups. Nitong Huwebes at Biyernes, dumating sa ating bansa ang halos tatlong milyong doses ng bakuna kontra COVID-19 na gawa ng Pfizer, Sinovac at Sputnik. Inaasahan nating higit sampung milyong doses ng bakuna ang darating ngayong buwan ng Hunyo.

Bilang Chair ng Senate Committee on Health, nananawagan tayong dalhin agad ang bakuna sa taumbayan, mula sa critical areas, hanggang sa kahit saan mang sulok ng bansa sa mabilis at maayos na paraan upang makamit ang herd immunity bago matapos ang taon.

Patuloy nating hinihikayat ang mga kapwa natin na nasa gobyerno, lalo na ang LGUs, na mas paigtingin pa ang pagbabakuna sa kanilang mga lugar, lalo na sa mga natitira pang kabilang sa prayoridad na hindi pa bakunado. Kung kinakailangang suyurin ang kanilang mga komunidad at pamamahay para masigurong walang makakaligtaan ay gawin na natin agad.

Alalahanin nating ‘yung mga senior citizens ay hindi nakalalabas ng kanilang pamamahay kung kaya’t dapat lamang na tayo ang pumunta sa kanila upang proteksiyunan sila mula sa sakit. Maging mapamaraan tayo kung paano mas mapabibilis ang rollout ng bakuna. Sa bawat oras, buhay ang nakasalalay. Ni isang minuto at ni isang bakuna ay hindi dapat masayang.

Kung may naituro man sa atin ang pandemyang ito, ‘yun marahil ay ang halaga ng pagdadamayan at pagtutulungan sa gitna ng krisis at kahirapan. Malakas ang aking paniniwala na kung tayo’y nagkakaisa at nagbabayanihan sa pagharap ng mga suliranin ngayon, sabay-sabay din tayong babangon tungo sa isang maunlad, malusog, at mas komportableng kinabukasan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.