Pagkakaisa at pagtutulungan ang panlaban sa mga bagong banta ng pandemya

ni Bong Go - @Bisyo Magserbisyo | July 21, 2021

Sa gitna ng mga nararanasan nating hamon, nakaaantig ng puso na makita ang kabayanihan ng mga frontliner sa pagsugpo sa COVID-19 at pagtulong sa kapwa nating Pilipino. Ngunit, hindi kakayanin ng medical community at ng gobyerno ang laban na ‘to kung walang tulong at kooperasyon mula sa mamamayang Pilipino.

Kailangan din ang disiplina at pakikiisa upang makahon mula sa hirap, gayundin para makabalik na tayo sa normal nating pamumuhay.

Kaya naman, ‘wag hayaang maimpluwensiyahan ng pulitika ang misyon nating malampasan ang pandemya. Tulad ng palagi nating sinasabi, hindi ito ang panahon para sa sisihan at siraan. Panahon ito ng pagtutulungan, pagmamalasakit at bayanihan— bakuna muna bago pulitika. Labanan natin ang pandemya, hindi ang isa’t isa!

Hindi rin tayo maaaring magpakakumpiyansa, lalo na at may mga nadidiskubreng bago at mas delikadong variants ng COVID-19. Kaya importante ang ating mabilis na aksiyon upang rumesponde sa mga bagong banta ng pandemyang ito.

Ngayong may kumpirmadong kaso na ng Delta variant sa bansa, muli tayong nananawagan sa mga awtoridad na magsagawa ng mga bagong hakbang upang mas lalong pagtibayin ang health protocols at mapalakas ang healthcare system. Huwag nating hayaang may makalusot sa atin at lalong kumalat ang COVID-19.

Sa usaping bakuna, umaasa tayong makakamit natin ang “population protection” sa lalong madaling panahon. Higit 15 million doses na ang naiturok natin, 10.4 milyong katao na ang nabakunahan ng first dose, at halos 4.7 milyong katao naman ang tapos na sa second dose nila.

Sa kasalukuyan, nakakuha na tayo ng mahigit na 27.9 milyon na doses ng bakuna at nakapagtala ang gobyerno ng bagong record nitong Hulyo 15 matapos makapagturok tayo ng 391,000 na doses ng bakuna sa loob ng isang araw. Inaasahang higit 136 milyon na doses pa ang darating sa bansa sa susunod na anim na buwan upang tuluyan nating maabot ang herd immunity sa ating mga komunidad.

Magpabakuna na ayon sa guidelines ng ating National Vaccine Program. Huwag kayong matakot dahil ang proteksiyon ang prayoridad ngayon at ang bakuna ang solusyon upang malampasan ang krisis.

Habang doble ang pag-iingat at mas mabilis na ang pagbabakuna sa iba’t ibang sulok ng bansa, patuloy din ang mga inisyatiba upang mapalakas pa lalo ang ating health care system para rumesponde sa mga pangangailangang pangmedikal ng ating mga kababayan.

Kaya nitong nakaraang Hulyo 18, nag-abot ng dagdag na tulong-pinansiyal ang Office of the President sa Southern Philippines Medical Center sa Davao City na personal nating nasaksihan. Higit P19 milyong ang para sa operasyon ng Cancer PET Scan and Nuclear Medicine and Cyclotron facilities, habang P30 milyon naman ang para sa medical assistance. Ito ay upang maisaayos, lalo na ang kapasidad ng nasabing ospital at mabigyan ng dagdag-tulong pampagamot ang mga pasyente roon, lalo na ‘yung mahihirap.

Nakapagbukas din tayo ng bagong Malasakit Center sa Tondo Medical Center nitong Hulyo 16 upang mailapit sa mga residente ng Maynila ang ginhawang serbisyong dapat nilang makuha. Mula 2018 nang unang maitaguyod ang programa na naisabatas naman noong 2019 base sa panukalang inihain at ini-sponsor sa Senado, 129 na ang Malasakit Centers sa buong bansa na handang magbigay-tulong pampagamot sa mga nangangailangan.

Patuloy ang operasyon ng Malasakit Centers at asahan ninyong madadagdagan pa ito sa mga susunod na araw. Bilang Chair ng Senate Committee on Health, sisiguraduhin nating walang mapababayaan pagdating sa usaping pangkalusugan, at walang maiiwan sa ating muling pagbangon.

◘◘◘

Binabati natin ang mga kapatid na Muslim ng maligaya at mataimtim na Eid’l Adha. Nakikiisa tayo sa pag-aalay ng panalangin ngayong Banal na Araw ng Pagsasakripisyo.

Nagpapasalamat din tayo sa mga kababayan nating tumutulong na malampasan ang pandemya, lalo na ang medical frontliners. Ang kanilang sakripisyo at dedikasyon ay maihahalintulad sa ipinamalas nina Propeta Abraham at ng mga Hujjaj. Ipinakita nila ang angking katatagan at katapatan sa gitna ng mga hamon at pagsubok na ating hinarap.

Patuloy tayong magseserbisyo kasama ang administrasyong Duterte upang magkaroon tayo ng matatag na depensa laban sa pandemya at iba pang suliranin. Para naman sa amin ni Pangulong Rodrigo Duterte, basta kapakanan ng mga Pilipino, lalo na ‘yung mga walang matakbuhan, ipaglalaban natin ‘yan hanggang sa huli. Magtulungan at magkaisa tayo sa laban na ito!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Bayanihan at patuloy na serbisyo sa mga komunidad na apektado ng krisis at pandemya

ni Bong Go - @Bisyo Magserbisyo | July 16, 2021

Sa muling pag-aalboroto ng Bulkang Taal, maraming Pilipino ang inilikas sa evacuation center dahil sa pangambang pumutok ito. Bilang tagapaglingkod, dapat handa tayong magbigay hindi lang ng tulong kundi pati ng iba’t ibang solusyon sa kanilang suliranin.

Kaya nitong Martes, Hulyo 13, 2021, personal nating pinuntahan ang mga inilikas na residente sa Laurel, Batangas. Kinumusta natin ang kanilang sitwasyon, namahagi ng tulong, at nag-iwan ng ngiti sa oras ng kanilang pagdadalamhati. Bagama’t may pandemya tayong hinaharap, sisiguraduhin ng gobyerno na mabigyan ng sapat at nararapat na serbisyo ang mga komunidad na apektado ng iba pang krisis.

May mga relocation site at pabahay ang National Housing Authority na inihahanda para sa mga nawalan ng kabahayan dahil sa krisis sa Taal. Bukod pa rito, patuloy ang ating pagsusulong sa Senate Bill Number 203 o ang National Housing Development, Production and Financing Bill na naglalayong makabuo at maisaayos na ang pondo para mailatag ang isang komprehensibong national housing program para wala nang magiging squatter sa sariling bayan.

Inihain din ang SBN 1227 o ang Rental Housing Subsidy Program Bill na hangaring mabigyan ang mahihirap ng sapat na tulong sa renta para sa kanilang temporary relocation. Kasama na ang mga pamilyang apektado ng kalamidad at aksidenteng mabibigyan din ng rental subsidy kapag naisabatas ito.

Patuloy din ang ating pagsusulong ng SBN 1228 na naglalayong makapagpatayo ng evacuation centers na malinis at komportable sa bawat siyudad, probinsiya at bayan sa buong bansa para mas mapaghandaan ang mga kalamidad at mapabilis ang pagbangon ng mga nasalanta nating kababayan.

Higit sa lahat, patuloy nating itinutulak ang SBN 205 kung saan maitatatag ang Department of Disaster Resilience na siyang tutugon sa mga problemang dala ng mga sakuna at kalamidad, at masiguradong magiging ligtas, adaptive at disaster-resilient ang ating mga komunidad.

Bukod sa ating pagbisita at pagbabahagi ng assistance sa mga apektado ng Bulkang Taal, tuluy-tuloy din ang ating pagtulong sa iba pang mga kababayan na apektado naman ng ibang kalamidad, aksidente o nahihirapan dahil sa pandemya.

Nitong nakalipas na linggo, sa mga bayan ng Pitogo, Lapuyan, Dimataling at Dinas, Zamboanga del Sur, tig-1,500 kababayan nating TODA members, event personnel, carinderia at sari-sari store operators ang ating tinulungan. May 2,352 din na mga Bantay Bayan, magsasaka, TODA members, tindero, trabahador at senior citizens ng Candaba, Pampanga ang nabahaginan natin ng ayuda.

Pumunta rin ang ating opisina sa Claveria, Pamplona, Abulug, Ballesteros, Sanchez Mira, Lasam, Alcala at Iguig sa Cagayan para mamigay ng dagdag na tulong sa halos 1,540 kataong nabiktima ng Typhoon Ulysses.

Namahagi rin tayo ng ayuda sa 418 miyembro ng Women Under “Gabay Sugbuanon” sa Cebu City; 350 biktima ng Typhoon Yolanda sa Tacloban City, Leyte; 298 na miyembro ng Ilonggo Artists Festival Association sa Iloilo City; 307 kababayan nating sumasailalim sa Retooled Community Support Program sa Basey, Samar; at 1,900 kataong binubuo ng TODA members, jeepney and bus drivers mula sa Gumaca, Quezon.

Mayroon din tayong binigyang-tulong na nabiktima ng sunog, tulad ng 11 pamilyang nasunugan sa Siniloan, Laguna; isang pamilya sa Calamba City, Laguna; 141 pamilya sa Bislig City, Surigao del Sur; at dalawang pamilya mula sa Muntinlupa City.

Walang humpay ang ating paglilingkod. Pinag-aaralan natin ang lahat ng posibleng paraan na maaaring makapagpabilis sa daloy ng serbisyo at makatulong sa ating mga kababayan.

Sa laban natin kontra COVID-19, nakikiusap tayong magtiwala sa bakuna dahil ito ang susi upang makabalik tayo sa normal na pamumuhay. Kaya hinihikayat natin ang lahat na magpabakuna na ayon sa ating vaccination guidelines. Huwag nang mag-alinlangan pa, lalo na ngayon na patuloy ang pagdating ng bakuna sa bansa na idine-deploy ng ating gobyerno sa bawat sulok ng Pilipinas lalo na sa critical areas.

Huwag nang patagalin, huwag nang sayangin ang inyong pagkakataong mabakunahan — libre ito. Pahirapan ang supply ng bakuna sa buong mundo kaya kung nand’yan na sa harapan ninyo, kunin n’yo na ang pagkakataon dahil kung mahal ninyo ang inyong pamilya at anak, dapat protektado kayo sa pamamagitan ng pagbabakuna.

Ang importante ngayon ay kung paano natin mapagagaan ang buhay ng bawat Pilipino. Kaya patuloy tayong magbayanihan at magmalasakit sa kapwa para sa ikabubuti ng ating mga kababayan! Sama-sama tayong babangong bilang nagkakaisang bansa!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Tuloy ang laban kontra korupsiyon

ni Bong Go - @Bisyo Magserbisyo | July 07, 2021

Nitong mga nakaraang araw, kabi-kabilang isyu laban sa gobyerno ang nagsilabasan. Bagama’t ikinalulungkot natin ang mga akusasyon ng katiwalian sa pamahalaan, nagpapasalamat tayo sa mga nais tumulong sa kampanya laban sa salot ng lipunan.

Nakita nating halos linggu-linggo, may pinapangalanan ang Pangulo na mga tiwali sa gobyerno. Halos linggu-linggo, meron siyang dini-dismiss. Halos linggu-linggo, merong suspendido na mga opisyal na napatunayang sangkot sa katiwalian. At halos, linggu-linggo, may nakakasuhan.

Kahit tumulong noong panahon ng kampanya, kahit kaibigan, kapag pumasok sa korupsiyon, siguradong sibak! Walang dapat sinasanto pagdating sa korupsiyon.

Ngunit hindi ito kayang solusyunan ng gobyerno lamang—dapat may kooperasyon ang mamamayan. Kung meron kayong nalalaman na mga anomalya, isumbong n’yo sa mga awtoridad, tulad ng Presidential Anti-Corruption Commission.

Para naman sa mga taong nag-iimbento ng mga kuwento, hindi uubra ang inyong bulok na estilo. Hindi n’yo maloloko ang taumbayan sa inyong recycled fake news. Hayaan na lang natin ang mga Pilipino ang humusga kung sino ang malinis na nagseserbisyo at kung sino ang marumi ang budhi na panay paninira lamang.

Hindi ito ang panahon ng siraan, panahon ito ng tulungan. Kung may sinseridad ang inyong hangarin na labanan ang korupsiyon, tulungan n’yo ang buong bansa na pangalanan, kasuhan at papanagutin ang mga nagkakasala.

Huwag na tayong magpaliguy-ligoy pa. Sa huling taon ng administrasyong ‘to, palakasin pa natin ang laban kontra korupsiyon, ilegal na droga at kriminalidad. Lahat tayo ay may importanteng papel sa labang ito upang mabigyan ng mas magandang kinabukasan ang ating mga anak at ang mga susunod pang henerasyon.

Sa mga nais manira, hinding-hindi tayo uurong sa anumang akusasyon dahil malinis ang ating konsensiya, wala tayong ibang hangarin kundi ang magserbisyo sa kapwa Pilipino.

Mula noon hanggang ngayon at sa mga darating pang panahon, lalabanan natin ang mga anomalya sa gobyerno. Hinding-hindi natin sasayangin ang oportunidad na magserbisyo para lang sa negosyo. Palagi nating uunahin ang interes ng mga Pilipino. Makaaasa kayo sa pangako naming ito ng Pangulo hanggang sa matapos ang aming termino.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.