Kailangan nating makamit ang herd immunity, magpabakuna tayo

ni Bong Go - @Bisyo Magserbisyo | August 25, 2021

Ang pagbibigay ng malinis at tapat na serbisyo ang isa sa mga pangunahing layunin natin sa paglilingkod sa mamamayan at sa bayan. Ilang beses na nating napatunayan ang dedikasyon sa layuning ito — sa katunayan, ilang opisyal na ng gobyerno ang tinanggal ng Pangulo dahil sa isyu ng korupsiyon.

Kaya naman, umaapela tayong tugunan ng mga ahensiya ng gobyerno ang initial findings ng Commission on Audit (COA) upang malinawan ang lahat at lumabas ang katotohanan. Bigyang-oportunidad ang mga ahensiyang sagutin ang mga paratang sa kanila, klaruhin ang mga isyu, itama kung may pagkakamali, at mas ayusin ang kanilang trabaho.

Dapat walang matulog na pera. Kung may kailangang gastusin, gastusin nang tama. Hindi dapat mabagal o matagal ang serbisyo sa tao. Hindi puwede ang papatay-patay, lalo na sa panahon ngayon na buhay ang nakataya. At higit sa lahat, dapat walang anomalya. Pera ng taumbayan ‘yan, dapat sila ang makabenepisyo riyan.

Nananawagan naman tayo sa Ombudsman at COA na ipatuloy ang pag-iimbestiga, i-audit at i-review sa mga ahensiya ng gobyerno. Tulad ninyo, iisa rin ang hangarin namin ng Pangulo Duterte: Ayaw natin ang katiwalian sa gobyerno.

Masagasaan na ang masagasaan. Sinuman, kahit saanman nanggaling, kahit sumuporta man noong kampanya, kahit nakatrabaho man noon, basta pumasok sa korupsiyon ay mananagot.

Ang ating kampanya laban sa katiwalian ay hindi lang limitado sa pagsiguro na hindi nananakaw ang pera ng taumbayan. Dapat siguruhin din nating naibibigay ang tamang serbisyo para sa mga tao. Masaya tayong ibalita na nagbunga ng maganda ang ating apela sa PhilHealth, Department of Health at hospital groups na mag-usap at ayusin ang dapat ayusin hinggil sa circular ng PhilHealth na nagsususpinde sa mga allegedly fraudulent claims.

Ayaw nating masayang ang pondo ng PhilHealth pero ayaw naman nating mawalan ng mag-aalaga sa pasyente dahil apektado ang operasyon ng mga ospital kung hindi sila nababayaran. Ang kawawa ay ang mga ordinaryong Pilipino na nakasandal sa PhilHealth para sa kanilang pagpapagamot. Sana, tuluy-tuloy ang maayos na koordinasyon at pagtutulungan dahil iisa lang naman ang hangarin nating lahat — ang makapagligtas ng buhay at maproteksiyunan ang kalusugan ng ating mga kababayan.

At sa patuloy na pagresponde sa pandemya, hiling natin na anuman ang mga quarantine measures na ipinapataw ay patuloy tayong sumunod, tulad ng pagsusuot ng masks at face shields, paghuhugas ng mga kamay, pag-oobserba ng social distancing at pananatili sa bahay hangga’t maaari.

Higit sa lahat, magpabakuna na dahil pinaghirapan natin ito at libre ito sa mga Pilipino. Ang bakuna, kasama ng pagsunod sa health protocols, ang pinakaepektibong paraan para labanan ang sakit at malampasan ang krisis. Himukin natin ang isa’t isa na magpabakuna na upang maproteksiyunan ang populasyon tungo sa herd immunity at pagbalik sa normal na pamumuhay.

Bayanihan, pagkakaisa at malasakit ang susi upang masiguro ang kaligtasan ng bawat mamamayan ngayong pandemya. Dapat walang Pilipinong maiiwan at walang pisong masasayang upang sama-sama tayong makaahon mula sa hirap.

Iba talaga ang sitwasyon ngayon. Kung anuman ang puwede nating gawin para mapagaan ang pinapasan ng ating mga kababayan ay gawin natin. Kaakibat nito ang pagsiguro na mabilis, maayos, at ligtas ang mga transaksiyon nila sa gobyerno.

Kaya nga kamakailan, umapela tayo sa Department of Transportation na aralin muna ang pagpapatupad ng Motorcycle Vehicle Inspection System. Maganda ang hangarin nito pero hindi ito ang panahon para dagdagan natin ang pinapasang hirap at gastos ng ating mga kababayan.

Sa huli, nagpapasalamat tayo kay P-Duterte sa pagbibigay noong Lunes, Agosto 23, ng mga insentibo at paggawad ng parangal sa mga nag-uwi ng medalya noong nakaraang 2020 Tokyo Olympics at pati na rin kay 1996 Olympic boxing silver medalist Onyok Velasco.

Kung may binitiwang salita ay kailangang tuparin ito. Patunay din ng political will ng administrasyong ito ang patuloy na pagpapaganda ng imprastuktura sa bansa. Kahapon lamang ay sumama tayo sa inagurasyon ng Cavite-Laguna Expressway (CALAX). Isa lang ito sa marami pang proyekto na magbibigay ng mas komportableng buhay para sa mga Pilipino.

At, bilang inyong lingkod, chair ng Senate Committees on Sports at Health, at nagsisilbing tulay kay Pangulong Duterte, patuloy nating ipaglalaban ang kapakanan ng bawat Pilipino at magseserbisyo tayo kahit saang sulok ng bansa para pakinggan ang inyong hinaing, mabigyan ng solusyon ang inyong mga problema, at mag-iwan ng ngiti sa oras ng inyong pagdadalamhati.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pagbalanse sa kalusugan at ekonomiya

ni Bong Go - @Bisyo Magserbisyo | August 13, 2021

Hindi maikakailang malaki ang epekto ng pandemyang ito sa ating lahat. Maraming aspeto ng ating buhay ang sadyang naistorbo dahil sa laban natin sa COVID-19.

Bawat araw, bawat oras, bawat minuto, at bawat piso ay mahalaga dahil habulan itong laban na ito. Huwag dapat mawala ang focus natin sa tunay na kalaban — ang COVID-19, kasama na riyan ang hirap at gutom na dala nito.

Magandang pangitain ang dahan-dahang pagbangon ng ating ekonomiya. Ang ating Gross Domestic Product ay tumaas nang 11.8% sa ikalawang quarter ng taong ito. Patunay ito na habang nilalabanan natin ang pandemya, nagsisikap din tayong balansehin ang pag-angat ng ekonomiya.

Gayunman, huwag muna tayong magkumpiyansa dahil mahaba pa ang laban at delikado pa rin ang panahon. Patuloy tayong sumunod sa mga patakaran at doblehin natin ang pag-iingat.

Suportahan natin ang vaccination program at magtiwala tayo sa bakuna dahil ito ang susi upang makabalik tayo sa normal na pamumuhay. Sa ngayon, nakapagturok na tayo ng humigit-kumulang sa 26 milyong doses ng bakuna sa iba’t ibang sulok ng bansa.

Kapag mas marami nang bakunado sa ating komunidad at bumaba na ang bilang ng kaso ng COVID-19, maaari na luwagan ang mga restrictions at muling makapagbubukas ang ibang industriya. Darami na ulit ang trabaho at muling lalago ang kabuhayan ng mga Pilipino. 'Yan ang gusto nating marating ngayong taon.

Habang nilalabanan natin ang COVID-19, tulungan din natin ang ating mga kababayan na labanan ang hirap at gutom. Siguraduhin nating walang maiiwan sa ating muling pagbangon. Kaya bilisan agad dapat ang pamamahagi ng ayuda dahil kailangan ito ng mahihirap.

Para sa manggagawang Pilipino, alam nating mahirap ang panahon ngayon, pero kailangan nating magtulungan. Buo ang aming dedikasyon para maprotektahan kayo dahil kayo rin ay isa sa mga frontliners na patuloy na nagseserbisyo sa inyong mga komunidad.

Kaya patuloy rin ang ating pagtulong sa mga nangangailangang kababayan. Nitong nakaraang mga araw, nagbigay tayo ng dagdag-suporta sa 500 na nasalanta ng bagyo sa Mallig, Isabela; 4,894 flood victims sa Kabasalan, at 1,386 flood victims sa Imelda, Zamboanga Sibugay; at 248 storm surge victims sa Loay, Bohol.

Tinulungan din natin ang mga vulnerable groups at essential workers tulad ng 395 beneficiaries sa Panglao, 300 sa Dauis, 248 sa Baclayon, 562 sa Loboc, at 682 sa Danao sa probinsiya ng Bohol.

Sa Cagayan Valley, tumulong tayo sa 40 indigents sa Tuguegarao City at sa mga daan-daang indigents naman mula sa Isabela na binubuo ng 318 sa Tumauini, 185 sa Ilagan City, 200 sa Cordon, 181 sa Santiago City, 138 sa Ramon, 142 sa San Mateo, 70 sa Cabatuan, 57 sa Luna, 59 sa Aurora, at 96 sa San Manuel.

Tinugunan din natin ang pangangailangan ng mga 180 economic frontliners sa San Pablo, at 300 economic frontliners din sa San Miguel, Zamboanga del Sur; 600 informal workers sa Lapinig at Laoang, Northern Samar; 986 religious leaders ng Malolos, Bulacan; 2,500 miyembro ng Bantay Bayan at fishpond workers sa Macabebe, Pampanga; 1,234 Motorela drivers sa Valencia, Bukidnon; at humigit-kumulang sa 10,000 multi-sectoral members naman sa Iloilo City.

Bumisita rin ang aking team sa Leyte upang tulungan ang 1,165 vendors sa Julita, 800 vendors sa Babatngon, 3,000 market vendors at TODA members sa Dagami, 1,500 market vendors at TODA Members sa Tabontabon, tig-512 out-of-school youth sa Alang-alang at sa Tolosa, at 1,760 public transport workers sa Dulag.

Walang tigil ang ating pag-aabot ng tulong. Sa ating pagseserbisyo sa mga nangangailangan, nais nating mabigyan kayo ng pag-asa at mapag-iwan ng ngiti sa oras ng inyong pagdadalamhati. Dagdag ito sa serbisyong walang tigil na ipinapamahagi ng iba’t ibang ahensiya ng gobyerno sa paraang ligtas at organisado upang maiwasan ang pagkalat, lalo na ng sakit.

Umaapela tayo sa lahat na magtiwala at suportahan ang mga hakbang na ginagawa ng gobyerno.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Proteksiyunan ang kabataan na pag-asa ng bayan!

ni Bong Go - @Bisyo Magserbisyo | August 11, 2021

Una sa lahat, sumasaludo tayo sa lahat ng mga atletang Pilipino na naglaro at nagtagumpay sa ginanap na 2020 Tokyo Olympics!

Sa pangunguna ng ating gold medalist na si Hidilyn Diaz, silver medalists Neshty Petecio at Carlo Paalam, at bronze medalist Eumir Marcial, tunay na namayagpag ang mga Pilipino sa Olympics. Masaya tayo lalo na’t kapwa taga-Mindanao ang mga ito. Sila, kasama ang iba pang Filipino Olympians ay nagdala ng malaking karangalan at inspirasyon sa ating bansa sa panahong may hinaharap tayong krisis.

Bilang Chair ng Senate Committee on Sports, malaki ang tuwa natin at nagbunga na ang ating pagod para mabigyang-sapat na suporta ang ating mga atleta.

Nang dumating ang COVID-19 sa bansa noong nakaraang taon, tiniyak nating mabibigyan ng suporta ang mga atleta dahil ang kanilang pagsasanay at pangkabuhayan ay lubos na apektado ng pandemya.

Ang Office of the President naman ay nagbigay rin ng karagdagang PhP100,000 allowance para sa mga atletang kalahok sa Olympics at Paralympics matapos ang ating apela. Maliban dito, naging matagumpay rin ang ating pag-apela upang mabigyan ng prayoridad sa bakuna ang mga ito.

Bilang Vice-Chair naman ng Senate Committee on Finance, sinigurado rin natin na may sapat na budget para sa sports. Sa katunayan, ipinaglaban ko noon na magkaroon ang PSC ng karagdagang budget ngayong taon na PhP100 million, na naitaas pa ng mga kasamahan ko sa Senado sa PhP250 million, para sa paghahanda ng mga atleta sa Olympics.

Sa pamamagitan ng maayos na sports development programs, mas magiging disiplinado at responsableng mamamayan ang ating mga kabataan at mailalayo natin sila sa masasamang bisyo. Bukod dito, mabibigyan pa sila ng pagkakataon na magdala ng karangalan sa bansa at maayos na kabuhayan para maiahon ang kanilang pamilya mula sa hirap.

Sa totoo lang, sa ilalim ng Administrasyong Duterte tayo nakakita ng may pinakamalaking suporta ng gobyerno at pribadong sektor para sa ating mga programang pampalakasan. Titiyakin ko na maipagpapatuloy ang pagsusulong ng mga inisyatibong ito at maaalagaan ang kapakanan ng ating mga atleta at kabataan.

Isang ehemplo nito ay ang pagsasabatas ng ating panukala na magtatatag ng National Academy of Sports sa New Clark City Sports Complex, Capas, Tarlac. Ngayong itinatayo na ito, mabibigyan na ang mga kabataang atleta ng pagkakataong mag-training at makapag-aral sa world-class na pasilidad at eskuwelahan.

Sa pag-aalaga sa ating mga kabataan, dapat ding magdoble-ingat tayo ngayon, lalo na sa pagkalat ng Delta variant. Nakalulungkot na dumarami na naman ang kaso ng COVID-19, hindi lang sa Metro Manila, kundi sa iba ring parte ng bansa. Kamakailan lang, naiulat pa na halos umabot nang 30 porsiyento ang pagtaas sa bilang ng mga batang natatamaan ng COVID-19, ayon sa datos ng DOH.

Bilang Chair ng Senate Committee on Health, ako ay lubhang nababahala kung hindi natin maaagapan ito dahil baka mapilitang gawing panibagong priority group ang mga kabataan sa pagbabakuna para lang maproteksiyunan sila. Hirap na nga tayo sa pagkuha ng bakuna para sa mga may-edad sa kabila ng limitadong supply, baka kailangang maghanap na naman tayo ng dagdag na mga bakuna para naman sa mga menor-de-edad.

Dahil dito, patuloy ang ating pakiusap na sundin natin ang mga health protocols. Higit sa lahat, magpabakuna na tayo ayon sa ating vaccination guidelines. Ang bakuna ang proteksiyon ninyo laban sa sakit. Sabi nga ng mga eksperto, “If you are not protected against COVID-19, the virus will find you and it will infect you.”

Pakiusap din na kung kayo ay bakunado na, doble-ingat pa rin dahil puwede pa ring mahawahan o makahawa ng inyong kapwa, lalo na sa mga hindi pa bakunado tulad ng mga bata.

Nitong Agosto 9, nakapagtala na tayo ng halos 25 milyong doses ng bakuna na naiturok. Higit 13.3 milyong Pilipino na ang may first dose, habang ang 11.6 milyon naman ang nakatanggap na ng second dose o fully vaccinated na. Tuluy-tuloy lang ang ating pagbabakuna sa kahit saang sulok ng bansa upang marating ang population protection at herd immunity tungo sa pagbalik sa normal nating pamumuhay.

Alam nating mahirap ang panahon ngayon. Ginagawa po natin ang lahat para balansehin ang ekonomiya at kalusugan upang maproteksiyunan ang buhay ng bawat Pilipino.

Proteksiyunan natin ang kapakanan at buhay ng ating kabataan dahil sila ang pag-asa ng ating bayan!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.