Serbisyong may tapang at malasakit

ni Bong Go - @Bisyo Magserbisyo | September 03, 2021

Noong Martes, Agosto 31, 2021 ay nagkaroon ako ng oportunidad na sagutin sa Senado ang mga malisyosong akusasyon at paratang laban sa akin. Nakalulungkot isipin na may mga klase ng tao na nakaugalian nang manghamak ng kapwa.

Hindi tulad ng karamihan sa mga kasamahan ko sa Senado, hindi ako pulitiko o nanggaling sa maimpluwensiyang pamilya. Isa lang akong probinsyano at aide bago naging Special Assistant to the President at Senador, at hindi ko ikinahihiya ito. Ngunit isinagawa ko ang aking tungkulin nang buong puso, may karangalan at sigasig. Sipag at serbisyo ang naging puhunan ko na ginagawa ko nang buong tapang at pagmamalasakit sa kapwa.

Hindi rin lingid sa kaalaman ng lahat na matagal na ang aming pinagsamahan ni Pangulong Rodrigo Duterte. Kahit kailan ay hindi ko ginamit ang posisyon o koneksiyon ko para sa pansarili kong interes. Sa halip, buong puso kong sinusuportahan ang Pangulo sa kanyang hangarin na magserbisyo at tumulong sa mga Pilipino.

May iilang nagsasabing nagpapaka-Executive-Assistant daw ako. Hindi ko rin ikinahihiya na umalalay sa Pangulo hanggang ngayon dahil iisa naman ang layunin namin, ang magserbisyo sa aming kapwa. Ang relasyon at tiwala namin sa isa’t isa ay kailanma’y hindi namin itinatago at tanggap naman ito ng taumbayan.

Basta makabubuti sa tao, patuloy akong magsisilbing tulay ninyo sa Pangulo at wala akong nakikitang problema rito. Gagawin ko ang lahat upang magampanan ang prebilehiyo at responsibilidad na ibinigay sa akin upang lubos na makapaglingkod sa mga Pilipino.

Nitong nakaraang linggo, sinuportahan ko sa plenaryo ang pagpasa sa Magna Carta for Seafarers para maitaguyod ang mga karapatan ng mga kababayan nating marino. Ibinigay ko rin ang aking suporta sa panukalang Metropolitan Davao Development Authority para sa patuloy na pag-unlad ng rehiyon ng Davao. Isinulong ko rin ang panukala na magbibigay ng benepisyo sa mga dependents ng retiradong prosekyutor.

Basta makabubuti sa kapwa ay sinusuportahan ko. Bisyo ko ang magserbisyo. Kaya imbes na manatili lamang sa Senado, patuloy din tayong umiikot sa kahit saang sulok ng bansa para tumulong nitong panahon ng pandemya.

Mula August 28 hanggang September 2, nagbigay tayo ng ayuda sa iba’t ibang parte ng ating bansa. Sa Luzon, nagpaabot tayo ng tulong sa 2,058 Typhoon Ulysses victims at 2,850 enrolled college students sa Rodriguez, Rizal; 1,500 indigent residents sa Calumpit, Bulacan; at 24 na pamilyang nasunugan sa Makati City.

Sa Visayas naman, nagtungo ang aking mga staff upang maghatid ng tulong sa iba’t ibang miyembro ng sectoral groups, tulad ng 12,306 mula sa Salvador Benedicto, Bacolod City, at Victorias City sa probinsiya ng Negros Occidental; 1,859 micro-entrepreneurs sa Bien Unido, Buenavista, Clarin, Danao, Dagohoy, Getafe, Inabangga, Sagbayan, San Isidro, San Miguel, Talibon at Trinidad sa probinsya naman ng Bohol. Dagdag pa rito, nagbigay rin ng immediate assistance sa 18 na pamilyang nasunugan sa Bacolod City, Negros Occidental.

Samantala, ang aking team sa Mindanao ay umikot naman sa Zamboanga Sibugay upang magbigay ng tulong sa mga displaced workers — 2,000 sa Ipil; at 2,000 rin sa Roseller T. Lim. Nagpadala rin ako ng tulong sa 114 na pamilyang nasunugan sa Zamboanga City at sa 78 na pamilya naman sa Surigao City, Surigao del Norte.

Ngayong araw naman, September 3, ay opisyal nang magbubukas ang ika-138 na Malasakit Center sa Sulu Sanitarium sa Jolo, Sulu. Mag-aabot din tayo ng tulong sa mga indigent patients at frontliners sa nasabing ospital.

Umaapela ako sa ating gobyerno na pag-aralan na ang posibilidad na palawakin lalo na ang ating vaccination roll-out sa mas maraming Pilipino maliban sa mga kabilang sa eligible na priority groups. Pag-aralan din dapat nang mabuti ang pagbibigay ng insentibo sa mga bakunado tulad ng mas maluwag na mga patakaran.

Nitong September 1, higit 34.1 milyong Pilipino na ang nabakunahan kung saan 20 milyon ang nakakuha na ng unang dose at higit 14.1 milyon na ang may kumpletong dose. Aabot naman sa 52.8 milyong bakuna na ang dumating sa bansa.

Parte ng ating tungkulin ang representation at constituency. Oo, mga mambabatas tayo pero higit sa lahat, public servants tayo! Kaya gagawin ko ang lahat nang aking makakaya para maipaglaban ang kapakanan ninyo nang buong tapang at pagmamalasakit sa kapwa ko Pilipino!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pandemya ang kalaban natin at hindi ang isa’t isa

ni Bong Go - @Bisyo Magserbisyo | September 01, 2021

Patuloy tayong nagseserbisyo at tumutulong sa mga nangangailangan dahil ito ang pangako natin sa taumbayan. Kahit ano’ng putik ang itapon sa amin, hindi matitinag ang aming paniniwala na gawin ang tama at ipaglaban ang kapakanan ng bawat Pilipino.

Ang problema sa pulitika sa atin, kaysa serbisyo at pagtulong sa tao ang atupagin, puro black propaganda at fake news ang ibinabato ng mga walang magawa sa buhay o ‘yung mga may pansariling interes na gusto lamang magpasikat.

Sa Blue Ribbon Committee hearing sa Senado noong Biyernes, muli nating sinagot ang mga pilit na nagdidikit ng atking pangalan sa mga indibidwal na iniimbestigahan natin. Hindi natin maintindihan na imbes tingnan ang ebidensiya at patunayang may anomalya, mas binibigyang-diin pa ang koneksiyon ng mga ito sa atin na wala namang katotohanan.

Inuulit natin, hindi natin siya naging aide kailanman. Si Atty. Lloyd Lao, tulad ng iba pang mga opisyal at empleyado sa Malacañang, isa lang sa daan-daang kawani ng gobyerno na ating nakatrabaho noon. Irrelevant din naman ito dahil kahit saanman nanggaling, kahit sinuman ang nakatrabaho mo, kung may kasalanan ka ay panagutan mo.

Kaysa ipagpilitan ang gusto ninyong paniwalaan, mas mabuting pagsalitain ninyo ang mga ipinatawag sa hearing para maliwanagan ang sambayanang Pilipino. Katotohanan ang gustong marinig ng taumbayan, hindi ang bersiyon at interpretasyon ng iilan lamang na nais kulayan ng iba ang katotohanan.

Ito ang rason kaya tumindig tayo sa plenaryo kahapon para ihayag ang suspetsa ng marami sa nakapanood ng hearings noong nakaraang linggo.

Mapapaisip ka talaga dahil sa hearing ay sila na ang nagtatanong, sila ang nag-iimbestiga, sila rin ang sumasagot, sila na rin ang huhusga at gagawa ng konklusyon. Tapos kapag ang sagot ay hindi nakalinya sa kanilang interpretasyon, nagagalit sila. Parang may mali naman doon.

Ang testigo nga sa korte, binibigyan ng respeto ng hukom. Sa hearing na ito, parang nawawala ang respeto sa kapwa tao at pati na rin sa kapwa Senador. Kahit saang diskusyon, maging sa plenaryo, sa korte, o maging sa usapang kanto, alam natin kung hindi patas ang ating kausap. Pakiusap, huwag sana linlangin ang publiko.

Sa kabila ng mga pagpapaliwanag, mistulang sarado na ang isip ng iilan. Hindi ba, kapag may imbestigasyon ay dapat suriin muna ang impormasyon at ebidensya bago humusga?

May mga nagrereklamo rin kung bakit napakalapit natin sa Pangulo. Walang reklamo ang mga taong ito kapag ginagamit tayong tulay sa ating Pangulo. Pero kapag hindi ito pabor sa kanila, pinupuna nila. Nais nating linawin na ang pagiging malapit namin ng Pangulo at tiwala sa isa’t isa ay alam mismo ng taumbayan. Gayunman, kailanman ay hindi natin ito ginamit para sa pansariling interes.

Nasa public health emergency tayo ngayon. Pandemya ang kalaban natin at hindi ang isa’t isa. Panahon ito ng pagtutulungan at pakikipagbayanihan. Huwag nating sayangin ang oras sa siraan at sisihan.

Tulad ng sinabi ng Pangulo, kung may anomalya, kalokohan, overpricing o korapsyon, kasuhan na agad at ikulong! Pero mapapatunayan lang ‘yan kung magiging patas tayo at pahahalagahan natin kung ano ang totoo kaysa ang sarili nating gusto.

Aminado tayong, baguhan ang inyong lingko sa Senado. Mataas ang pagtingin natin sa ating mga kasamahan. Pero hindi puwedeng magmamaang-maangan at tatahimik na lang kung tingin natin ay may maling nangyayari.

Isa sa pangunahing pangako ng Pangulo ay ang kampanya kontra ilegal na droga, kriminalidad, at korupsiyon. At kasama niya tayo sa laban. Wala tayong pinipili. Kung nagkamali, panagutin! Aminado tayong mahirap sugpuin ang korupsiyon sa gobyerno pero hindi tayo sumusuko. Malilinis lang natin ang hanay kung katotohanan at kapakanan ng bayan ang isasaalang-alang.

Probinsiyano lang kami ni Pangulong Duterte, na ginagawa ang lahat ng aming makakaya upang tuparin ang ipinangako sa taumbayan. Malinis ang aming hangarin. Pangalan at prinsipyo lang ang pinanghahawakan namin dito kaya hindi namin ito sisirain. At hindi rin kami papayag na sirain kami ng ibang tao na ang ipinaglalaban ay ang kanilang pansariling hangarin.

Kaya sa panahon ngayon ng krisis at pandemya, buong tapang nating lalabanan ang mga naninira, nangsasamantala at nakikinabang sa maling paraan. Pero buong puso rin tayong nagmamalasakit at nagseserbisyo sa mga nangangailangan, inaapi at hindi binibigyan ng patas na pagdinig. Tapang at malasakit. Prinsipyo at pagseserbisyo. ‘Yan ang mga pinanghahawakan ko sa labang ‘to!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Bawal matulog ang pera ng bayan, dapat magamit ito para makabenepisyo ang mga Pinoy

ni Bong Go - @Bisyo Magserbisyo | August 27, 2021

Nitong mga nakaraang araw, lumabas ang initial findings ng Commission on Audit sa ilang ahensiya ng pamahalaan. Bilang inyong tagapaglingkod, hinihikayat natin ang mga ahensiya na sagutin at klaruhin ang mga isyung ito. Dapat lumabas ang katotohanan. Kailangang malaman ng bawat Pilipino kung saan napunta at paano ginamit ang kanilang pera.

Ayusin ang dapat ayusin, bayaran ang dapat bayaran sa maayos at legal na paraan. Hindi dapat natutulog ang pera ng bayan at dapat magamit ito para makabenepisyo ang mga Pilipino. Hindi rin dapat mabagal o matagal ang serbisyo sa tao. Higit sa lahat, hindi tayo papayag na masasayang o mananakaw ni isang piso dahil buhay ang katapat nito, lalo na ngayon na may pandemya tayong hinaharap.

Hinihikayat natin ang Ombudsman at ang COA na ipagpatuloy ang kanilang imbestigasyon at audit. Kung may mapatunayang anomalya, kasuhan dapat at ikulong!

Ang importante ay masunod ang tamang proseso para maliwanagan ang mga Pilipino, maitama ang mali, mapanagot ang may sala, at makabalik tayo sa trabaho at mas matutukan ang laban kontra COVID-19, kasama ang hirap at gutom na dulot nito.

Nais nating iparating sa taumbayan na bagama’t maraming isyu na lumalabas ngayon, walang tigil ang serbisyo at malasakit ng inyong gobyerno para maiahon tayong lahat mula sa krisis.

Nitong nakaraang mga araw, patuloy tayo sa pag-iikot para tulungan ang ating mga kababayan sa oras ng kanilang pangangailangan.

Tinulungan natin ang mga market vendors at TODA members sa Capiz, tulad ng 909 sa Tapaz; 557 sa Pilar; 2,459 naman sa Pres. Roxas; 657 sa Sapi-an; 1,500 sa Jamindan; 2,549 naman sa Panitan; 6,043 sa Ma-ayon; 2,824 sa Dao; 284 sa Dumalag; 4,475 sa Sigma; at 4,088 naman sa Roxas City.

Pinuntahan din natin ang ating mga solo parents at PWDs sa Southern Leyte, tulad ng 703 na indibidwal mula sa Pintuyan at 703 pa sa Malitbog. Nag-abot din tayo ng tulong sa 246 na mga benepisaryo sa San Francisco. Dagdag pa riyan, pumunta rin ang ating mga kasamahan sa Northern Samar upang mag-abot ng tulong sa iba’t ibang sectoral groups kung saan 144 mula sa Lope de Vega at 107 naman sa Las Navas ang naayudahan.

Binigyan din natin ng ayuda ang 162 market vendors na biktima ng sunog sa Teresa, Rizal; 123 magsasaka at mangingisda sa Angono, Rizal; at 12,132 na mga magsasaka sa Guimba, Nueva Ecija.

Sa Zamboanga Sibugay, nag-abot din tayo ng kaparong tulong sa sa 9,591 public transport workers, farmers, fisherfolk at market vendors mula sa bayan ng Mabuhay, Talusan, Titay at Buug. Mayroon ding 1,248 Recovering Persons Who Used Drugs ang binigyan ng tulong sa Tudela, Misamis Occidental, at 1,200 essential workers naman mula sa Plaridel at Aloran ng probinsya ng Misamis Occidental.

Bilang Chair ng Senate Committee on Health, patuloy rin tayong nakikipag-ugnayan sa mga ahensiya ng gobyerno upang mapabilis ang pagbabakuna at maalagaan ang mga nagkakasakit para makapagligtas ng buhay.

Noong Agosto 25, meron na tayong kabuuang halos 49 milyong doses ng mga bakuna na dumating na sa bansa. May mahigit 31 milyong doses na ang naiturok kung saan 18 milyon nito ay bilang unang dose at mahigit 13 milyong Pilipino naman ang nakakumpleto na ng kanilang bakuna.

Patuloy pa rin ang ating apela sa lahat na sundin ang mga itinakdang patakaran kahit bakunado na para matigil na ang pagkalat ng COVID-19. Sa mga hindi pa bakunado, huwag mag-alinlangan pa dahil ito ang susi upang maibalik ang ating normal na pamumuhay.

Maging maingat at mapagbantay tayo palagi. Nandito lang ang inyong pamahalaan, palaging handang tumulong at magmalasakit sa anumang suliranin.

Samantala, tungkol naman sa endorsement ng PDP-Laban, nagpapasalamat tayo sa tiwala at suporta. Ngunit hindi pa rin nagbabago ang isip natin. Hindi talaga interesadong tumakbo bilang Pangulo ang inyong sa susunod na halalan.

Ang importante ay may katimbang si Pangulong Duterte na kayang ipagpatuloy ang mga nagawa niya. ‘Yan ang continuity na ninanais natin sa bansa — kung paano maipagpapatuloy ang magagandang pagbabago na nasimulan, lalo na ang kampanya laban sa kriminalidad, korupsiyon at ilegal na droga. At kung paano rin maipagpapatuloy ang pagkakaroon ng gobyerno na may malasakit sa kanyang mamamayan para maiahon ang ating bansa mula sa krisis na ito.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.