Dating MVP sa NBA, Derrick Rose, retired na

ni Rey Joble @Sports News | Sep. 27, 2024

Matapos ang 16 seasons sa NBA, pinal nang tinapos ni veteran point guard Derrick Rose ang kanyang career. Si Rose, na nakontrata pa ng Memphis Grizzlies noong Sept. 24 ay inanunsiyo ang pagreretiro kahapon sa kanyang Instagram.

Iniulat ng SNY na matapos na makausap ng Grizzlies ay nagbago ng isip bagamat orihinal nang nakatakda ang $3.4M na kontrata para sa 2024-25 season bilang final year sa Memphis. Sinimulan ni Rose ang career bilang no. 1 pick sa 2008 NBA draft ng Chicago Bulls.

Mabilis siyang sumikat at humusay bilang isa sa most exciting players sa liga, naging 2009 Rookie of the Year at naka-tatlong straight All-Star selections ng 2010-2012. Noong 2011, si Rose ay naging pinakabatang player sa NBA history na nagkamit ng NBA MVP award matapos pamunuan ang Bulls sa league-best 62-20 record sa average na 25.0 points, 4.1 rebounds at 7.1 assists sa 81 laro.

Pero matapos ang isang taon ay dumanas siya ng torn ACL injury. Hindi na nagbalik ang dating galing sa laro ni Rose nang muli itong maglaro, hindi na makapuntos ng higit sa 20 dahil sa knee injury. Matapos lisanin ang Chicago, naglaro siya sa New York Knicks, Cleveland Cavaliers, Minnesota Timberwolves at Detroit Pistons.

Sa unang taon niya sa Memphis, iniinda pa rin ni Rose ang injury at nadagdagan pa ng pinsala sa hamstring. Sa kabuuan nalimitahan siya sa 24 laro at may average na lang na 8.0 points, 1.9 rebounds at 3.3 assists sa loob ng 16.6 minuto na aksiyon.

Rain or Shine inulan, lusot sa Game 1 vs. Hotshots

ni Rey Joble @Sports News | Sep. 26, 2024

Inulan man ng 4-point shots mula sa Magnolia Hotshots, nagawa pa ring maitakas ng Rain or Shine ang makapigil-hiningang 109-105 panalo sa pagsisimula ng kanilang best-of-five quarterfinals series sa PBA Governors’ Cup sa Ninoy Aquino Stadium.

Mainit ang naging shooting ng Hotshots, partikular na si Jerrick Ahanmisi na nagpakawala ng apat sa limang tirada ng kanyang binitiwan mula sa four-point region.

Bukod kay Ahanmisi, bumanat din ng tig-isang four-point shot sina import Rayvont Rice at Aris Dionisio. May naipon ding limang 3-point shots ang Hotshots para patuloy na pahirapan ang Elasto Painters ni coach Yeng Guiao.

“We anticipated it. Ang sabi ko sa kanila kanina, kung matatalo man tayo, ang tingin kong puwedeng tumalo sa amin 'yung three-point shot at four-point shots nila,” ang sabi ni Guiao. “Yung ibang ginagawa nila kaya naming depensahan.” “Pero kahit na-conscious ka that they can make the three or four, iba pa rin sa actual.

Mahirap pa ring depensahan. That’s why part of the game plan is just to be able to lessen their efficiency. Mataas masyado 'yung 50% shooting sa four-point shot. That’s fantastic shooting.” Pero nakahanap ng solusyon ang Elasto Painters sa pamamagitan ng kanilang depensa. Isang field goal lang ang naitala ng Hotshots sa 5 minutong laban kung saan matagumpay na napigilan ng E-Painters ang opensiba ng Magnolia.

Mula sa 100-91 na kalamangan ng Hotshots, nagdoble-kayod ang Rain or Shine sa paghahabol kung saan limang sunod na puntos ni Andrei Caracut, isang tutukang tira ni import Aaron Fuller ang nagbalik sa kanila sa laban.

Isa pang lay-up ni Caracut at isang three-point basket ni rookie Caelan Tiongson ang nagbalik sa Rain or Shine sa trangko, 103-102, may 1:25 pa ang nalalabi. Anim na free throws sa pagitan nina Caracut, Fuller at Jhonard Clarito ang sumelyo sa panalo ng Elasto Painters.

Jawo, Cone at Bolts staff may parangal sa PBAPC Awards

ni Rey Joble @Sports News | Sep. 24, 2024

BIBIGYAN ng parangal sa kanilang mga malaking naiambag sa larangan ng Philippine basketball sina legendary player Robert Jaworski, many time awardee coach Tim Cone, at ang coaching staff ng Meralco Bolts sa idaraos na PBA Press Corps annual awards night ngayong Martes ng gabi.

Kinokonsidera si Jaworski na isa sa league's icons para magawaran ng Lifetime Achievement Award. Sa kanyang PBA career, si 'Big J' ay unang naging Most Valuable Player noong 1978 at nagkamit na ng 13 titulo.

Ang Toyota at Barangay Ginebra icon ay kabilang na sa 25 Greatest Players of All-Time ng PBA at nailuklok na rin sa 2005 Hall of Fame. Samantalang si Cone ay pagkakalooban ng President's Award sa malaking achievements niya sa Gilas Pilipinas, kabilang na ang panalo vs. Latvia sa FIBA Olympic Qualifying Tournament, 89-80.

Ang Meralco coaching staff na binubuo nina head coach Luigi Trillo, active consultant Nenad Vucinic, at deputies Gene Afable, Reynel Hugnatan, at Sandro Soriano, kasama si consultant Norman Black ay tatanggap ng Baby Dalupan Coach of the Year Award nang gabayan ang Bolts para sa Philippine Cup title, ang una sa kanilang prangkisa laban sa San Miguel Beermen.

Ito rin ang first time na ang buong coaching staff binigyan ng recognition. Ang iba pang awardees ay sina SMC sports director Alfrancis Chua (Danny Floro Executive of the Year), Meralco's Cliff Hodge (Defensive Player of the Year), Magnolia's Ian Sangalang at Barangay Ginebra's LA Tenorio (Comeback Player of the Year), at Meralco's Bong Quinto (Mr. Quality Minutes). (MC)