Tropang Giga, swak na sa semifinals

ni Rey Joble @Sports News | Oct. 2, 2024

Walang makakaawat sa isang determinadong TNT Tropang Giga, ang nagtatanggol na kampeon ng PBA Governors’ Cup. Muling tumibay ang tsansa ng Tropang Giga na depensahan ang kanilang titulo matapos magaang na idispatsa ang NLEX Road Warriors, 125-96 sa 2nd game nitong Martes ng gabi sa Ninoy Aquino Stadium.

Gaya nang inaasahan, double-double na laro na naman ang nakumpleto ni dating Best Import Rondae Hollis-Jefferson na nagpakawala ng 35 puntos at 11 rebounds para pangunahan ang Tropang Giga papasok sa semifinal round at samahan dito ang Barangay Ginebra. Bukod kay Hollis-Jefferson, solidong mga laro rin ang ipinakita ng lima pang miyembro ng mga Ka Tropa.

May 19 puntos na naiambag si Rey Nambatac, na muling maglalaro sa semifinal round makalipas ang ilang taon. Isa siya sa mga bagong players na nakuha ng Tropang Giga bago magsimula ang 49th season. Tumipa si Roger Pogoy ng 18 puntos habang double-double din ang nakumpleto ni Calvin Oftana na may 11 puntos at 10 rebounds. May 11 puntos na nalikom si Glenn Khobuntin habang 10 kay JP Erram.

“Two things, by looking at the stats, first our turnovers,” ang sabi ni TNT coach Chot Reyes. “We were among the teams with the fewest turnovers in the elimination round, but in Game 2 we have 16, but now we have 17. That’s too high for us. So that’s something we have to take a look at.” “Number two is our free throw percentage. We just need to make sure that we do a better job making our free throws in the semifinals.”

Converge binura ang 27 na abanse ng SMB, Stockton namayani

ni Rey Joble @Sports News | Oct. 1, 2024

Nagbuhos ng 48 puntos sa 4th quarter ang Converge, kabilang ang makapigil-hiningang, buzzer-beating jumper ni Alec Stockton at manatiling buhay ang kanilang kampanya sa PBA Governors’ Cup matapos maisalba ang 114-112 panalo kontra San Miguel Beer.

Sa harap ng mga nanonood nitong Lunes ng gabi sa 2nd game, isa si Stockton sa 6 na players na tumapos ng double figures, pero higit sa lahat ang pinakaimportanteng jump shot na nagtawid sa FiberXers sa panalo at manatiling humihinga sa torneo.

“We have nothing to lose, we’re down 0-2 and we just kept fighting,” ang sabi ni Stockton. “I’m speechless. But we just didn’t give up.” Dinumog ng kanyang mga kakampi si Stockton matapos pumasok ang initsang jump shot na halos malapit na sa three-point area kasabay ng pagtunog ng buzzer, pero sapat na ito para masungkit ng FiberXers ang pahirapang panalo.

“This is just one. When you think about it, it’s hard to beat this team three straight,” dagdag pa ni Converge coach Franco Atienza. “But we didn’t give up and we’re thinking of one game muna that is this Friday.”

Kinailangan ng FiberXers na magpaulan ng mga puntos at ang 48 puntos ang naging dahilan para mahabol nila ang 27 puntos na kalamangan ng San Miguel. Ibinaon ng Beermen ang FiberXers, 83-56, sa papatapos na bahagi ng 3rd period at tila naghahanda na ang San Miguel na sundan ang Barangay Ginebra papasok sa semifinal round. Pero hindi pa handa ang Converge na isuko ang bandera.

Sa pinagsamang lakas nina Stockton, Justin Arana, import Jalen Jones, Bryan Santos, King Caralipio at Schonny Winston, nagawang makahabol ng FiberXers at nagkaroon ng pagkakataon na matuka ang Beermen sa dulo ng laban sa kabayanihan ng dating star player ng FEU.

Solidong numero na naman ang ibinuhos ni Arana na may double-double performance na 23 puntos at 11 rebounds. May 20 puntos namang naiambag si Stockton habang double-double rin si Jones na may 17 puntos at 14 na rebounds.

Tumapos ng 15 puntos si Santos, lahat ng ito ay nagmula sa three-point area, para painitin ang opensiba ng Converge, habang 11 naman ang naitala ni Caralipio. May 10 namang naidagdag si Winston.

Dagdag lakas sa SMB: Anosike pakitang gilas konta Converge

ni Rey Joble @Sports News | Sep. 28, 2024

Bagong tikas at lakas ang naidagdag sa San Miguel Beer sa pagsisimula ng PBA Governors’ Cup best-of-five quarterfinal series kung saan ipinarada ng Beermen ang bagong import na si Ejimofor Anosike.

Pinalitan ni Anosike ang injured na si Jordan Adams at kaagad-agad ay nagpakitang gilas para giyahan ang kanyang koponan sa 102-95 panalo kontra Converge nitong Huwebes ng gabi sa Ninoy Aquino Stadium.

Si Anosike ang ikatlong import ng San Miguel. Binuksan ng Beermen ang kanilang kampanya sa bagong season ng PBA kung saan ipinarada nila si Adams, pero nakaramdam ito ng injury sa kanyang hamstring kung kaya pansamantala siyang pinalitan ni Sheldon Mac. Pero hindi naging impresibo ang lar oni Mac kung kaya pinalitan ulit siya ni Adams.

Ngayong playoffs, mas kinakakilangan ng Beermen ang isang import na walang iniinda sa katawan kung kaya naman kinuha nila si Anosike na tumapos ng may 28 puntos at 11 rebousds. Bagamat ilalim rin ang kanyang laro gaya ni eight-time Most Valuable Player June Mar Fajardo, ipinakita naman ni Anosike na kaya niyang maging katuwang ng premyadong sentro ng Beermen.

“Si EJ kasi sobrang lakas niya sa ilalim, sobrang lakas niya sa boards,” dagdag pa ni Fajardo. “Si Jordan naman, pure scorer talaga pero itong si EJ, hustle player and grabe yung energy niya sa loob. Nagco-complement siya sa team.”

Todo-kayod rin si Fajardo na may 25 puntos at 16 na rebounds. Dahil sa dagdag na enerhiya ni Anosike, mataas ang kumpiyansa ng Beermen na makakaulit sila sa FiberXers sa kanilang laban sa Huwebes.