Beermen tinablahan ang Gin Kings, Romeo rumesbak

ni Rey Joble @Sports | Oct. 12, 2024

Photo: PBA PH

Hindi pa handa si Terrence Romeo na ibigay ang trono kay Rhon Jay Abarrientos bilang isa sa pinakamagaling na point guards sa Philippine Basketball Association. Nagtala ng 26 puntos si Romeo, dating scoring champion ng liga, kabilang na rito ang siyam na puntos sa overtime at pangunahan ang San Miguel Beer sa 131-125 panalo kontra Ginebra sa Game 2 ng PBA Governors’ Cup best-of-seven semifinals series sa Smart Araneta Coliseum nitong Biyernes ng gabi.

Dalawa sa mga importanteng ipinukol ni Romeo ay ang kanyang three-point shot na sinundan pa ng four-point basket na siyang nagtulak para sa Beermen na maitabla ang serye. Hangad ng Beermen na muling makasungkit ng panalo at tuluyang umabante sa serye sa Linggo na gaganapin sa Dasmarinas, Cavite.

“Stay ready lang ako,” ang sabi ni Romeo. “May experience na rin naman ako so alam ko yung pakiramdam ng playoffs, ng semis. Alam ko yung pakiramdam kung paano mag-perform. Hindi naman nagbabago yung hardwork ko. Kaya hindi rin bumababa yung kumpiyansa ko sa mga ganung moments.”

Natabunan ng magandang laro ni Romeo ang matamlay na ipinakita ni Abarrientos na may naiambag lamang na apat na puntos para sa Ginebra. Bukod kay Romeo, todo kayod rin si EJ Anosike na may ibinuhos na 35 puntos habang 26 puntos naman ang naidagdag ni CJ Perez.

The Scores (OT): SAN MIGUEL 131 – Anosike 35, Perez 28, Romeo 26, Fajardo 23, Lassiter 12, Cruz 5, Tautuaa 2, Ross 0, Rosales 0, Trollano 0, Enciso 0, Manuel 0 GINEBRA 125 – Brownlee 39, J.Aguilar 29, Thompson 16, Ahanmisi 15, Holt 14, Abarrientos 4, Tenorio 3, Cu 2, Devance 2, Pinto 1, Pessumal 0, Adamos 0 QUARTERS : 22-24, 51-47, 85-76, 110-110, 131-125

Hield mandirigma ng Warriors, Fil-Am Ellis ng Kings nagpasikat

ni Anthony E. Servinio @Sports | Oct. 11, 2024

Photo: Golden State Warriors / Official Page

Naitala ng bisitang Golden State Warriors ang kanilang pangalawang panalo ngayong NBA Preseason at tinalo ang Sacramento Kings, 122-112 sa Golden 1 Center kahapon.  Nagpasikat ang mga bagong-lipat na bituin subalit umagaw ng pansin ang rookie na si kabayan Boogie Ellis ng Kings.

Bumuhos ng 22 puntos sa 19 minuto para sa Warriors si Buddy Hield na galing Philadelphia 76ers. Naglaro lang sa unang half si Stephen Curry at nag-ambag ng 13 pero lamang ang Kings, 68-66.

Namuno sa kanyang unang laro bilang King si dating Chicago Bull DeMar DeRozan na may 15 sa unang half lahat. Sa pangatlong quarter ipinasok si Ellis at bumira agad ng dalawang three-points patungong 10 sa 16 minuto.

Si Ellis ay katatapos lang ng kanyang ika-lima at huling taon sa University of Southern California kung saan pinangunahan ang Trojans na may 16.5 puntos sa 29 laro bilang kapitan. Hindi siya napili sa NBA Draft noong Hulyo kumpara sa kakamping Bronny James na napunta sa Los Angeles Lakers matapos gumawa lang ng 4.8 puntos sa nag-iisang taon sa kolehiyo.

Dahil dito, nagbakasakali ang 6'3" guwardiya sa Sacramento kung saan bahagi ng coaching staff ang PBA at Gilas Pilipinas alamat Jimmy Alapag. Ang kanyang nanay Rowena ay Filipina.

Wagi ang Warriors sa kanilang unang laro noong Linggo kung saan dinaig nila ang LA Clippers, 91-90. Ipinasok ni Lindy Waters III ang tres sabay ng huling busina sa laro na ginanap sa Stan Sheriff Center ng Honolulu, Hawaii.

Samantala, napanood kung ano ang magagawa nina Victor Wembanyama at Chris Paul at binigo ng San Antonio Spurs ang Orlando Magic, 107-97. Hindi naglaro ng tambalan sa unang laro ng Spurs na 107-112 talo sa Oklahoma City Thunder noong Martes at bumawi sila ngayon na may ipinagsamang 16 puntos.

Nambatac hiniya ang dating team, nakatulong sa panalo ng TNT

ni Rey Joble @Sports News | Oct. 10, 2024

Nagpakitang-gilas si Rey Nambatac sa dati niyang koponang Rain or Shine at gabayan ang TNT tungo sa 90-81 panalo sa pagbubukas ng kanilang PBA Governors’ Cup best-of-seven semifinals series sa Philsports Arena nitong Miyerkules ng gabi.

Bumomba ng 11 sa kanyang natipong 14 na puntos si Nambatac sa third quarter kung saan tuluyang lumayo ang Tropang Giga matapos magbuhos ng 36 puntos, mas marami ng 13 kontra sa Elasto Painters.

Pitong taong naglaro si Nambatac sa Elasto Painters kung saan umusbong ang kanyang career, pero na-trade siya ng koponan noong nakaraang komperensiya at dumaan siya sa Blackwater bago tuluyang naisadlak sa TNT bago magsimula ang simula ng 49th season.

Panigurado sa basket ang pinakawalan ni Talk N Text Tropang Giga point guard Jayson Castro at hindi alintana ang depensa ng katunggaling si Gabe Norwood ng Rain or Shine Elasto Painters sa kanilang sagupaan para sa season 49th PBA Governors cup semifinals game 1 best of 7 series sa PhilSports Arena, Pasig City kung saan nanaig ang Tropang Giga sa Elasto Painters 90 - 81. (Reymundo Nillama)

Pero bukod sa gigil na makapagpakita kontra kanyang dating koponan, mas nanaig ang determinasyon ni Nambatac na tulungan ang nagtatanggol na kampeong Tropang Giga na umabante sa semifinal round.

“He started kinda over excited,” ang sabi ni TNT coach Chot Reyes. “I had to tell him to calm down, relax and pick his spots. Medyo nanggigigil siya nu'ng start that’s why we replaced him right away with Jayson (Castro).”

“So when we brought him back, he already have a clear mind. I cannot speak for him, but more than the desire to do well against his former team, it’s really his desire also to do well in the semifinal series.”

Nagdagdag din ng 9 na rebounds si Nambatac. Halos triple-double ang nilaro ni dating Best Import na si Rondae Hollis-Jefferson na nagtala ng 26 puntos at sumikwat ng 13 rebounds. May nakumpleto rin siyang siyam na assists at may nalikom na limang agaw at apat na supalpal.