Cam Sur Express ipinilit ang Game 4 sa NBL Finals

ni Anthony E. Servinio @Sports | Dec. 15, 2024

Photo: NBL PILIPINAS Camsur Express vs. Taguig Generals

Itinakas ng Cam Sur Express ang 93-92 panalo kontra bisita at defending champion Taguig Generals sa Game 3 ng 2024 National Basketball League (NBL-Pilipinas) President’s Cup Finals Biyernes sa Fuerte Cam Sur Sports Complex sa Pili.

Naiwasang mawalis ang Express sa seryeng best-of-five at ipinilit ang Game 4 na ginanap Sabado sa parehong palaruan. Inaksaya ng Cam Sur ang 66-46 lamang sa pangatlong quarter.

Humabol ang Generals sa likod nina Dan Anthony Natividad, Noel Santos at Lerry John Mayo na tinuldukan ng dalawang tres ni Christopher Azares, 86-89, at 1:14 sa huling quarter. Itinapon ng Express ang bola subalit nagmintis si Azares at nakuha ni Mayo ang bola para lalong lumapit, 88-89.

Nagpalitan ng shoot sina Jerome Almario at Mayo para ihanda ang nakakapanabik na pagtatapos. Walang puntos buong laro, ipinasok ni Jamba Garing ang dalawang pinakamahalagang free throw na may apat na segundong nalalabi, 93-90.

May huling pagkakataon ang Taguig pero nagmintis ng magpapatabla sanang tres si Mike Jefferson Sampurna at pinulot ni Mayo ang bola para sa huling puntos. Nanguna sa Express si Almario na may 24 kasama ang 7 sa huling quarter.

Sinuportahan siya nina Kyle Philip Domagtoy na may 20 at Verman Magpantay na may 14. Itinala ni Mayo ang 11 ng kanyang 22 sa huling quarter na may kasamang 19 rebound.

Nagtapos na may 18 si Sampurna subalit wala sa huling quarter. Naputol ang 14 magkasunod na tagumpay ng Taguig buhat pa noong Agosto at ito ang pinakaunang talo ng koponan sa NBL-Pilipinas Finals mula pa noong 2019.

Nagtagumpay ang Generals sa Game 1 at 2, 90-87 at 80-77 na parehong ginanap sa Duenas Gym sa Signal Village. Kung kailangan, babalik doon para sa winner-take-all Game 5.

Cagulangan vs. Quiambao magkakasubukan sa game 2

ni Anthony E. Servinio @Sports | Dec. 11, 2024

Photo: Joel Cagulangan at Kevin Quiambao - Basketball Zone FB

Mga laro ngayong Miyerkules – MOA

11 AM UST vs. UE (JHS)

1 PM NU vs. UST (W)

5:30 PM DLSU vs. UP (M)

Papasok ang University of the Philippines taglay ang umaapaw na enerhiya sa Game 2 ng 87th UAAP Men’s Basketball Finals ngayong araw sa MOA Arena.

Sisikapin ng Fighting Maroons na walisin ang seryeng best-of-three laban sa defending champion De La Salle University na tinalo nila sa Game One noong Linggo, 73-65.

Matatandaan na nakuha ng UP ang unang laro ng kanilang serye noong nakaraang taon pero inagaw ng Green Archers ang sumunod na dalawa para makamit ang kampeonato.

Nakatatak iyan sa isipan ng mga beteranong sina Joel Cagulangan, Francis Lopez, Harold Alarcon at Gerry Abadiano na huwag uulitin ang nangyari. Subalit isang literal na malaking bahagi ng natamasang tagumpay ng Maroons ngayong taon si sentro Quentin Millora-Brown at pinatunayan ito sa kanyang 17 puntos sa Game 1. Tunay na sinusulit niya ang kanyang una at huling taon sa UAAP.

Para sa DLSU, hindi pa tapos ang laro at naipakita nila na kaya nilang umahon mula sa 0-1 butas.

Kontrolado nila ang unang half, 41-37, sa likod nina Kevin Quiambao at EJ Gollena subalit sabay nanlamig sila at nalimitahan sa isang free throw ni Quiambao sa huling quarter.

Sinubukan ni Michael Phillips na buhatin ang Archers pero hindi sumapat ang kanyang 17 puntos at 11 rebound. Hindi rin nakalaro masyado si Joshua David matapos tamaan ng pulikat at 2 puntos lang siya.

Samantala, sisikapin din ng NU na walisin ang Women’s Finals kontra defending champion UST sa 1:00 ng hapon. Bubuksan ang Junior High School Finals sa pagitan ng UE at UST sa 11:00 ng umaga.

MPBL National Finals: Pampanga vs. Quezon sa Best-of-5 sa Dubai

ni Gerard Arce @Sports News | Dec. 1, 2024

Pampanga vs Quezon - MPBL promo photo

Mga laro ngayong gabi (Disyembre 1) (Al Nasr Club’s Rashid Bin Hamdan Indoor Hall, Dubai UAE) Game 1: Best-of-five National Finals

11:00 n.g. – Pampanga vs Quezon Oras sa Pilipinas

Muling magniningning ang kahusayan ni reigning MVP Justine Baltazar para pamunuan ang atake para sa defending champions na Pampanga Giant Lanterns laban sa karibal sa South Division na Quezon Huskers upang makuha ang inaasam na kauna-unahang back-to-back title sa Game 1 ng best-of-five championship series ng 6th season ng Maharlika Pilipinas Basketball League (MPBL) sa prestihiyosong Al Nasr Club’s Rashid Bin Hamdan Indoor Hall sa Dubai, United Arab Emirates.

Gagamitin ni Baltazar ang nakuhang double-double para ibalik muli sa championship round ang Pampanga matapos higitan ang No.1 ranked na San Juan Knights sa 81-73 noong Nobyembre 11 sa Bren Z. Guiao Convention Center sa San Fernando, Pampanga, habang nakatakdang sandalan ng Quezon si ace guard LJay Gonzales na nagawang mahigitan ang Batangas City Tanduay Rum Masters sa 65-60 noong Nob. 14.

Sa naturang mga laro ay maghaharap sa unang pagkakataon ang Pampanga at Quezon sa National Finals ng 11:00 ng gabi (oras sa Pilipinas) bilang handog sa mga basketball fans na Overseas Filipino Workers (OFWs).

Ang kaganapang ito ay inaasahang magiging isang makabuluhang milestone na magpapatibay sa pangako ng liga na ipagdiwang ang talento at pagkahilig ng mga Filipino para sa sport sa ibang bansa.

Nagpakita ng lakas ang 27-anyos na forward na si Baltazar na hinirang na first overall draft pick ng 2024 PBA Draft para sa koponan ng Converge FiberXrs, para muling dalhin sa championship round ang Pampanga.

Umiskor ito sa huling laro ng 24 puntos, 18 rebounds, 4 assists, habang sumegunda si Archie Concepcion sa 19 puntos, gayundin sina Encho Serrano sa 11 puntos at Brandon Ramirez sa 7 puntos.

“Nakapag-prepare kami sa Quezon na champion sa South kung anong game plan na ipapakita namin, number one pa rin yung depensa, pinag-eensayuhan namin buong week, depensa talaga 'yung pagtutuunan namin,” wika ni Baltazar patungkol sa naging paghahanda nila kontra Quezon.

Bumida para sa Huskers ang 5-foot-10 guard mula FEU Tamaraws na si Gonzales sa 22 puntos at 8 rebounds kontra Batangas City, na makakatulong ng mahigpit sina Judel Ric Fuentes, Jason Opiso, Ximone Sandagon, RJ Minerva, Rodel Gravera, Al Francis Tamsi at Gab Banal.

---

MARTIN KUKUNIN ANG 2ND WIN NGAYON LABAN SA MEXICAN BOXER

Planong mas lumapit pa sa World rankings at sa inaasam na title fight ni Filipino rising star at undefeated boxer Carl Jammes “Wonder Boy” Martin sa kanyang pagbabalik laban sa ikalawang salang sa bansang Mexico kontra hometown bet Ruben Tostado Garcia sa isang non-title super bantamweight bout sa “Noche De Box 46” ngayong Linggo ng umaga (oras sa Pilipinas) sa Grand Hotel, Tijuana, Mexico.

Kasalukuyang nakasampa bilang No.2 sa World rankings sa 122-pound division ng World Boxing Organization (WBO) Global titlist ang kasalukuyang hawak na No.2 ranked sa WBO at No.7 sa International Boxing Federation (IBF) title belt na tangan lahat ni undisputed 122-pound champion at undefeated Naoya “Monster” Inoue.

Aasamin ni Martin na patibayin pa ang matatag na puwesto sa kanyang dibisyon upang makalapit sa pagkakataong makasuntok sa World title fight sa hinaharap. “We look forward to a junior featherweight title fight in 2025. He will be ready by that time because we expect him to show it in Mexico,” wika ni international matchmaker at MP Promotions President Sean Gibbons.

Nais sundan ng 25-anyos mula Lagawe, Ifugao ang nakuhang second-round knockout victory sa naunang Mehikanong biktima na si Anthony Jimenez “Boy” Salas nitong nagdaang Setyembre 6 sa Culiacan, Sinaloa, Mexico upang pahabain ang winning streak sa 24 panalo kasama ang 19 panalo mula sa knockouts.

Susubukang manatiling matatag ang kartada ng 5-foot-6 boxer na kasalukuyang pukpok sa ensayo sa Knucklehead Boxing Gym sa Las Vegas, Nevada, na bago lumipad patungong Amerika ngayong taon ay nagawa munang tapusin sa sixth-round si Chaiwat “Kongfah Nakornluang” Buatkrathok ng Thailand nung Disyembre 18, 2023 sa The Flash Grand Ballroom ng Elorde Sports Complex sa Paranaque City.

Naunang nakuha nito ang 10-round unanimous decision na panalo kay Oscar Duge sa parehong venue noong Agosto 19, matapos ang mahigit walong buwang pananahimik sa laban dahil sa inindang right rib injury.