Bagyong Henry, hahataw

ni Jeff Tumbado @News | June 30, 2026

Photo: DOST-PAGASA

Posibleng maging isang ganap na bagyo sa Miyerkules ang low pressure area (LPA) na binabantayan sa loob ng Philippine Area of Responsibility (PAR).

Ayon sa Philippine Atmospheric, Geophysical and Astronomical Services Administration (PAGASA), huling namataan ang LPA sa layong 495 kilometro silangan ng Surigao City, Surigao del Norte.

Inaasahang tatawid ang sama ng panahon sa bahagi ng Southern Luzon at Visayas sa Martes bago lumabas sa West Philippine Sea pagsapit ng Miyerkules.

Ayon kay PAGASA weather specialist Aldczar Aurelio, mataas ang posibilidad na lumakas ang LPA at maging isang tropical cyclone kapag nasa West Philippine Sea na ito sa Miyerkules.

Kapag tuluyang naging bagyo, tatawagin itong Henry, na siyang magiging ikawalong tropical cyclone na papasosa bansa ngayong 2026.

Bagyong Gardo, next

ni Mai Ancheta @News | June 25, 2026

Photo: DOST-PAGASA

Humina na ang Bagyong Francisco na sumentro sa Batanes Island habang unti-unting palabas ng Philippine Area of Responsibility.

Ayon sa PAGASA, inaasahang lalabas ng bansa ang bagyo ngayong Huwebes ng hapon o gabi patungo sa Southern Islands of Japan, subalit makararanas pa rin ng mga pag-ulan sa ilang bahagi ng bansa sa Northern Luzon dahil sa epekto ng habagat.

Bagama't humina na ang Bagyong Francisco, nakataas pa rin ang tropical cyclone wind signal number 1 sa Batanes at ilang bahagi ng Cagayan, kabilang na ang Babuyan Islands.

Pagkatapos makalabas ang Bagyong Francisco, papasok naman sa Philippine Area of Responsibility ang tropical storm na tatawaging Gardo ngayong Huwebes ng gabi, ang ikatlong bagyo ngayong Hunyo.

Batay sa latest track ng PAGASA, ang Bagyong Gardo ay hindi gaanong magiging malakas pagpasok sa PAR, lilihis sa direksyong pahilaga, saka lilihis sa pahilagang silangan palayo sa kalupaan at inaasahang lalabas ng PAR sa Biyernes ng tanghali.

Wala namang inaasahang magiging epekto sa bansa ang Bagyong Gardo.

Bagyong Francisco at Habagat, hahataw

ni Jeff Tumbado @News | June 22, 2026

Photo: DOST-PAGASA

Patuloy na lumalakas ang Severe Tropical Storm Francisco (international name: Mekkhala) at inaasahang magiging ganap na bagyo, ayon sa pinakahuling ulat ng Philippine Atmospheric, Geophysical and Astronomical Services Administration (PAGASA).

Sa latest weather bulletin ng PAGASA, taglay ni “Francisco” ang lakas ng hanging aabot sa 110 kilometro kada oras malapit sa gitna at pagbugsong umaabot sa 135 kilometro kada oras.

Huling namataan ang bagyo sa layong 1,170 kilometro silangan ng timog-silangang bahagi ng Luzon at kumikilos pahilagang-kanluran sa bilis na 25 kilometro kada oras.

Ayon sa PAGASA, inaasahang magpapatuloy ang paglakas ng bagyo at posibleng maging ganap na bagyo sa susunod na mga araw.

Samantala, nananatiling aktibo ang Habagat o southwest monsoon na patuloy na nagdadala ng maulap na kalangitan, kalat-kalat na pag-ulan at pagkulog at pagkidlat sa ilang bahagi ng bansa, partikular sa kanlurang bahagi ng Luzon kabilang ang Metro Manila, CALABARZON, MIMAROPA, at ilang bahagi ng Visayas.

Nagbabala ang PAGASA sa posibilidad ng pagbaha at pagguho ng lupa sa mga lugar na makararanas ng matagal at malakas na pag-ulan dulot ng pinaigting na Habagat.

Pinapayuhan ang publiko na patuloy na subaybayan ang mga susunod na weather bulletin at mga abiso ng mga lokal na pamahalaan para sa kanilang kaligtasan.