Baguio at Davao, hotspot ng COVID-19

ni Thea Janica Teh | November 18, 2020

Kinilala ng OCTA Research group bilang “hotspot of serious concern” ang dalawang lungsod at 7 lugar at itinuring na high-risk area sa bansa dahil sa patuloy na pagtaas ng bilang ng kaso ng COVID-19.

Ang 2 lungsod ay ang Baguio City at Davao City na patuloy na nakapagtatala ng mataas na bilang ngayong Nobyembre. Sa katunayan, nakapagtala ang Davao City ng 104 kaso kada araw simula Nobyembre 8 hanggang 14, habang 44 kada araw naman sa Baguio City.

Nagbabala ang OCTA sa mga nabanggit na lungsod dahil naabot na nito ang 80% hospital capacity at maaaring makaranas ng hospital burden sa mga susunod na linggo.

Kaya naman, pinapayuhan na mas paigtingin ang testing, contact tracing at isolation upang maiwasan ang pagkalat ng virus.

Samantala, kabilang naman sa 7 kinilalang “high risk” area ang mga sumusunod: * Makati * La Trinidad, Benguet * Itogon, Benguet * Batangas City * Lucena, Quezon * Lopez, Quezon * Pagadian, Zamboanga del Sur.

Ang basehan ng OCTA para makabilang dito ay ang bilang ng pagtaas ng kaso sa isang araw, mataas na positivity rate, attack rate at hospital capacity.

Sa ngayon ay may kabuuang bilang na 412,097 na ang naitalang kaso ng COVID-19 sa bansa matapos magdagdag ng 1,383 ngayong Miyerkules.

Roque, nag-videoke, dedma sa mga na-trap sa Cagayan, video kumalat

ni Ronalyn Seminiano Reonico | November 14, 2020

Pinutakti ng kritisismo si Presidential Spokesperson Harry Roque matapos kumalat sa social media ang video kung saan makikitang nagbi-videoke siya habang marami ang nangangailangan ng tulong dahil sa pananalasa ng Bagyong Ulysses.

Ipinost ng isang netizen sa Twitter ang naturang video na may caption na: “THIS WAS TAKEN LAST NIGHT HERE IN BAGUIO. IT GOES TO SHOW THAT THE PEOPLE WHO HAVE THE POWER DOESN’T REALLY CARE ABOUT THEIR FELLOWMEN.”

Biyernes nang gabi umano nang makunan ng video si Roque, kasabay ng pagmamakaawa ng mga residente ng Cagayan at Isabela para maisalba ang kani-kanyang buhay matapos ma-trap dahil sa matinding pagbaha.

Depensa naman ni Roque, “Just when I thought I could unload a little after a hectic week/s, my unremarkable singing as a means of unloading goes public and I get a beating.”

Aniya pa, “Having said this, let us go back to the most pressing matter at the moment, which is providing the much-needed assistance to our distressed brothers and sisters in the aftermath of Typhoon Ulysses. “As I speak, my family and I are preparing/repacking 600 bags of rice for donation in Alcala, Cagayan Valley where my friend and previous law partner and his family reside. Let us unite, help, and be kind to our fellow Filipino.”

Samantala, malaki ang pinsalang naidulot ng pananalasa ng Bagyong Ulysses sa Bicol, Metro Manila, Central Luzon, Cagayan Valley region, atbp. lugar at ayon sa Department of Agriculture, tinatayang aabot sa P1 billion ang agricultural damage.