Pinakamahabang border sa buong mundo, sarado hanggang next year

ni Thea Janica Teh | December 12, 2020

Mananatiling sarado hanggang January 21, 2021 ang pinakamahabang border sa buong mundo sa pagitan ng Canada at United States dahil sa COVID-19 pandemic, ayon kay Prime Minister Justin Trudeau nitong Biyernes.

Una na itong isinara noong Marso upang mapabagal ang pagkalat ng COVID-19 sa parehong bansa. Pinapayagan lamang ang pagtawid dito sa pagkalakal ng pagkain, merchandise at essential travel.

Ikalawang wave na ng COVID-19 infection sa Canada na may kabuuang bilang na 450,000 nitong Biyernes.

Samantala, ang US naman ang nangunguna sa buong mundo sa 15.7 milyong kaso ng virus at 300,000 namatay.

Lawyer ni Trump at dating mayor ng NY, positibo sa COVID-19

ni Thea Janica Teh | December 7, 2020

Nagpositibo sa COVID-19 ang lawyer ni US President Donald Trump at dating mayor ng New York na si Rudy Giuliani matapos umano itong bumiyahe upang mahabol ang Republican state lawmaker at baliktarin ang resulta ng eleksiyon.

Ang 76-anyos na abogado ang pinakabagong nagpositibo sa virus sa loob ng White House. "@RudyGiuliani, by far the greatest mayor in the history of NYC, and who has been working tirelessly exposing the most corrupt election (by far!) in the history of the USA, has tested positive for the China Virus," bahagi ni Trump sa kanyang social media account.

Matatandaang matapos ang eleksiyon noong Nobyembre 3 ay inanunsiyo nito kasama si Trump na mayroon umano silang ebidensiya na nagsasabing laganap ang dayaan ng eleksiyon sa US.

Kaya naman nitong Huwebes, bumisita si Giuliani sa Georgia upang pigilan ang mga lawmaker na magbigay ng certification sa pagkapanalo ni Biden. Ganito rin ang ginawa ni Giuliani sa Michigan nitong Miyerkules at sa Arizona nitong Lunes.

Una nang inanunsiyo ni Trump sa publiko na ugaliing magsuot ng face mask at umiwas sa mataong lugar upang maiwasan ang pagkalat ng COVID-19.