Nanutralisang miyembro ng DI-MG, 18 na — AFP

ni Angela Fernando - Trainee @News | February 20, 2024

Umaabot na sa 18 miyembro ng Dawlah Islamiyah-Maute Group (DI-MG) ang nanutralisa ng Armed Forces of the Philippines (AFP).

Sinabi ito ni AFP Chief of Staff, Gen. Romeo Brawner Jr. matapos ang pinakahuling insidente ng armadong engkwentro sa pagitan ng militar at ng teroristang grupo na ikinamatay ng 6 na sundalo, at 3 terorista.

Saad niya, ito ang bunga ng mga operasyon at pagtugis ng militar sa iba pang mga miyembro ng DI-MG na mga suspek din sa makamamatay na pambobomba sa Mindanao State University (MSU) nu'ng 2023.

Kabilang ang pangunahing utak sa likod ng naturang bombing sa MSU si alyas Engineer sa nanutralisa ng militar.

Nagpaabot naman ng pakikiramay si Brawner Jr. sa mga pamilya ng nasawing sundalo at sa mga kaanak ng tropang militar na kasalukuyan ay sugatan.

'Mastermind' sa pambobomba sa MSU, patay sa operasyong militar sa Lanao

ni Angela Fernando - Trainee @News | February 12, 2024

Napatay ang sinasabing 'mastermind' sa nakamamatay na pambobomba sa Mindanao State University (MSU) sa Marawi City nu'ng Disyembre sa isang militar na operasyon sa Lanao del Sur, ayon sa Armed Forces of the Philippines (AFP) nitong Lunes.

Sinabi ng AFP sa isang pahayag na si Khadafi Mimbesa o "Engineer" ay ang amir o lider ng Dawlah Islamiyah - Maute Group.

Saad ng AFP, "Statements from a surrendered terrorist, identified as KHATAB, a high-value individual in the DI-Maute Group who surrendered to the 2nd Mechanized Brigade on February 11, have corroborated the initial information on demise of the DI-Maute Group Amir and the mastermind behind the MSU bombing."

Matatandaang mula Enero 25 hanggang 26, ikinasa ng militar ang mga operasyon na nagresulta sa pagkamatay ng 9 na itinuturing na miyembro ng Dawlah Islamiyah.

Sa unang ulat ng militar, isa sa mga napatay si Saumay Saiden na isa sa apat na pangunahing suspek sa pambobomba sa MSU.

Mga retiradong heneral, 'di bawal sa kampo — AFP-PNP

ni Angela Fernando - Trainee @News | January 15, 2023

Mariing itinanggi ng Armed Forces of the Philippines (AFP) at Philippine National Police (PNP), sinabi nitong Lunes ang mga ulat na ipinagbabawal ang mga retiradong heneral ng pulisya at militar sa mga kampo dahil sa sinasabing plano ng destabilisasyon.

Nagpahayag si AFP spokesperson Lieutenant Colonel Francel Margareth Padilla, na ang pagharang ng mga gwardiya sa kung sinumang papasok sa kampo ay parte ng kanilang standard operating procedures.

Saad niya, “There is no veracity to that issue. We welcome the presence, of course, of our comrades in arms. Kasama namin dati 'yan and we know their backgrounds. They have been with us all along.”

Pinabulaanan naman ni PNP Chief Police General Benjamin Acorda Jr. ang kumakalat na bawal pumasok ang mga dating heneral sa mga kampo.