Kaso ng COVID-19 sa Mayo, papalo sa 300K — DOH

ni Zel Fernandez | April 18, 2022

Babala ng Department of Health, posible umanong sumipa ang kaso ng COVID-19 sa bansa pagsapit ng Mayo, makaraan ang nagdaang paggunita ng Semana Santa kasabay ng kasalukuyang pangangampanya para sa darating na eleksiyon.

Sa panayam ng PTV kay Dr. Rajendra Yadav, acting WHO Representative to the Philippines, inaaasahan umano ang paglobo ng kaso ng COVID-19 sa bansa matapos ang paglabas-masok ng mga tao sa Metro Manila upang magbakasyon nitong nagdaang Semana Santa. Aniya, kasabay nito ay naging aktibo ang mga turista kaya posible umanong tumaas ang panganib dulot ng pakikihalubilo ng mga bakasyunista, depende pa sa naging kapabayaan ng hindi pagsusuot ng facemask sa mga masisikip na lugar at walang sapat na bentilasyon.

Pahayag pa ni Dr. Yadav, base sa panayam kung posible nga bang umabot sa 300 libong kaso ang COVID-19 sa bansa pagsapit ng Mayo, hindi umano malabong mangyari ito lalo na kung patuloy pang bababa ang pagsunod sa minimum public health standards (MPHS) sa bansa. Aniya, kung ang South Korea umano na kalahati lamang ng populasyon ng Pilipinas ay nakapagtala na ng 600 libong kaso ng COVID-19 sa isang araw, wala umanong makapagsasabi kung paano ito makaaapekto sa Pilipinas.

Gayunman, iginiit ni Dr. Yadav na higit sa pagbabantay sa magiging paglaki ng bilang ng kaso ng COVID-19 sa bansa, mas mahalaga aniya na pagtuunan ng pansin ang bilang ng mga nagpapabakuna upang mapaghandaan ang panganib na dulot ng paglaganap ng virus. Dagdag pa niya, nakababahala umano na marami pang mga barangay ang hindi pa umaabot sa 70 porsiyento ng nabakunahan gayung kinakailangan lumagpas pa ito rito upang maging ligtas ang bawat pamayanan.

Suhestiyon ng kinatawan, kung kinakailangan umanong magbahay-bahay upang maabot ng bakuna ang mga nakatatanda at iba pang kababayang hirap sa paglabas ng kanilang tahanan ay malaking tulong aniya ito upang mapalakas ang proteksiyon sa bansa laban sa COVID-19.

Oil Price Hike pagkatapos ng Semana Santa

ni Zel Fernandez | April 18, 2022

Nagbabadya ang muling pagtaas ng produktong petrolyo ngayong linggo matapos ang Mahal na Araw.

Tinatayang papalo sa ₱1.70-₱1.80 kada litro ang diesel, habang ₱0.40-₱0.50 ang gasolina gayundin ang kerosene. Batay sa mga eksperto, bunsod ito ng malakihang dagdag-presyo sa world market nitong nagdaang Huwebes Santo.

Inaasahang magsisimula ng pagpapatupad ng bagong presyo ng mga produktong petrolyo ang mga kumpanya ng langis bukas, Martes, April 19.

P-Digong, binisita ang mga biktima ng Bagyong Agaton

ni Zel Fernandez | April 18, 2022

Personal na binisita ni Pangulong Duterte ang mga biktima ng Bagyong Agaton sa Leyte at Capiz.

Nagpahiwatig ng pakikidalamhati ang pangulo sa lahat ng mga sinalanta ng bagyo, lalo na ang mga naulila bunsod ng naganap na landslide at pagbaha, partikular sa Baybay City.

Gayunman, tiniyak ng pangulo na patuloy na tutulong ang pamahalaan sa mga nasalantang pamilya upang muling makabangon mula sa hagupit ni ‘Agaton’.

Nagsagawa rin ng aerial inspection sa Leyte ang pangulo kasama si Sen. Bong Go at iba pang mga opisyal ng pamahalaan. Dinalaw din ng pangulo ang mga pamilyang naapektuhan ng Bagyong Agaton sa Capiz.

Sa kanyang pahayag, siniguro ng pangulo na hangga’t hindi naiaayos ang relokasyon ng mga nasalanta, patuloy na magkakaloob ng makakain ang gobyerno sa lahat ng mga biktima.