Ilang OFWs, 'di pinalabas ng amo... Comelec sa Kamara: Internet voting sa susunod na eleksiyon

ni Zel Fernandez | May 7, 2022

Inaasahan ni Commission on Elections (Comelec) Commissioner George Garcia na maikokonsidera ng Kamara ang pag-apruba sa panukalang magkaroon ng online o internet voting sa mga susunod na eleksiyon.

Kasunod ng isinagawang overseas voting para sa mga botanteng OFWs, layunin ng panukala na mapadali ang paraan ng pagboto ng mga Pinoy na nasa abroad.

Paliwanag ni Garcia, kasalukuyang suliranin sa eleksiyon kapag ang isang OFW ay hindi pinayagan ng employer nito na lumabas para makaboto.

Kaugnay din umano ito sa isang phone-in question mula sa isang overseas Filipino worker sa Saudi Arabia na hindi aniya makaboto dahil hindi pumayag ang amo nito na lumabas siya ng bahay.

Ani Garcia, kung mapapabilang umano ang online o internet voting sa mga paraan kung paano makaboboto sa ibang bansa ang mga Pinoy overseas workers, makakatulong aniya ito upang hindi na maging mahirap ang pagboto ng mga OFWs.

Ito umano ang dahilan kung bakit umaasa si Garcia na maikonsidera ng Kongreso ang internet voting para sa mga overseas voters.

Samantala, tinatayang nasa mahigit 1.6 milyong rehistradong Pilipinong botante ang nasa ibang bansa ngayong 2022 elections.

PhilHealth contri, tataas sa Hunyo... Colmenares: Dagdag-sahod muna sa mga manggagawa

ni Zel Fernandez | May 7, 2022

Kasunod ng anunsiyo na dagdag-kontribusyon sa mga miyembro ng Philippine Health Insurance Corporation, umapela si Bayan Muna Chairperson Neri Colmenares ng dagdag-sahod sa mga manggagawa bago ang pagtataas ng buwanang hulog ng mga kasapi.

Ani Colmenares, kailangan munang ikonsidera ng gobyerno ang dagdag-sahod sa mga empleyado bago itaas ang premium contribution ng PhilHealth sa susunod na buwan dahil wala na halos matitira sa take home pay ng mga manggagawa sa 4% increase sa Hunyo.

Paliwanag ni Colmenares, kasabay ng taas-presyo sa langis at mga pangunahing bilihin, magiging dagdag-pasanin sa mga Pinoy kung magtataas ang PhilHealth contribution nang walang dagdag sa sahod.

Giit ng chairperson, mahalagang pagtuunan ng pansin ng gobyerno ang kapakanan ng mga manggagawa, partikular ang sahod ng mga ito, upang hindi maging pasakit ang kahingiang dagdag-hulog sa PhilHealth.

Nagkakahalagang P1.9-M... High-grade marijuana, nasabat ng Customs

ni Zel Fernandez | May 7, 2022

Nasabat ang may tinatayang P1.9 milyong halaga ng "kush" o high-grade marijuana mula sa isang Nigerian national, kasunod ng isinagawang controlled delivery operation ng anti-drug authorities sa Angeles City, Pampanga noong Huwebes nang hapon.

Batay sa report ng Philippine Drug Enforcement Agency-Central Luzon (PDEA-3), kahapon ng Biyernes ay tinukoy ang suspek na si Madu Ogechi Uzoma, residente ng Concubierta Street, Sunset Valley Mansions, Brgy. Cutcut sa Angeles, Pampanga.

Ang package na naglalaman ng iligal na droga ay sinasabing nagmula sa Greenwich, Connecticut, USA, at dumating sa Bureau of Customs-Port of Clark, nitong nakaraang Abril 29.

“The shipment was subjected to the K9 sweeping and physical examination which gave a positive indication of illicit drugs,” ayon sa PDEA.

Nakumpiska mula kay Madu ang tinatayang 1,500 gramo ng kush na mayroong street value na P1.95-M at isang driver's license.

Naging matagumpay ang operasyon sa pagkilos ng PDEA-Central Luzon, katuwang ang Bureau of Customs-Port of Clark at ang lokal na kapulisan.

Sasampahan naman ng kasong paglabag sa Section 4 (importation of dangerous drugs) ng Republic Act 9165 o Comprehensive Dangerous Drugs Act of 2002 ang Nigerian national.