Sino ang sino?

ni John Rey S. Reonico - @What's In, Ka-Bulgar | November 24, 2020

Sa pagkagat ng dilim,

unti-unti nang lumalalim,

dahan-dahang kinakain,

lakas mo at panalangin.

Ilang bagyo pa ba

ang kailangan nating danasin?

Ilang buhay pa ba

ang kailangang sayangin?

Bago kayo tumayo,

bansa'y sipatin.

Ilang sigaw pa ba

ng "tulong" at "saklolo",

upang maalarma kayo,

sa masarap ninyong pagkakaupo?

Hindi naman artipisyal

ang sagot sa problemang totoo,

hindi rin pagsira sa kalikasan,

ang solusyon sa problemang ito.

Hindi buhangin.

Hindi ba ninyo naririnig

ang mga daing na bumabasag sa katahimikan?

Nakakatakot kung hindi,

dahil kung 'di n'yo pa rin alam ano'ng mali,

kayo na ang may mali.

Matikas na si Maria

ni Bey Ong - @What's In, Ka-Bulgar | September 29, 2020

Maganda, mayumi at marikit.

Katangian niyang kaakit-akit.

Sa pulang labi dahil sa lipstik.

Siguradong ika'y mapapaibig.

Buhok na madulas at makintab.

Ang iyong puso ay mabibihag.

Sa pilik-matang kay gara.

Lahat ay mapapahanga.

Kay ganda talaga ni Maria,

taglay ang yuming mapanghalina.

Kahit sino ang makakakita,

bilanggo agad sa paghanga.

Si Maria, malinis at busilak

basal at ‘di nagpapanggap.

Siya ay simbolo sa lahat,

Babaeng sa lahat ay angat.

Subalit, panahon ay lumipas,

mga ulap sa kalangitan, kumupas.

Ang dating Maria ngayon ay may tikas.

Malakas na si Maria, ‘di tulad ng dati

May tapang na at hindi papahuli.

Si Maria, may tinig nang may lanog.

Na sa malayong ibayo ay aabot.

Dahil ang dating tinakot ng himutok.

Maaabot din ang ninanasang tuktok.

Ang galing ni Maria ay hinubog

ng panahong siya ay nilubog.

Nilubog sa kababawan ng isip,

sa pagtanggap na ninanais.

Ang buhok niyang madulas ay tumigas

at ang pulang mga labi ay kumupas.

Ang mahahabang pilik-mata,

binihisan ng bangis na kakaiba.

Nagbago ang dating mayumi,

napalitan ng siklab na matindi.

Ang dating binusabos at inaapi,

katapangan ngayon winawaksi.

Si Maria ay si Maria, mawala man ang saya.

Mananatili ang katauhan niya,

magbago man ang bihis niya,

huwag mo siyang harangan

daan mo ay maari niyang lakaran.

'Wag na 'wag mong husgahan

dahil kaya niya ring humakbang.

Hakbang na katumbas ng iyong yapak

Kaya maging maingat ka, Juan.

Si Maria ay kaya kang tapatan.

Hindi na siya puwedeng basta hubaran.

Ito ang hubad na katotohanan.

Kung iginagalang mong ang iyong ina.

Igalang mo rin kahit ang matikas na Maria.

Bituing Niyurakan

ni Johnrey S. Reonico - @What's In, Ka-Bulgar | September 14, 2020

Sa pagmulat ng isipan,

nasilayan ko ang isang larawan,

pinag-alayan ng buhay – biniyayaan ng kabuhayan.

Ipininta sa kagandahan, kayamanan at karangyaan.

Kinulayan ng mga pangako’t,

niyurakan ng kasinungalingan.

Tayo nga ba ang problema?

O tao mismong ganid sa kapangyarihan?

Maabot lang ang nais, lahat ay tatapakan.

‘Wag na tayong mag-away o kaya’y magbolahan,

lahat tayo’y binilog, pinaikot para sa sariling kapakanan,

mga tao sa larawan, mga biktima ng nakaraan.

Kapag may hawak na kapangyarihan,

basura na ang tingin sa mamamayan,

tunay na bituin ng watawat, inaalisan ng karapatan.

Kapag may posisyon ay angat na sila,

mahal daw kasi ang bayan,

kaya’t halos ibenta sa iba.

Sa larawan na nasilayan,

hindi ko nais ng kaguluhan… hindi rin ako isang pantas,

ngunit kapag hindi ka pa nagulat, wala ka nang bansang maililigtas.