Obiena gold sa Poland, Yulo target ang 2 ginto

ni Clyde Mariano @Sports | June 22, 2024

Photo: Carlos Yulo & EJ Obiena / FB

Muling nagwagi ng gold medal ang Filipino pole vaulter na si  Ernest John 'EJ' Obiena sa katatapos na 6th Irena Szewinska Memorial sa Bydgoszcz, Poland kahapon-Biyernes (Manila time).

Nagtala ang Paris Olympics-bound na si  Obiena ng personal season-best na 5.97 meters sa loob lamang ng isang attempt upang mangibabaw sa kompetisyon.Tinangka rin ni Obiena na magtala ng bagong personal at national record subalit bigo siyang ma- clear ang taas na 6:02 meters sa loob ng tatlong attempts.Pumangalawa kay Obiena at nagkamit ng silver medal si  Emmanouil Karalis ng Greece pagkaraang magtala ng kanyang  personal-best na 5.92 meters habang pumangatlo naman para sa bronze ang home bet na si Piotr Lisek matapos magtala ng  5.75 meters. 

Target naman ni Carlos Yulo ang 2 ginto sa artistic at all-around nang kapanayamin ng media kasama si gymnastic president at dating Philippine Sports Commission Commissioner Cynthia Carrion para sa pangarap niyang hindi natupad sa Tokyo.

“Ang laban kong ito ay hindi lang para sa aking sarili, kundi para rin sa bayan at ating mga kababayan na nananalangin sa aking tagumpay sa Paris,” ani Yulo kasama ang girlfriend na si Chloe San Jose.

“Nabigo ako sa Tokyo, this time, pipilitin kong magtagumpay dahil ang misyon at ultimate goal ko sa Paris ay manalo. Nothing more, nothing less,” wika ng 24-anyos na Japan-based two-time world champion at bakas sa kanya ang determinasyon na magkamedalya sa Paris.

“I am more stronger and prepared than last year. I prepared hard enough at nakahanda akong harapin ang aking mga kalaban,” ani Yulo. 

Ipinakita ni Yulo ang kahandaan nang magwagi ng gold  sa International Gymnastic Federation World Cup sa Doha, Qatar at 2024 AGU Artistic Asian Championship sa Tashkent, Uzbekistan.

Naka-3 ginto rin sa exercise, vault at parallel bars noong 2023 Asian Championship sa Doha at sa SEA Games sa Cambodia, 15th Asian Gymnastics at 10th Asian Senior Gymnastics, ginto at pilak sa 2022 edition sa Qatar at pilak sa Singapore. 

Gymnast Ruivivar swak sa 2024 Paris Olympics

ni GA / VA / Clyde Mariano @Sports | April 22, 2024

Tatlo na ang mga Filipinong gymnasts na kakatawan sa Pilipinas sa darating na Paris Olympics matapos mag-qualify ni Levi Jung-Ruivivar makaraan nitong magwagi ng silver medal sa women’s uneven bars event ng Doha, Qatar leg ng FIG Artistic Gymnastics World Cup Series noong Biyernes.

Muntik pang di umabot ng finals pagkaraang tumapos na pangwalo at huling qualifier sa naturang event, nakakuha ng iskor na 13.633 ang Fil-Am gymnast na nagbigay sa kanya ng una niyang World Cup medal gayundin ng minimithing Olympics berth.

Base sa panuntunan, tanging ang top 2 gymnasts lamang sa bawat apparatus pagkaraan ng apat na World Cup legs ang uusad sa Paris.

Nakamit ni Jung-Ruivivar ang kanyang Olympic seat nang pumangalawa ito sa uneven bars rankings sa natipon niyang 62 puntos. 

Bago ang Doha leg, nasa ikalimang puwesto si Jung-Ruivivar na may 44 na puntos mula sa nakolekta nyang 14 puntos sa Cairo, Egypt leg, 12 puntos sa Cottbus, Germany, at 18 puntos sa Baku, Azerbaijan. Nadagdagan ang kanyang puntos at tumaas sa 62  matapos magwagi ng silver medal na may katumbas na 30 puntos.

Si Kaylia Nemour ng Algeria ang nagwagi ng gold sa nakuha nitong iskor na 15.366 puntos.

Gayunman, hindi siya binigyan ng ranking points dahil qualified na siya sa Paris Games matapos magwagi sa World Artistic Gymnastics Championships noong isang taon.

Bago ang Doha leg, nasa ilalim si Jung-Ruivivar nina Jennifer Williams ng Sweden at Vanesa Masova ng Czech Republic na kapwa may tig-48 puntos gayundin ng Isa pang Swedish na si Nathalie Westlund na mayroon namang 47 puntos.

Sa naunang tatlong World Cup legs, hindi tataas sa 8th place ang naitalang pagtatapos ni Jung-Ruivivar. Pumuwesto syang pang-13 sa Cairo, 12th sa Cottbus at pang-8 sa Baku.

Ito na ang pinakamaraming bilang ng gymnasts na sasabak sa Olympics para sa Pilipinas makalipas ang halos anim na dekada nang katawanin nina Norman Henson at Ernesto Beren ang bansa sa 1968 Mexico City Games.                      

Pro boxer Laurente isasabak sa Bangkok last Olympic Q'fying

ni VA @Sports |  April 2, 2024

Isang professional boxer ang nakatakdang makasama ng national boxing team sa gagawin nilang pagsabak sa huling boxing qualifying tournament para sa Paris Olympics na gaganapin sa Bangkok sa susunod na buwan.

Inimbita ng Association of Boxing Alliances in the Philippines (ABAP) si Criztian Pitt Laurente sa isang box para sa men’s 63.5-kg division kung saan nanaig siya kontra kay Mark Ashley Fajardo na nauna nang nabigo na magkamit ng tiket para makasama sa Paris matapos ang round-of-16 exit sa nakaraang Busto Arsizio qualifier noong Pebrero sa Italya. “Tinanggap ko 'yung offer kasi isang malaking oportunidad ito para sa akin," pahayag ng 5-foot-8 na si Laurente na may malinis na rekord na 12-0, panalo-talo kabilang na ang 7 knockouts sa loob ng apat na taon niyang pagiging pro. Dating ABAP boxer noong 2015-2019, makakasama ng 24-anyos at tubong General Santos City sa pagsabak sa huling qualifier sa Bangkok sa Mayo 23- Hunyo 3 sina Tokyo Olympics flyweight silver medalist Carlo Paalam, women’s middleweight Hergie Bacyadan at flyweight Rogen Ladon.

Tatangkain nilang mapahanay sa mga nauna nang nag-qualify na sina men’s light heavyweight Eumir Felix Marcial, women’s featherweight Nesthy Petecio at women’s flyweight Aira Villegas sa Paris. Naging gold medalist sa 2016 Children of Asia tournament sa Yakutsk, Russia si Laurente at bronze medalist sa 2018 Asian Boxing Confederation Youth Championship sa Bangkok. Nagwagi rin siya ng gold medal noong 2012 at 2014 Palarong Pambansa gayundin sa 2016 Philippine National Games.

Ang huli niyang laban ay noong Marso 2023 sa South Korea kung saan tinalo niya ang Mongolian na si Munkhdalai Batochir sa isang non-title fight. Samantala, maliban sa kanyang ama na si Cristino, suportado rin si Laurente ng kanyang promoter na si Gerry Peñalosa sa pag-abot sa kanyang pangarap na makalaban sa Olympics.