Women's volleyball na ang tanyag na sports

ni VA @Sports | July 2, 2024

Nangunguna na bilang pinakatanyag na sports sa buong bansa ang women’s volleyball. Ang  pag-angat sa popularidad ng nasabing sport ay pinangunahan ng Premier Volleyball League (PVL) at ng University Athletic Association of the Philippines (UAAP).

Ayon kay PVL president Ricky Palou, hindi nila akalain na aangat ng husto ang popularidad ng sport. “We always knew volleyball had a special place in the hearts of Filipinos, but what’s happening now is beyond our wildest dreams,” ani Palou. “Our games are drawing record crowds and viewership numbers we could only fantasize about a few years ago.”

At kung pag-uusapan ang pag-angat na ito ng women's volleyball, tiyak na mababanggit ang mga makasaysayang mga laro na tinangkilik at sinuportahan ng libu-libong fans.

Tampok na ang record breaking attendance na naitala noong PVL All-Filipino Conference finals, kung saan dinagsa ang Smart Araneta Coliseum ng 24,459 mga fans para sa title-clinching Game 2 win ng Creamline kontra Choco Mucho noong Dis. 16.

Nalampasan ng nasabing bilang ang dating Philippine volleyball attendance record na naitala sa UAAP finals sa pagitan ng Ateneo at La Salle noong 2016 na 22,848 katao sa parehas ding venue.

Maging ang mga manlalaro ay ramdam ang malaking pagbabago sa estado ng sport. “The love and support we get from the fans are overwhelming. We’ve worked so hard to grow the sport, and to see it flourish like this is a dream come true,” pahayag ni Alyssa Valdez na siyang kinokonsiderang "Face of Philippine Volleyball."

Kabaligtaran naman ang kapalaran ng basketball partikular ang Philippine Basketball Association (PBA) na dating hari ng Filipino sports dahil bumaba ang kanilang gate  attendance maging ang kanilang viewership. 

Base sa obserbasyon ng mga eksperto, nabigo ang kauna-unahang play-for-pay league sa Asia na makasabay sa pagbabago ng panlasa ng mga fans habang mas napalapit ng husto ang volleyball sa mga tao lalo na sa mga kabataang nahirati na sa teknolohiya partikular sa social media at iba't-ibang mga digital platforms.

Nakatulong din ng malaki ang pagdami ng sponsorship at media deals ng major brands na gustong mapasok ang Sport. Sinasalamin ngayon ng volleyball ang paglakas at pag-angat ng mga kababaihan sa palakasan.

Gilas babawi na lang sa Latvia, tinalo ng Poland

ni VA @Sports | July 1, 2024

Nabigo sa 2 puntos lamang ang Gilas Pilipinas laban sa Poland sa kanilang friendly game, 82-80 kahapon ng madaling araw para sa FIBA Olympic Qualifying Tournament.  

Umalagwa agad sa 9 puntos ang Polish para sa 66-57 na kalamangan. 

Pag-angat sa 76-62 ng iskor ay nakabawi si Dwight Ramos sa 82-77 game na pagdikit sa nalalabing 1:41 minuto. 

May tsansa pa sana si Chris Newsome sa freethrow pero kinapos pa rin.  Sina Michal Sokolowski at Jerem Sochan ang bumida sa Poland. 

Sa kabila nito, tatangkain ng Gilas Pilipinas na makasungkit ng tiket para sa men's basketball tournament ng 2024 Paris Olympics sa pagsabak nila sa FIBA Olympic Qualifying Tournament na magsisimula bukas- Hulyo 2 hanggang 7 sa bansang Latvia.

Nauna nang idineklara ni national team head coach Tim Cone na 11 manlalaro lamang ang kanilang ilalaban matapos mawala sa roster nina Scottie Thompson, AJ Edu at Jamie Malonzo dahil sa injury. "We're going 11-strong," ani Cone.

Muling pangungunahan ni naturalized player Justin Brownlee ang gagawing kampanya ng Nationals kung saan nakatakda nilang makatunggali ang mga koponan ng  Georgia at Latvia sa group stage ng qualifiers.

Kasama ni Brownlee ang core ng team na binubuo nina PBA 7-time MVP June Mar Fajardo, Dwight Ramos, Kai Sotto, CJ Perez, Chris Newsome, Kevin Quiambao, Calvin Oftana at Carl Tamayo.Kabilang din sa maglalaro sa OQT ang beteranong si Japeth Aguilar at  Mason Amos.

Unang makakasagupa ng Gilas ang koponan ng Latvia sa Hulyo 4 ganap na alas-12 ng hating gabi, oras dito sa Pilipinas kasunod ang Georgia ganap na alas- 8:30 ng gabi matapos lamang ang halos walong oras na pahinga ayon sa pagkakasunod. 

Quezon sports power palalakasin sa MPVA

ni MC/VA @Sports | June 26, 2024

Target ng Quezon Province na palakasin hindi lamang ang turismo bagkus ang grassroots sports program tungo sa pagiging sentro ng ‘sports power’ sa Southern Luzon. 

Ang minimithi na mapatibay ang isang koponan sa women’s volleyball na binuo at isasabak ng lalawigan sa ikalawang Season ng Maharlika Pilipinas Volleyball Association (MPVA) – na isang semi-propesyonal na home and away tournament.

Tinaguriang ‘The Quezon Tangerines’, ang team na pag-aari ni Quezon 4th District Rep. Mike Tan ay tiwalang malakas ayon kay Quezon Province Gov. Dr. Helen Tan at team manager Atty. Donn Ron Kapunan dahil binubuo ng NCAA three-peat champion St. Benilde College ang mga ito sa pangunguna nina Most Valuable Player Mycah Go at Jessa Dorog.

Head coach ang beteranong coach na si Jerry Yee. Alinsunod sa mga regulasyon sa torneo, idinagdag sa koponan ang 8 homegrown players at ang mga napili sa isinagawang tryouts ay sina Lenie Sapallo, Jasmine Dapal, Christine Joy Lubiano, Louann Latigay, at Jillian Nicole Quiambao mula sa Lucena City; Paola Alban ng Lucban, Kamille Josephine Amaka Tan ng Tayabas, at Geraldine Rae Palacio ng Pagbilao.

Kinilala ni Tan ang kahalagahan ng sports sa pagyabong at kaunlaran sa aspeto ng turismo at socio-economic, higit sa paghubog ng character ng mga bagong henerasyon ng Quezonians. 

“After basketball (Quezon Huskers), nagbuo kami ngayon ng team sa volleyball para sa MPVA. Ang volleyball ay mabilis na tumataas sa mga tuntunin ng katanyagan sa mga kabataan," sabi ni Tan. 

Kasama rin sa koponan sina Zamantha Nolasco, Chenae Basarte, Clydel Mae Catarig, Fiona Naomi Getigan, Weilyn Estoque, Corrine Allyson Apostol, Cristy Ondagan, Aya Densing, Kim Alison Estenzo, Zen Basilio, Fiona Inocentes, Marygrace Borromeo, Sofia Badion, Shekaina Lleses at Shahana Lleses. Ang MPVA ay magbubukas sa unang linggo ng Hulyo.