Tankers Sanchez at Hatch sasabak sa Nat'l trials

ni VA @Sports | August 12, 2024

Filipino-Canadian Kayla Sanchez at Filipino-American Jarod Hatch / POC Media / Jarod Hatch

Matapos kumampanya sa 2024 Paris Olympics, nakatakdang sumabak sa idaraos na national trials ng Philippine Aquatics Inc. (PAI) sina Filipino-Canadian Kayla Sanchez at Filipino-American Jarod Hatch.

Ang nasabing  trials ay nakatakdang ganapin bago matapos ang kasalukuyang buwan sa Teofilo Ildefonso swimming pool sa Rizal Memorial Sports Complex sa Malate, Manila.

Kasama ng dalawang Olympian swimmers na lalahok sa trials sina Cambodia 2023 Southeast Games (SEAG) champions Teia Salvino (100m backstroke) at Xiandi Chua (200m backstroke); Vietnam 2021 SEAG gold medalist Chloe Isleta (200m backstroke); 2024 Asian Age Group Championships gold medalist Jamesray Ajido (100m butterfly) at mga bronze medalists na sina Jasmine Micaela Mojdeh at Heather White gayundin si 2023 World Aquatics Championships campaigner Jerard Dominic Jacinto.

Ang unang tatlo sa anim na araw na tryout ay gaganapin sa Agosto 15-18 habang ang huling bahagi ay idaraos sa Agosto 20-23. “We welcome them, arms wide open and thankful that Fil-foreign athletes are now showing a big desire to join our national pool," pahayag ni PAI secretary general Eric Buhain sa news release na kanilang inilabas.

Pipiliin sa tryouts para sa short (25m) at long (50m) courses ang magiging miyembro ng national team para sa World Aquatics World Cup series at 46th Southeast Asian Age Group C'ships; gayundin sa World Aquatics C'ships sa Singapore sa 2025.

Gaganapin ang World Cup sa Shanghai, China sa Okt. 18 - 20 (Series 1), Incheon, South Korea sa Okt. 24 - 26 (Series 2); at Singapore sa Okt. 31 hanggang Nob. 2 (Series 3).

Nakatakdang idaos ang championships sa Dis. 10 - 15 sa Budapest, Hungary.   

Unang lalaban sa Olympics sina Yulo, Marcial at Delgaco

ni VA @Sports | July 23, 2024

SI Olympic rower Joanie Delgaco habang nasa bangka sa pagmamasid ni POC president Abraham Tolentino sa Paris, France. Una siyang sasabak sa laban sa Sabado. (pocpix)

Uumpisahan ng dalawa sa mga inaasahang makapagbibigay ng medalya sa bansa ang kampanya ng mga Filipinong atleta sa 2024 Paris Olympic Games.

Mauunang sumalang mula sa hanay ng dalawampu't dalawang Pinoy athletes sina gymnast Carlos Yulo at boxer Eumir Felix Marcial ang kampanya ng bansa sa Sabado-Hulyo 27, isang araw pagkatapos ng opening ceremony.

Kasama nilang sasabak din sa Sabado ang rower na si Joannie Delgaco.Umaasa si Philippine Olympic Committee (POC) president Abraham “Bambol” Tolentino na maging maganda ang panimula ng mga balik-Olympians  na sina Yulo at  Tokyo Games bronze medalist Marcial para delegasyon ng bansa na magtatangkang higitan ang naging pagtatapos ng Pilipinas sa nakaraang edisyon ng quadrennial games kung saan nakamit bansa ang ating unang Olympic gold medal sa pamamagitan ni Hidilyn Diaz-Naranjo sa weightlifting na dinagdagan pa ng dalawang silvers at isang bronze ng mga boxers na sina Carlo Paalam, Nesthy Petecio at Marcial.

“We’re looking forward to Caloy [Yulo], Eumir and Joanie giving the country that strong start in Paris,” wika ni Tolentino. “They’re all ready and inspired and in high spirits,” dagdag nito.Nakatakdang sumalang ang 23-anyos na si Yulo sa qualification round ng men’s individual all-around ganap na alas-9:30 ng gabi.Sisimulan naman ni  Marcial ang laban sa  light-heavyweight division kasabay at parehas din ng oras ng pagsabak ni Yulo.

Mauuna naman sa kanila at sasabak sa heat ganap na alas-3:00 ng hapon si Delgaco na magtatangkang makaabot sa finals ng  women’s single Sculls.Nauna nang nagpahayag ng kanyang kumpiyansa si Tolentino na magiging matagumpay ang Team Philippines sa Paris.“This team, I believe, is the most prepared in Philippine Olympic history,” ani Tolentino kasabay ng pasasalamat sa Philippine Sports Commission sa pagsuportang ibibigay ng mga ito sa mga atletang sasabak sa Paris Games partikular sa pagsasagawa ng kauna-unahang  pre-Olympic training camp na idinaos sa Metz, France. 

“Our athletes have trained and prepared through a tried-and-tested template that guarantees an Olympic medal,” ayon pa kay Tolentino.

Ito na ang ika-100 taon ng partisipasyon ng Pilipinas sa Olympics.  

Petecio titiyak ng gold sa Paris dahil walang boxing sa L.A. 2028

ni VA @Sports | July 6, 2024

Photo: Nesthy Petecio / FB

Dahil sa walang katiyakan kung makakalaban pa siya sa susunod na Olympics, sisikapin ng boxer na si Nesthy Petecio na makamit ang pinakamimithing gold medal sa nakatakdang pagsabak sa darating na 2024 Paris Games.Nagwagi ng silver medal at naging kauna-unahang Filipina boxer na nanalo ng medalya sa quadrennial games, maaaring hindi na makabawi sa susunod na 2028 Los Angeles Olympics kung mabibigo pa siya ngayong taon sa Paris.

Ito'y dahil posibilidad na walang idaraos na boxing event sa LA Games.Dulot ito ng ipinataw na ban sa International Boxing Association (IBA) sa pagpapatakbo ng Olympic boxing tournament mula pa noong 2021 dahil sa iba't-ibang mga isyu at kontrobersya.

Binigyan ng IOC (International Olympic Committee) ng deadline na hanggang 2025 para pamunuan ang boxing para magkaroon ng maayos na liderato dahil kung hindi ay aalisin nila sport sa kalendaryo ng Los Angeles Games.

Dahil dito, nais ibuhos ng 32-anyos na si Petecio ang kanyang makakayanan sa posibleng huling pagsalang niya sa Olympics.

“Hindi pa sigurado kung magre-retiro na ako. Medyo hindi na rin tayo bumabata.Pero gusto ko pang makaabot sa susunod na Asian Games kasi hindi pa ako nanalo ng medalya dun e. Pero sa Olympics baka last na 'tong sa Paris," ani Petecio.