Taiwan, 'di pinaporma ang Blu Girls sa Asia Cup

ni VA @Sports | April 5, 2023

Winakasan ng Chinese-Taipei ang 3-game winning streak ng Philippines women softball squad na kilala rin bilang RP Blu Girls matapos nilang blangkahin ang mga Pinay, 5-0 noong Lunes ng hapon sa pagpapatuloy ng Women’s Softball Asia Cup sa Songdo LNG Baseball Stadium sa Incheon, South Korea.

Pinaulanan ng mga Taiwanese ang mga Pinay ng hits sa ilalim ng 6th inning kabilang na ang homerun ni Li Szu-Shih upang dominahin ang laro.

Nabigo ang Blu Girls na maipagpatuloy ang momentum mula sa 10-0 panalo nila kontra Thailand kaya sumadsad sila sa unang pagkakataon matapos ang unang apat na laban.

Dahil sa kabiguan, nakatabla sa kanila ang Taiwan sa ikalawang posisyon sa team standings ng torneong nagsisilbing qualifier para sa XVII WBSC Women’s Softball World Cup sa Hulyo.

Nagsimulang umiskor ang World No. 3 ranked Chinese-Taipei sa ilalim ng second inning kung saan tumapak sa homeplate sina Li, Ko Chia-Hui at Chiang Ting-En para sa 2-0, kalamangan.

Mistula namang namatanda ang Blu Girls na Hindi nakaporma sa kabuuan ng laban kumpara sa ipinakita nilang dominasyon sa unang tatlo nilang laro.

E-Palarong Pambansa, start na ang multi-sports platform

ni VA @Sports | April 3, 2023

Dahil sa patuloy na pagyabong ng gaming industry sa buong mundo, may isang bagong national esports tournament na nalikha.

Inorganisa ng ILO Esports sa pakikipagtulungan ng National Youth Commission, nabuo ang E-Palarong Pambansa na dinisenyo gaya ng taunang multi-sport event na Palarong Pambansa kung saan nagtutunggali ang atletang mag-aaral na kumakatawan sa iba't-ibang rehiyon ng bansa.

"Modeled after the Palarong Pambansa which is mandated to be conducted annually, the E-Palarong Pambansa is a multi esports tournament platform where we will enjoin the SK through the National Youth Commission and we'll have several games from May to July," pahayag ni E-Palarong Pambansa project lead Jamar Montehermoso.

Naging matagumpay ang Pilipinas sa gaming sa mga nagdaang taon partikular sa Mobile Legends: Bang Bang kung saan ang Pinoy ang defending champion sa world championship at Southeast Asian Games.

Plano ng E-Palarong Pambansa na gawing pundasyon ang nasabing tagumpay upang matulungan ang mga kabataan sa pagpapaunlad ng kanilang sarili bilang mga makabayan.

"This event's goal is to provide a platform to every e-sports fan nationwide and establish a network of Filipino e-sports organization," ayon pa kay Montehermoso. "It is our goal to create a stable and sustainable grassroots esports ecosystems to promote esports as a supplementary part of a holistic development of the Filipino youth," dagdag nito.

Tampok sa E-Palarong Pambansa ang limang laro na kinabibilangan ng tatlong mobile games at dalawang PC games na aalamin sa pamamagitan ng botohan na magsisimula ngayong Abril 3.

Bukod sa torneo, magsasagawa rin ang E-Palarong Pambansa ng paghahanap ng mga shoutcasters na siyang magbibigay ng 'live commentary' at 'in-depth analysis' ng mga laro.

Fajardo at Brownlee, babawi ang Gilas Pilipinas sa SEAG

ni VA/GA @Sports | March 27, 2023

Determinado ang Samahang Basketbol ng Pilipinas (SBP) na mabawi ang gold medal sa men’s basketball ng Southeast Asian Games mula sa koponan ng Indonesia na tumapos sa 52-game winning run at sa paghahari ng mga Pinoy sa rehiyon noong nakaraang 31st SEAGames sa Vietnam.

Ito ang misyon ng Pilipinas sa 32nd SEAG na gaganapin sa Phnom Penh sa Mayo “That moment is upon us, and we’re not leaving any stone unturned in our overall bid to regain basketball glory in our region," ani SBP president Al Panlilio.

Kaugnay nito, nagsumite ang SBP ng 28-man national pool sa 5-on-5 basketball para sa kanilang Entry By Name (EBN) list sa Philippine Olympic Committee. Nangunguna sa nasabing listahan sina 6-time PBA Most Valuable Player June Mar Fajardo, Roger Pogoy at naturalized Filipino Justin Brownlee. Tanging sina Fajardo at Pogoy lamang ang natira mula sa 2021 lineup kung kaya pawang baguhang ang 26 pang isinama sa 5-on-5 Gilas pool.

Kabilang na rito ang mga bagong mukha na sina Mikey Williams, Jeremiah Gray, ang magkapatid na Michael at Ben Phillips, Mason Amos, Jerom Lastimosa, Brandon Rosser, Deschon Winston at AJ Edu. Ang iba pang kasama sa pool ay sina CJ Perez, Chris Ross, Marcio Lassiter, Japeth Aguilar, Scottie Thompson, Jamie Malonzo, Christian Standhardiger, Stanley Pringle Jr, Calvin Oftana, JP Erram, Mikey Williams, Chris Newsome, Raymond Almazan, Norman Aaron Black, Arvin Tolentino, Kevin Alas at Kevin Quiambao. Magsisilbing head coach nila si Chot Reyes. Sa men’s 3×3 na gagabayan ni coach Lester del Rosario, kabilang sa pool sina Angelo Kouame, Almond Vosotros, Samboy De Leon, Brandon Bates, Jorey Napoles, Lervin Flores, Joseph Eriobu, Jeff Manday, Alfred Batino at Joseph Sedurifa. Sa 5-on-5 Gilas Women team na nakatakdang ipagtanggol ang gold medal, nasa pool ni headcoach Patrick Aquino sina Jack Animam, Afril Bernardino, Stefanie Berberabe Mai Loni Henson. Kasama rin nila ang mga beteranang sina Sofia Roman, Mikka Cacho, Clare Castro, Chack Cabinbin, Khate Castillo, Camille Clarin, Monique Allison Del Carmen, Ella Fajardo, Katrina Guytingco, Andrea Tongco, Janine Pontejos, Tin Cayabyab, Ann Pingol, Jhazmin Joson, at Angel Surada.