3 magkakaibigan, pinagbabaril habang nag-iinuman, patay

ni Twincle Esquierdo | November 21, 2020

Patay ang tatlong magkakaibigan sa Tiaong, Quezon matapos pagbabarilin habang nag-iinuman nitong Huwebes nang gabi sa Barangay Del Rosario.

Ayon sa Tiaong Municipal Police Station, pasado alas-9 ng gabi nang mangyari ang insidente sa tindahan ng goto sa nasabing barangay. Batay sa mga nakasaksi, nag-iinuman ang magkakaibigan nang biglang dumating ang dalawang lalaki na may dalang baril at pinagbabaril ang mga ito.

Isinugod agad ng mga residente ang dalawang sugatan at tatlong pinagbabaril sa isang pagamutan sa San Juan, Batangas, ngunit dead on arrival ang tatlong magkakaibigan.

Kinilala ang mga biktima na sina dating Barangay Del Rosario Captain Richard Nitro, Jay-Ar Javillo at Selvino Macaraig.

Ayon sa kapatid ni Nitro na si Ma. Elena Cumal, mabait at matulungin ang kanyang kapatid at wala raw itong nakaaway kahit noong nanunungkulan pa bilang kapitan ng barangay.

Wala naman itong naikuwento sa kanila kung mayroong nagbabanta sa buhay niya, kaya hustisya ang panawagan ng kanilang pamilya.

Samantala, sa Maynila raw nakatira si Macaraig at umuwi lang ito para puntahan ang mga puno ng saging na sinira ng Bagyong Ulysses, kaya hindi akalain ng kanyang mga kamag-anak na madadamay ito sa pamamaril.

Ayon sa hepe ng Tiaong Municipal Police Station, maaaring paghihiganti kay dating Kapitan Richard Nitro ang nakikita nilang motibo sa nangyaring pamamaril.

Mining at illegal logging, sanhi ng baha sa Cagayan

ni Twincle Esquierdo | November 20, 2020

Sinisisi ng mga magsasaka ang black sand mining, illegal logging at illegal mining na dahilan ng pagbaha sa Cagayan. Umapela ang presidente ng Kilusang Magbubukid ng Pilipinas (KMP) na si Danilo Ramos kay House Speaker Lord Allan Velasco na isama ang black sand mining, illegal logging at illegal mining sa isasagawang House investigation.

“Comprehensive investigation ang dapat na gawin ng Kamara, dapat matapang nilang silipin ang mga nasa likod ng illegal logging at black sand mining na siyang talamak sa Cagayan, dahil ito ang siyang problema at dahilan ng paglubog ng lalawigan.

"Pahayag at panawagan ng aming grupo, itigil ang black sand mining, logging at protektahan ang kagubatan at environment," sabi ni Ramos. Ayon pa sa grupo, umapela na raw sila kay Pangulong Rodrigo Duterte na magsagawa ng dredging operation sa Cagayan River.

Nakatakda namang siyasatin ng mga mambabatas ang mga posibleng hindi pagsunod sa batas, alituntunin o regulasyon na naging dahilan ng pagbaha sa Cagayan. Bukod pa sa pagmimina, ang biglang paglabas ng tubig sa Magat Dam ay nakapinsala rin sa dalawang lalawigan ng Cagayan at Isabela.

Matatandaan din na dahil sa pagbaha ay maraming residente ng Cagayan at Isebela ang na-stranded sa bubong at tatlong araw na walang kain habang naghihintay na mailigtas sila. Ayon pa sa grupo, bawat isa sa 9.3 milyong magsasaka at mangingisda ang humihingi ng tulong sa gobyerno sa pamamagitan ng P15,000 subsidy at P10,000 cash aid.

Congw. Villar, tumangging maging deputy speaker

ni Twincle Esquierdo | November 20, 2020

Tinanggihan ni Las Piñas City Representative Camille Villar ang posisyon bilang deputy speaker sa Kamara de Representante kasunod ng panibagong balasahan sa kapulungan nitong Miyerkules.

Nagpadala siya ng sulat kay Speaker Lord Allan Velasco at sinabi ni Villar ang pasasalamat nito sa ginawang nominasyon na gawin siyang deputy speaker ng liderato.

"It is an opportune time to work with my fellow congressmen and the leaders of the House of Representatives on policy measures that would give personal and economic relief to our kababayans amid the past disasters and the pandemic.

"But the greater tact is adherent responsibility to our constituents, and the constant affinity to the leadership and nation," sabi ni Villar. Gayunman, sinigurado ni Villar kay Velasco na buo ang suporta niya sa legislative agenda ng bagong liderato sa Kamara.

Isa si Rep. Villar sa tatlong kongresista na napili para maging deputy speaker. Kabilang sa mga nakonsidera sina Cagayan De Oro City Representative Rufus Rodriguez at Buhay party-list Representative Lito Atienza.

Pinalitan naman sa puwesto sina Capiz Rep. Fredenil Castro, Laguna Rep. Dan Fernandez at Batangas Rep. Raneo Abu na kilalang malapit na kaalyado ni dating Speaker Alan Peter Cayetano.