P10.2 milyon halaga ng shabu, nakuha sa buy-bust

ni Twincle Esquierdo | December 12, 2020

Arestado ang dalawa sa ginawang buy-bust operation sa Valenzuela City. Kinilala ang mga suspek na sina Ernesto Magalang Francisco at Genelyn dela Torre Mararac.

Nakuha sa kanila ng Valenzuela City Police sa Barangay Ugong ang 1.5 kilograms na pinaghihinalaang shabu na nagkakahalaga ng mahigit P10 milyon, cash bills, digital weighing scale, cellphone, relo at ilang pirasong alahas.

Ayon naman sa Station Drug Enforcenment Unit operatives, P10.2 milyong Standard Drug Price (SDP) ang halaga ng shabu na nakuha sa mga suspek. Inamin din ng mga ito na isa silang key player ng mga droga na nakikipagtransaksiyon sa Manila.

Dadalhin naman sa Northern Police District's Crime Laboratory ang mga droga na nakuha, pati na rin ang ibang gamit para sa imbentaryo, ayon kay National Capital Region Police Office (NCRPO) acting chief Police Brigadier General Vicente Danao Jr..

Facebook, Instagram at Messenger, nag-crash

ni Twincle Esquierdo | December 11, 2020

Nag-crash ang Facebook, Instagram at Messenger apps kaninang alas-9 ng umaga at mas naapektuhan ang bansang UK at Europe at hanggang ngayon ay hindi pa rin alam ang dahilan kung bakit nangyari ito. Ayon sa Down Detector, 80 porsiyento ang hindi nakatatanggap ng mensahe at 20 porsiyento ang hindi makapag-log-in.

Nagbigay naman ng pahayag ang Facebook tungkol sa nangyari at nagsusumikap na maibalik na sa dati ang mga nasabing apps.

“We are aware that some people are having trouble sending messages on Messenger, Instagram and Workplace Chat. We’re working to get things back to normal as quickly as possible,” sabi ng company spokesperson ng Facebook.

Nagsampa naman ng kaso ang U.S. Federal Trade Commission laban sa Facebook nitong Miyerkules na nagsasabing gumamit ito ng strategy na “buy or bury” para maalis ang mga kakumpitensiya nito.

Isolation facility sa bawat Bgy. sa Bulacan, sinimulan na

ni Twincle Esquierdo | December 11, 2020

Sinimulan na ng local government unit (LGU) ng Baliwag, Bulacan ang pagkakaroon ng sariling isolation facility sa 27 barangay dahil nahihirapan na umano ang municipality na i-accommodate ang lahat ng nagkakaroon ng COVID-19 sa nasabing lugar.

"Nahihirapan po kasi ang municipality na i-accommodate lahat, so we see to it na dapat magkaroon ang bawat barangay," sabi ni Dr. Dave Legazpi, rural health physician sa Baliwag.

Nagbigay din ang lokal na pamahalaan ng mga personal protective equipment (PPE) para sa mga health workers, ngunit aminado sila na hindi lahat ay mabibigyan nito, ayon kay Dr. Joseph Paul Cruzcosa na mula sa Gregorio del Pilar District Hospital sa Bulacan.

Aniya, "Malaking bagay po 'yan. Ang supply chain natin, hindi naman ganoon kaperpekto, unlike sa ibang bansa, umaasa pa rin tayo sa bigay." Kahit mababa ang kaso ng COVID-19 sa Bulacan at maging sa Nueva Ecija, maingat at mahigpit ang medical frontliners sa pag-aasikaso sa mga pasyente.

"Continuous po ang kailangan namin na proteksiyon," sabi ni Dr. August Abuelda Jr. ng Eduardo L. Joson Memorial Hospital.