Bacolod, Iloilo, Cebu at Tacloban City, uunahin sa COVID-19 vaccine

ni Twincle Esquierdo | November 26, 2020

Prayoridad na unang mabigyan ng bakuna laban sa COVID-19 ang mga lugar na libu-libo ang bilang ng mga apektado. Sa isang panayam, sinabi ng vaccine czar na si Carlito Galvez Jr. na lahat ng mga lugar na halos 3,000 - 4,000 ang bilang ng may COVID-19 ay prayoridad na unang mabakunahan.

"Lahat po ng mga tumaas nang mahigit 4,000 o 3,000 ang kanilang active cases, uunahin po natin 'yan. Kasama po ang Bacolod, Iloilo, Cebu at Tacloban City," sabi ni Galvez.

Ibibigay nang libre ang mga bakuna at sisikapin ng gobyerno na mabakunahan ang 60 - 70 milyong katao sa loob lamang ng limang taon. "We will do this in a 3 to 5-year period because we can only vaccinate around 20 to 30 million a year."

"Ang pinakauna nga is healthcare workers at saka 'yung mga frontliners. Kasama po sa mga frontliners na ito ay mga police at sundalo at saka ‘yung ating mga servicemen."

"Kasama rin po dito ang mga essential workers ng Department of Social Welfare and Development, Department of Education, government agencies, vulnerable at poor communities," sabi ni Galvez.

P300,000 pabuya kada ulo sa mga suspek sa pagpatay sa rider

ni Twincle Esquierdo | November 25, 2020

Magbibigay umano ng pabuya ang lungsod ng Valenzuela sa sinumang makapagbibigay ng impormasyon sa kinaroroonan ng mga suspek sa pagpatay sa isang rider noong Oktubre.

Nagkakahalaga ng P300,000 ang patong sa ulo ng bawat suspek. Nauna nang naaresto ang dalawa sa mga suspek na sina Edgar Batchar at Police Cpl. Michael Castro.

Pinaghahanap pa ngayon ang dating pulis na si Patrolman Anthony Cubos na lider sa isang criminal gang at ang mga testigo na sina Rico Reyes, Narciso Santiago at Joanne Cabatuan.

Matatandaang pinatay ang rider na si Niño Luegi Hernando matapos mag-withdraw ng sahod ng kanyang mga katrabaho sa isang bangko sa Paso de Blas, Valenzuela alas-4 ng hapon noong Oktubre 9. Sinundan pala siya ng riding-in-tandem at pinagbabaril.

Nakuha sa kanya ang motor at P442,000 cash, ayon sa hepe ng Valenzuela Police na si Police Col. Fernando Ortega. Inaalam na rin ni PNP Chief General Debold Sinas kung may kinalaman ang mga suspek sa ilang kaso ng panghoholdap at pagpatay sa northern Metro Manila.

4 na miyembro ng Abu Sayyaf, sumuko

ni Twincle Esquierdo | November 22, 2020

Apat na miyembro ng Abu Sayyaf ang sumuko sa Sulu nitong Sabado. Sa isang pahayag ng militar, iniharap kay 1102 Infantry Brigade Commander Brigadier General Ignatius Patrimonio ang apat na isinuko kay Lieutenant Colonel Rafael Caido, commanding officer of the Philippine Army's 6th Special Forces Battalion.

Kinilala ang mga sumuko na sina Radzmel "Amil" D. Said, Abu Sayyaf senior leader Hatib Hajan Sawadjaan na matagal nang pinaghahanap ng gobyerno na residente ng Patikul, Sulu, at pamangkin ni Hatib Majid Said a.k.a. Amah Patit.

Aktibong miyembro rin ng Abu Sayyaf ang dalawang kapatid nito na nakumbinsing sumuko ni Captain Froilan Pinay-an ng 20th SF Company matapos makita ang maayos na pagtrato sa mga sumuko.

Sumuko rin si Serhamal Bahjin Alli, apo ni Abu Sayyaf senior leader Radulan Sahiron kay 13th SF Company under 1st Lieutenant Filmar Luzon.

Meron itong M60 machine gunner at M16 rifle with ammunition na isinuko. Kabilang sa mga sumuko sina Muknan S Hadjirudin at Sali Kadil Ammad, na parehong nasa pangangalaga ni Abu Sayyaf subleader Alhabsy Misaya, residente ng Barangay Punjungan, Kalinggalan Caluang, Sulu at isinuko rin nila ang kanilang M1 Garand rifles.