Nakulong, nakilala ang Diyos at nagbigay-serbisyo sa kapwa

ni Rikki Mathay - @Tips Pa More | January 25, 2022

Pinaka-artistahing lungsod daw sa bansa ay Quezon City dahil kung hindi mga artista ang tumatakbo sa pulitika, kilalang tao mula sa iba’t ibang industriya. Bilang kandidato sa pagka-konsehal sa ika-6 na distrito ng QC, nakita rin natin mismo kung bakit nabansagan tayong “City of the Stars” dahil mismong ang kasama natin sa kampanya bilang congressman ay walang iba, kundi ang sikat na personalidad na si Bingbong Crisologo.

Bukod sa kanyang mga hindi matawarang nagawa sa QC sa loob ng halos dalawang dekadang panunungkulan, mula pagiging konsehal hanggang maging 4 term congressman, i-‘Marites’ lang natin sa mga bagets pa, pero nagsimulang mabago ang tadhana ni Bingbong noong binaril ang kanyang tatay na isang congressman sa kanilang lugar noon – sa loob mismo ng simbahan sa Ilocos. Makalipas ang ilang taon, siya naman ay nahatulang makulong panghabambuhay dahil sa kasong arson.

Pero ‘eto ang nakaka-inspire sa istorya ng buhay niya, ang nabansagang bad boy ay naging preacher sa loob mismo ng Bilibid.

“Sa puntong iyon, nawalan na ako at akala ko tapos na ang buhay ko. Pero sa Bilibid, doon ko muling nakilala ang Panginoon. Kalauna’y natagpuan kong lumalakas ang aking pananampalataya sa araw-araw na nasa loob ako.”

Sa loob ng walong taon sa loob ng Bilibid, sinimulan niya ang pagpapalaganap ng salita ng Diyos at magbigay-pag-asa sa mga kakosa na dumadalo sa Bible studies at prayer meetings.

“Bisperas ng Bagong Taon – nagdasal ako at humingi ng sign kay Lord. Kung ako ay makalalabas bago sumapit ang hatinggabi, nangangahulugang nakatadhana akong maglingkod sa Kanya,” sabi niya.

Kinilabutan ako nang malaman kong nabigyan ng presidential pardon si Bingbong at nakalaya ng 11:55 pm ng Disyembre 31, 1980. Ewan ko na kung hindi pa ito ang hinihintay niyang “sign”.

At doon na nagsimula ang Loved Flock Catholic-Charismatic Community, kung saan siya ay mas kilala bilang Brother Bingbong. Sa dami nang natutulungan niya bilang ministro ng Charismatic community, naisip niyang mas marami siyang matutulungan kung may posisyon siya sa gobyerno.

“Noong tumakbo ako sa pagka-mayor noong 2019, nakita ko kung paano ang District 6 ay ang pinaka-kawawa sa lahat ng distrito sa QC. Akalain mo na mayroon pa ring maliliit na sapa na tinatawiran at mga kalsadang sa sobrang lubak-lubak at halos hindi madaanan?

Nais kong lumikha ng Congressional district office sa bawat barangay para maihatid ang ating serbisyo publiko diretso sa tao. Pakiramdam ko ay hindi pa ako tapos sa aking misyon bilang personal na panata ko sa Panginoon. Kung manalo ako, puwede kong ituloy ang aking mga pangarap na gawing progresibo ang Distrito 6. Kung matalo ako, sa wakas ay puwede na akong makapag-relax na kasama ang aking pamilya. Ngunit kung matatalo ako, ang mga taga-Distrito 6 ang tunay na matatalo dahil mawawalang sila ng pagkakataong makaranas ng serbisyong Crisologo na napatunayan na natin sa Distrito 1,” dagdag ni Bingbong.

At ang tip niya sa mga may pinagdaraanang unos sa kanilang buhay, “Huwag kayong mawawalan ng pag-asa. Totoong God works in mysterious ways at may mga hindi man tayo maintindihan sa ngayon, kung bakit natin pinagdaraanan ang isang bagay, may plano ang Panginoon.”

Tips para sa mga naka-home isolation!

ni Rikki Mathay - @Tips Pa More | January 18, 2022

May joke ngayon na kung wala kang kakilalang nagpositibo sa virus, ibig sabihin ay wala masyadong kaibigan dahil nasa halos 50% na ang infection rate ng Omicron variant. Ibig sabihin, isa sa dalawang taong nagpapa-test ay lumalabas na positibo sa COVID-19.

Gaano nga ba ka-epektibo ang mga antigen at PCR-test? Sa webinar na isinagawa kasama ang Infectious Disease na espesyalistang si Dr. Marion Kwek ng Asian Hospital, ating napag-alamang kapag nagpositibo sa antigen test (COVID-19 test, kung saan makukuha agad ang resulta), mataas ang posibilidad na positibo kahit muling mag-test sa RT-PRC test (ang test na dumaraan sa laboratoryo at sinasabing 99% ang akurasya).

May mga kaso rin ng pag-a-antigen test, kung saan maaaring lumabas na negatibo ang resulta, ngunit ang dapat i-check ay ang mga sintomas na nararamdaman ng pasyente, tulad ng pag-ubo, pananakit ng lalamunan at kung may kasaysayan ng pagka-expose sa mga nagpositibo. Ang the best tip kapag may pag-aalinlangan sa test ay ang kumunsulta sa doktor at ang mahalaga ay isaisip nang positibo upang mas ibayong pag-iingat ang gagawin at hindi na makapanghawa.

Ito ang ilang tips ni Doktora para sa mga naka-home isolation:

1. Kapag masama ang pakiramdam, ugaliing bumukod o ‘wag na makipaghalubilo sa iba.

2. Buksan ang bintana para may magandang bentilasyon.

3. Maging pamilyar sa mga senyales ng lumalalang karamdaman, tulad ng hirap o paghahabol sa paghinga, pagbaba ng oxygen kung may pang-check (pulse oximeter) o pagbabago sa malay-tao. Kung mayroon man, dalhin agad sa pinakalmaapit na health care facility ang pasyente.

Sa mga nagpositibo, may good news din kahit paano – may dalawa hanggang tatlong buwang may antibodies na magiging depensa sa muling pagka-infect.

Naging bisita rin natin sa libreng konsultasyon si Kurt Castelo Nocum, na isang registered nurse. Paalala ni Nocum, ugaliing maghugas mabuti ng mga kamay at hindi lang ‘yung mabilisang pagsasabon at banlaw.

Naalala tuloy natin ang isa nating programa sa Philippine Red Cross, kung saan tayo ay konsehal, na pagpunta sa mga bahay ampunan bago magkaroon ng pandemya upang turuan ang mga bata nang wastong paghuhugas ng mga kamay.

1. Basain ang mga kamay ng malinis na tubig.

2. Kuskusin nang mabuti ang lahat ng bahagi ng kamay gamit ang sabon hanggang bumula ito.

3. Ipahid ang palad ng isang kamay sa likod ng kabilang kamay, at siguraduhing linisin din ang pagitan ng iyong mga daliri.

4. Ulitin gamit ang kabilang kamay. Muling kuskusin ang mga palad, at muling linisin ang pagitan ng mga daliri. Ipahid ang likod ng mga daliri sa magkabilang palad, pagsalikop ang mga daliri habang ginagawa mo ito.

5. Hawakan ang hinlalaki ng isang kamay gamit ang kabilang kamay, at paikutin ang nakasarang kamay sa paligid ng hinlalaki upang linisin ito. Ulitin sa kabilang hinlalaki at kamay.

6. Kung may magagamit na malinis na brush, kuskusin nang marahan sa ilalim ng mga kuko.

7. Banlawan ang mga kamay sa ilalim ng malinis at umaagos na tubig.

8. Patuyuin ang mga ito nang maigi gamit ang tuwalya.

9. Bilang kahalili, hayaan itong matuyo sa hangin. Gamitin ang ibang tuwalya (kung mayroon) upang patayin ang gripo.

Ang sabon at tubig ay mas epektibo kaysa sa mga hand sanitizer sa pag-alis ng ilang partikular na uri ng mikrobyo, ngunit kung nasa labas, ugaliing magbaon ng alkohol o hand sanitizer na naglalaman ng hindi bababa sa 60% na alkohol.

At isa pang tip! Kantahin sa Happy Birthday nang tatlong beses habang naghuhugas bilang gabay sa wastong panahong iginugugol sa handwashing.

Panoorin ang bahagi ng ating naging libreng konsultasyon sa Facebook page na “Rikki Mathay QC” para sa iba pang napapanahong tips, lalo na kung kasalukuyang naka-isolate. Magkakaroon din tayo ng lingguhang libreng medikal konsultasyon na batid nating kailangan nating lahat ngayon, kaya’t i-like, follow at i-share na rin ang Rikki Mathay QC sa FB.

Dapat i-push ang libreng RT-PCR test

ni Rikki Mathay - @Tips Pa More | January 13, 2022

Nauumay na rin ba kayo sa usaping pandemya?

Noong Disyembre ay kabi-kabila na ang mga nag-Christmas party dahil para bagang na-excite ang mga tao na muling makipaghalubilo, makalipas ang halos dalawang taong pagbabawal sa pagtitipun-tipon. Ayon sa mga eksperto, ang paglabas upang mag-enjoy sa mga pagtitipon ay isa na ring senyales ng pagkaumay at pagkabagot mula sa matagalang pagpigil ng paggalaw ng mga tao sa komunidad sa layuning matigil ang pagkalat ng virus.

Subalit, heto na naman tayo. Mula sa ilang daang kaso na lamang ng COVID-19 noong Disyembre, libu-libo na naman ang mga kaso sa bansa. Tuluy-tuloy ang pahirap hindi lang sa kalusugan, kundi sa pangkabuhayan at ekonomiya. Kung kaya’t hamon ni Anak Kalusugan Partylist Representative at tumatakbong mayor ng Quezon City na si Mike Defensor, na repasuhin ang ilang ordinansang nagpapahirap sa mamamayan, at baguhin ang sistema sa pagtugon sa pandemya.

Una na ay ang napipintong pagtaas ng buwis na ipinapataw sa mga lupain at ari-arian na kung tawagin ay real property tax. Alam n’yo ba na kamakailan ay itinaas na naman ang valuation ng mga lupa sa QC at may nakalabas nang ordinansa upang muling itaas ang buwis ng mga property owners – maliit man o malaki ang inyong pagmamay-ari?

“Sa ating palagay, hindi pa napapanahon – dumaan tayo sa pandemya at marami ang naghihirap – na huwag magtaas ng anumang buwis o taxes sa ating siyudad,” ani ni Defensor.

Isa pang isyu ay ang business taxes. Alam nating mula maliliit hanggang sa malalaking negosyo ay tinamaan ng krisis kung kaya’t isa pang mungkahi ni Defensor ay ang pagbibigay ng 5 hanggang 10% diskuwento sa mga negosyante hanggang sila ay makabawi na at makaraos mula sa pagkalugi ng mga negosyo.

Ayon sa pinakahuling datos ng Department of Health (DOH), ang siyudad na may pinakamataas na bilang ng kaso ng COVID-19 ay ang Quezon City na pumalo sa 4,668 ang nagpositibo nitong Enero 10 – halos kalahati lang ng sumunod na may pinakamataas na bilang ng mga kaso ng COVID-19 ang Manila City na may 2,557. Kung kaya’t iminumungkahi rin ni Defensor na paigtingin ang COVID-19 response sa QC sa pamamagitan ng pagbuo ng task force na tututok sa pagsugpo ng pandemya, kung saan kabilang ang mga doktor ng halos 71 ospital ng lungsod.

Dapat din aniyang bigyang-sabsidiya ang mga pampublikong sasakyan mula sa tricycle, jeep at bus na lumalakbay sa QC.

Ayon kay Defensor, “Marami ang nagtatrabaho sa labas at marami ang nagkakahawa-hawa pagsakay sa mga pampublikong behikulo. Kailangang tulungan ang mga TODA, JODA at bus operators upang magawan nila ng paraan ang pagpapatupad ng social distancing sa loob ng mga sasakyan, tulad ng pagkakabit ng mga plastik na maghihiwalay sa mga pasahero. At dahil hindi naman napupuno ang kanilang sasakyan, kailangan din natin silang suportahan sa pamamagitan ng subsidy. Huwag nating kalimutan ang kahalagahan ng sektor ng transportasyon sa pagtakbo ng ekonomiya at pangkabuhayan ng mga tao.”

Marami na rin ang may agam-agam sa napapabalitang lockdowns dulot ng tumataas na bilang ng kaso ng Omicron. Ani ni Defensor, “‘Yung lockdown kasi, medyo hindi na ako naniniwala na kapag may isa, dalawa o apat na pamilya ang nag-positive ay ila-lockdown mo na ang buong barangay o kalsada. Ang importante rito ay ang contact tracing na maaari nang mas mapabilis pa sa tulong ng teknolohiya. Kailangan din sa ngayon ang mas mga pinag-igting na quarantine centers kung saan dadalhin ang mga nagpositibo mula sa isang lugar, at nakaantabay na rin ang mga ospital kung sakali mang lumala ang lagay ng nagkasakit.”

Kapag naka-lockdown nga naman, kahit kalsada lang, muling maantala ang paghahanapbuhay ng mga empleyadong nakatira roon.

“Ang laban sa COVID-19 ay collective effort. Naniniwala akong sa pagtutulungan ng lokal na pamahalaan, ng barangay, mga homeowners at ng mga lider ng pamayanan, mas magiging matagumpay ang pagresponde sa pandemya,” dagdag pa ni Defensor.

Bukod sa mga napapanahong mungkahing ito, personal na namang hiling na gawing libre ang RT-PCR test, lalo na sa mga nangangailang bumalik sa kanilang trabaho, kung saan ito ay requirement. Bilang konsehal at volunteer ng Philippine Red Cross, marami ang lumalapit sa atin upang magtanong ng ganitong uri ng serbisyo. Masakit sa puso nating wala pang libreng test kahit man lang sana para sa mga naghihikahos sa buhay dahil masakit din ang ganitong uri ng test sa bulsa. Nasa P4,000 pataas ang RT-PCR test at alam n’yo bang marami sa ating mga kababayan ang kumikita lamang ng P50 hanggang P100 kada araw ayon sa report ng projectpayatas.org? Kung may ganito lang kaliit na kita, magpapa-test ka ba o ipambibili mo na lang ng pagkain para sa pamilya?

Kahit man lamang sana libreng antigen testing na mas mura sa RT PCR ay maisip nang iproyekto sa buong siyudad, lalo na ngayong kasagsagan na naman ng COVID-19.

Mabuti na lamang din at nagsasagawa sina Defensor at ang partidong Malayang QC ng free antigen testing para sa frontliners sa siyudad.

Tama. Ang pagsugpo sa virus ay “collective effort” – kailangang sama-sama nating pagtulungang labanan ang pandemya, mula sa ating indibidwal na pamamaraan, tulad ng pag-isolate kapag may naramdamang sintomas, hanggang sa pagbibigay-suporta at tunay na solusyon ng iba’t ibang sektor ng lipunan, lalo na ng ating mga lider sa pamahalaan.