Unang COVID-19 outbreak sa mga mink, naitala sa Utah

ni Thea Janica Teh | December 15, 2020

Isang wild animal ang kumpirmado at kauna-unahang naitalang positibo sa COVID-19 nitong Lunes, ayon sa US Department of Agriculture (USDA) at ito ay mink.

Nagsimula ang pagkabahala ng awtoridad sa pagkakaroon ng virus ng mga mink matapos magkaroon ng outbreak sa Utah simula Agosto na ikinamatay ng halos 15,000 farmed mink.

Sa wildlife surveillance ng USDA sa Utah, sumailalim ang mga wild animals sa COVID-19 test at napag-alamang ang tanging nagpositibo sa virus ay ang mga mink.

Iniimbestigahan na ng Global health officials ang potensiyal na panganib nito sa mga tao. Matatandaang noong Nobyembre ay pinatay ng bansang Denmark ang 17 milyong farmed mink dahil ito umano ang nagkakalat ng virus sa kanilang bansa.

Agad na ipinaalam ng USDA sa World Health Organization ang nangyaring insidente ngunit sinabi nito na wala pa umanong sapat na ebidensiya upang masabi na kumalat na sa wild population ang nakuhang sakit ng mga mink.

Matatandaang nakapagtala na rin sa ibang bansa ng alagang aso, pusa at tigre sa zoo na nagpositibo sa virus.

Patay sa US sa COVID-19, 300,000 na

ni Thea Janica Teh | December 15, 2020

Umabot na sa 300,000 katao sa United States ang namatay dahil sa COVID-19, ayon sa Johns Hopkins University tally nitong Lunes habang papalapit nang simulan ang vaccine program.

Sa nakalipas na 2 linggo, nakapagtala ang John Hopkins ng 2,500 namatay kada araw dahil sa COVID-19 . Umabot pa sa 3,000 ang naitala noong Miyerkules at Sabado. Ito na ang pinakamataas na naitalang namatay sa COVID-19 sa buong mundo.

Ito umano ang sanhi ng kawalan ng disiplina ng ilang residente sa pagsunod sa health protocols tulad ng pagsusuot ng face mask at social distancing.

Binalaan din ng awtoridad na maaari pang tumaas ang bilang ng kaso ng COVID-19 sa kanilang bansa dahil marami ang bumiyahe at dumalo sa Thanksgiving holiday noong nakaraang buwan.

Samantala, nasa 2.9 milyong vaccine doses ang inihanda ng US na ide-deliver sa 636 sites para sa halos 20 milyon nitong mamamayan.

Ang bawat tao ay makatatanggap ng two-shot regimen bago matapos ang taon at nakahanda muling magbigay ng vaccine sa Marso para sa 100 milyong mamamayan.

Facility na sobrang maningil sa COVID test, buking, lagot sa DOH

ni Thea Janica Teh | December 14, 2020

Pinagpapaliwanag ng Department of Health (DOH) ngayong Lunes ang isang health facility matapos itong maningil ng mas mataas sa itinakdang presyo ng COVID-19 swab testing.

Ayon kay Health Undersecretary Maria Rosario Vergeire, nagpadala na umano sila ng sulat upang magpaliwanag kung bakit mas mataas sa itinakdang presyo ng COVID-19 test ang sinisingil sa mga pasyente nito.

Dagdag ni Vergeire, ang pagmo-monitor sa mga pasilidad ay nakapailalim sa Health Facilities and Services Regulatory Bureau.

Hindi binanggit ni Vergeire kung ospital o laboratory ang nahuli nitong lumabag. Sa ngayon ay hinihintay na lamang ang sagot ng pasilidad kung bakit ito naningil ng mas mahal sa itinakdang presyo.

Sa ilalim ng administrative order ng DOH at Department of Trade and Industry, ang sinumang lumabag dito ay papatawan ng suspensiyon at mumultahan.

Para sa first offense, maaaring masuspinde nang 15 araw ang pasilidad at may multa na P20,000. Para sa 2nd offense, 30 araw ang suspensiyon at kinakailangang magbayad ng P30,000. Para naman sa 3rd offense, tatanggalan na ng pamahalaan ng lisensiya ang pasilidad upang hindi makapag-operate.